އެމްޕީއެލް އިން ދަނީ ރޯދަމަހަށް ވާން ޖެހޭ ތައްޔާރީތައް ވަމުން: މަސީހު
ރަމަޟާން މަހުގެ ކުރިން ޖާގަ އިތުރުކޮށް ވަސީލަތްތައް އިތުރުކުރާނެ
އެމްޕީއެލްގެ ޗީފް އޮޕަރޭޓިން އޮފިސަރ މުހައްމަދު މަސީހު
މޯލްޑިވްސް ޕޯޓްސް ލިމިޓެޑް އެމްޕީއެލް އިން ދަނީ ރޯދަމަހަށް ވާން ޖެހޭ ތައްޔާރީތައް ވަމުން ކަމަށް އެ ކުންފުނިން ބުނފިއެވެ.
އެމްޕީއެލް އިން ބޭއްވި ނޫސްވެރިންގެ ބައްދަލުވުމެއްގައި އެމްޕީއެލްގެ ޗީފް އޮޕަރޭޓިން އޮފިސަރ މުހައްމަދު މަސީހު ވިދާޅުވީ ކުރީ އަހަރުތަކާއި އަޅާ ބަލާއިރު އެމްޕީއެލް ބަނދަރުން މުދާ ކްލިއަރކުރާ މިންވަރު ވަރަށް ބޮޑުތަނުން އިތުރުވެފައިވާ ކަމަށާއި ޕޯޓަށް އަންނަ ބޯޓުތަކުގެ އަދަދުވެސް ވަރަށް ބޮޑަށް އިތުރުވެފައިވާ ކަމަށެވެ. އެގޮތުން ކާބޯތަކެތި ހިފައިގެން އަންނަ ބޯޓުތަކުގެ އަދަދުވެސް އިތުރުވެފައި ވާއިރު ވީހާވެސް އަވަހަށް މުދާ ބޭލުމުގެ އިންތިޒާމް ހަމަޖެެއްސުމަށް ކެނޑިނޭޅި މަސައްކަތްކުރަމުންދާ ކަމަށް އޭނާ ވަނީ ވިދާޅުވެފައެވެ. އެގޮތުން މިހާރު އެންމެ ބޮޑަށް ދިމާވާ އެއް ދަތިކަމަކީ ޖާގައިގެ ދަތިކަންކަމަށާއި އެ މައްސަލަ ހައްލުކުރަން މަސައްކަތް ކުރަމުންދާ ކަމަށް އޭނާ ވަނީ ވިދާޅުވެފައެވެ. ބޯޓު ބަނދަރުގައި ހޭދަކުރާ ވަގުތު ކުޑަކޮށް ގިނަ ވެގެން 5-6 ދުވަހުގެ ތެރޭގައި ބޯޓު ހުސްކުރެވޭތޯ ބަލާކަމަށް އޭނާ ވިދާޅުވިއެވެ. އެއް ފަހަރާ އެތަނުގައި ގެންގުޅެވެނީ 4000 އެއްހާ ކޮންޓެއިނަރ ކަމަށް ވީ ނަމަވެސް ޕޯޓަށް އަންނަ ބޯޓުތަކުގެ އަދަދު އެއަށް ވުރެ އިތުރުވެފައިވާ ކަމަށް އޭނާ ވިދާޅުވިއެވެ.
މުދަލެއް ނުބޭލިގެން މިހާރު ޝަކުވާ އެއް ދިމާނުވާ ކަމަށާއި ރަމަޟާން މަހަށް ފޯކްލިފްޓާއި ޕެލެޓް ގެނެސް ރަމަޟާން މަހު ކާބޯތަކެތި ފޯރުކޮށްދިނުމަށް އެމްޕީއެލް އިން ވާން ޖެހޭ ތައްޔާރީތައް ވަމުންދާ ކަަމަށް އޭނާ ވިދާޅުވިއެވެ. އަދި ރަމަޟާން މަހުގެ ކުރިން ޖާގަ އިތުރުކޮށް ވަސީލަތްތައް އިތުރުކުރާނެ ކަމަށް ވެސް އޭނާ ވިދާޅުވިއެވެ.
މިއަހަރުގެ 3 ވަނަ ކުއާޓަރު ނުވަތަ ޖުލައިން އޮގަސްޓަށް ހިނގި މުއްދަތުގައި އެމްޕީއެލްއަށް ކްލިއަރކުރި މުދަލުގެ މިންވަރު ވަަރަށް ބޮޑަށް އިތުރުވެފައިވާކަމަށްށާއި މާލޭގެ ވިޔަފާރި ބަނދަރުތަކުން މިހާރު އެވްރެޖްކޮށް ކޮންމެ ދުވަހަކު 300 ކޮންޓެއިނަރުގެ މުދާ ކްލިއަރ ކުރެވޭކަމަށް އެމްޕީއެލް އިން ބުނެއެވެ. މާލެއާއި ހުޅުމާލޭގެ ކްލިއަރިން އޮޕަރޭޝްނަތަކާ އަޅާ ކިޔާއިރު 2021 ވަނަ އަހަރު އެވްރެޖްކޮށް ދުވާލަކުު 200 ކޮންޓެއިނަރ ކްލިއަރކުރެވުނުނަމަވެސް، މިހާރު އެވްރެޖްކޮށް ދުވާލަކު 300 ކޮންޓެއިނަރ ކްލިއަރކޮށްފައިވާ ކަމަށް އެ ކުންފުނިން ބުނެއެވެ.
