ވުލްވްސް އަތުން ޗެލްސީއަށް ވަރުގަދަ މޮޅެއް، ހަތަރު ވަނާގައި

ދާއިމީ ކޯޗެއް ނެތި ކުޅެމުން އަންނަ ވުލްވްސް އަތުން ޗެލްސީން ވަރުގަދަ މޮޅެއް ހޯދައިފިއެވެ.

ޗެލްސީން އަމިއްލަ ދަނޑުގައި ވުލްވްސް ބަލިކުރީ 3-0ންނެވެ. މެޗުގައި ޗެލްސީއަށް ކުރިހޯދައިދިނީ ފުރަތަމަ ހާފްގެ އިތުރު ވަގުތުގައި ކައި ހާވާޓްޒްއެވެ. ދެވަނަ ހާފް ފަށައިގެން ނުވަވަނަ މިނިޓްގައި ދެވަނަ ލަނޑު ޖެހީ ޕުލިސިޗްއެވެ. ދެ ލަނޑު ޖަހަންވެސް ފުރުސަތު ތަނަވަސްކޮށްދިނީ މޭސަން މައުންޓްއެވެ. ޗެލްސީގެ ތިންވަނަ ލަނޑު ޖެހީ އާމަންޑޯ ބްރޯޚާއެވެ. މިއީ އޭނާ ޗެލްސީއަށް ޖަހައިދިން ފުރަތަމަ ލަނޑެވެ. މިއީ ޗެލްސީގެ ކޯޗުކަމުގައި ގްރަހަމް ޕޮޓާ ޗެލްސީގެ ދަނޑުގައި ހޯދި ލީގުގެ ފުރަތަމަ މޮޅެވެ.

މެޗު ވުލްވްސްއިން ފެށީ، ޓީމާ އަލަށް ގުޅުނު ޗެލްސީގެ ކުރީގެ ފޯވާޑް ޑިއެގޯ ކޮސްޓާ އެންމެ ކުރިއަށް ލައިގެންނެވެ. އެކަމަކު ދެވަނަ ހާފްގެ ކުރީކޮޅު އޭނާ ވަނީ ބަދަލުކޮށްފައެވެ. ޗެލްސީ އޮތީ ލީގު ތާވަލްގެ ހަތަރު ވަނާގައެވެ. އެއީ އަށް މެޗުން 16 ޕޮއިންޓާއެކުއެވެ. ވުލްވްސް އޮތީ ރެލިގޭޝަން ޒޯންގައެވެ.