ކަނޑު އަޑީގެ ދިރާސާ: ތިން ސަތޭކަ އަކަކިލޯމީޓަރުގެ ސަރަހައްދެއް ސަރވޭގައި މެޕްކޮށްފި
ސަރވޭގައި ދިވެހި މެރިން ސައިންޓިސްޓުންނާއި ބައިނަލްއަގުވާމީ ސައިންޓިސްޓުންނާއި އިންޑިއާ ކަނޑުގެ ސައިންޓިސްޓުން ހިމެނޭ
ކަނޑު އަޑީގެ ދިރާސާ
ނެކްޓަން މޯލްޑިވްސްއިން ރާއްޖޭގެ ކަނޑުތައް ދިރާސާކުރުމަށްޓަކައި ހެދި ސާރވޭގެ މަސައްކަތް ނިންމާލައި، ހޯމަ ދުވަހު މައުލޫމާތު ހާމަކުރަން ނިންމައިފިއެވެ.
ނެކްޓަންއިން ކުރިއަށް ގެންދިޔަ ސަރވޭއާ ގުޅޭގޮތުން ނޫސްވެރިންނަށް މައުލޫމާތުދިނުމަށް ރައީސް އޮފީހުގައި ބޭއްވި ބައްދަލުވުމުގައި ފިޝަރީޒް މިނިސްޓަރު ޑރ. ހުސައިން ރަޝީދު ހަސަންއާއި ނެކްޓަންގެ ސީއީއޯ އޮލިވާ ސްޓީޑްސްގެ އިތުރުން އިނގިރޭސި ހައި ކޮމިޝަނަރު ކެރަން ރޮސްލާވެސް ބައިވެރިވެވަޑައިގެންނެވިއެވެ.
ނެކްޓަން މިޝަންގެ ތެރެއިން މާލެ އަތޮޅުން ފެށިގެން އައްޑު އަތޮޅުގެ ދެކުނު ބިތާ ހަމައަށް ސަރވޭކޮށްފައިވާއިރު، އެ މަސައްކަތުގެ ތެރެއިން ޗާޓުކުރި ކަނޑު އަޑީގެ ސަރަހައްދު 300 އަކަކިލޯމީޓަރަށްވުރެ ބޮޑުކަމަށާއި، އެއީ ރާއްޖޭގެ ހިކިފަސް ބިމަށްވުރެ ބޮޑު ސަރަހައްދެއް ކަމަށްވެސް މިނިސްޓަރު ވިދާޅުވިއެވެ.
ސަރވޭގައި ދިވެހި މެރިން ސައިންޓިސްޓުންނާއި ބައިނަލްއަގުވާމީ ސައިންޓިސްޓުންނާއި އިންޑިއާ ކަނޑުގެ ސައިންޓިސްޓުން ހިމެނޭ ކަމަށާއި، ދިރާސާގެ ސަބަބުން ރާއްޖޭގައި މެރިން ސައިންސް ކުރިއެރުވުމަށް މަގުފަހިވެގެންދާނެ ކަމަށްވެސް ވިދާޅުވިއެވެ.
ސައިންޓިސްޓުންނާ ގުޅުންތައް ބަދަހިވެ، ރިސަރޗް މަސައްކަތް ކުރުމަށް ކުރިއަށް އޮތްތަނުގައި ފަސޭހަވާނެކަން ފާހަގަކުރައްވައި މިނިސްޓަރ ވިދާޅުވީ، އިނގިރޭސިވިލާތުގައި އެ މައުލޫމާތު ދިރާސާކުރާއިރު، އެކަމުގައި ދިވެހި ސައިންޓިސްޓުންނަށް އިސްކަން ދެވޭނެ ގޮތެއް ހޯދުމަށް މިހާރު މަޝްވަރާ ކުރަމުންދާ ކަމަށެވެ.
