ރާއްޖެއާއި ކަޒަކިސްތާނާ ދެމެދު ވައިގެ ދަތުރުފަތުރާ ގުޅޭ އެއްބަސްވުމެއްގައި ސޮއިކޮށްފި
5 އޮކްޓޯބަރު 2022 | ބުދަ 01:53މި އެއްބަސްވުމުގެ ދަށުން ދެ ޤައުމުން ވައިގެ ދަތުރުފަތުރުގެ ދާއިރާއިން ގުޅުން ބަދަހިކޮށް އެއްބާރުލުން ދޭނެ
ރާއްޖެއާއި ކަޒަކިސްތާނާ ދެމެދު އެއްބަސްވުމުގައި ސޮއިކުރަނީ
ރާއްޖެއާއި ކަޒަކިސްތާނާ ދެމެދު ވައިގެ ދަތުރުފަތުރާ ގުޅޭ އެއްބަސްވުމެއްގައި ސޮއިކޮށްފިއެވެ.
ދެ ގައުމުގެ ދެމެދުގައި މި އެއްބަސްވުމެއްގައި ސޮއިކުރީ ކެނެޑާގެ މޮންޓްރިއާލްގައި ކުރިއަށްދާ އިކާއޯގެ 41 ވަނަ ޖެނެރަލް އެސެމްބްލީގެ ހަވާސާގައެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާއެވެ. ކަޒަކިސްތާންގެ ފަރާތުން ސޮއި ކުރެއްވީ އެ ގައުމުގެ ޓްރާންސްޕޯޓް މިނިސްޓަރެވެ.
ޓްރާންސްޕޯޓް މިނިސްޓްރީން ބުނީ މިފަދަ އެއްބަސްވުމެއްގައި ސޮއިކުރީ ދެ ގައުމުގެ ދެމެދުގައި ވައިގެ ދަތުރުފަތުރުތައް ފެށުމަށާއި ވައިގެ ދަތުރުފަތުރުގެ ދާއިރާއިން ގުޅުން ބަދަހިކޮށް އެއްބާރުލުން ހޯދުމުގެ ބޭނުމުގައި ކަމަށެވެ.
ވައިގެ ދަތުރުފަތުރާ ގުޅޭ އެއްބަސްވުމެއްގައި ރާއްޖެއާއި ކަޒަކިސްތާނާ ދެމެދު ސޮއިކޮށްފައިވާއިރު މިދިޔަ ސެޕްޓެމްބަރު މަހުގެ 14 ވަނަ ދުވަހުން ފެށިގެން ވިސާއާ ނުލައި ރާއްޖެއިން ކަޒަކިސްތާނަށް ދަތުރުކުރެވޭ ގޮތް ވެސް ވަނީ ހަދައިފައެވެ. އެގޮތުން އެ ޤައުމުން މިހާރު ދިވެހިންނަށް 30 ދުވަހުގެ އޮން އެރައިވަލް ވިސާ ދޫކުރާނެއެވެ.
އޮން އެރައިވަލް ވިސާ ދޫކުރި ނަމަވެސް 30 ދުވަހަށް ވުރެ ގިނަ ދުވަހަށް ކަޒަކިސްތާނަށް ދަތުރު ކުރާނަމަ ދުރާލައި ވިސާ ހޯދަން ޖެހޭނެއެވެ.