މި ބައްދަލުވުމުގައި ނެކްޓަންގެ ސީއީއޯ އޮލިވާ ސްޓީޑްސް ވިދާޅުވިގޮތުގައި މި މަސައްކަތް ފަށާފައިވަނީ، ބަޔޮލޮޖިކަލް ޑޭޓާތަކަކީ ރާއްޖެއަށް މިލްކުވެރިކަން ލިބޭނެ އެއްޗެއްގެ ގޮތުގައި އެއްބަސްވެގެން ކަމަށާއި، ދިރާސާގެ ހުރިހާ މަރުހަލާއެއްވެސް ރާއްޖެއާ ގުޅިގެން ހިންގަން އެއްބަސްވެވިގެން ކަމަށެވެ.
ދިވެހި ސަރުކާރާއި އިނގިރޭސިވިލާތުގެ މެރިން ރިސަރޗް ފައުންޑޭޝަން (ނެކްޓަން)އާ ގުޅިގެން "އާރްވީ އޮޑެސީ" ކިޔާ ބޯޓެއްގައި، ކަނޑަށް ފައްތާ ސަބްމާސިބަލްގައި ސައިންޓިސްޓުން ރާއްޖޭގެ ކަނޑުތަކުގެ ފުނަށް ގެންގޮސްގެން އެ ސަރވޭ ހަދަން ފެށީ ސެޕްޓެމްބަރު މަހުގެ ކުރީކޮޅެވެ. އެ މަސައްކަތް ފެށީ، މުޅިން އަންހެނުން ހިމެނޭ އެކުއާނޮޓުންގެ ޓީމަކާއެކު، ލ. އަތޮޅު ބޭރަށް ސަބްމާސިބަލްގައި ކުރި ދަތުރަކާއެކުއެވެ.
މިއީ ރާއްޖޭގައި މިހާތަނަށް ކުރި ކަނޑުގެ އެންމެ ބޮޑު ދިރާސާއެވެ. މި ދިރާސާގައި މޫސުމަށް އަންނަ ބަދަލުގެ ސަބަބުން ދިވެހިރާއްޖެއަށް ލިބިދޭ ގެއްލުން ކުޑަކުރާނެ ގޮތްތައް ދެނެގަނެ، ދިރާސާއިން ލިބޭ މައުލޫމާތު ސައިންސްވެރިންނާއި ޕޮލިސީ މޭކަރުންނާ ހިއްސާކުރުމަށް ވަނީ ހަމަޖެހިފައެވެ.
މި ދިރާސާގައި ކަނޑުގެ އެންމެ މަތީ ފަށަލައިން ފެށިގެން 1000 މީޓަރާ ހަމައަށް ސަރވޭ ކޮށްފައިވެއެވެ. މި ދިރާސާގައި ކަނޑަށް ފޭބި އެންމެ ފުރަތަމަ ޓީމުގައި ދިވެހި ދެ އަންހެނުން ހިމެނެއެވެ. އެއީ މޯލްޑިވްސް މެރިން ރިސާޗް އިންސްޓިޓިއުޓްގެ ޑިރެކްޓަރު ޖެނެރަލް ޝާފިޔާ ނައީމްއާއި ނެކްޓަން މޯލްޑިވްސްގެ ރިސާޗު އެސިސްޓެންޓް، ފަރާހް އަމްޖަދުއެވެ.
މި މިޝަންގެ ސަބަބުން ދެމެހެއްޓެނިވި ގޮތަކަށް ރާއްޖޭގެ އިގުތިސާދާއި އާމްދަނީ ލިބޭނެ ގޮތްތައް ފުޅާކުރުމާއެކު، ކަނޑުތަކުގެ ވިލުންތެރިކަން އިތުރުކުރުމަށް ބޭނުންވާ މެރިން ޕްރޮޓެކްޓެޑް އޭރިއާތައް ގާއިމުކުރުމަށް ބޭނުންވާ މައުލޫމާތު ލިބިގެންދާނެކަމަށް ރައީސް ވަނީ މީގެ ކުރިން ވިދާޅުވެފައެވެ.
