މެލޭޝިޔާގައި މިހާރު ކުރިއަށްދާ އަށް ވަނަ ކެރަމް ވޯލްޑް ޗެމްޕިއަންޝިޕްގެ ޓީމު އިވެންޓު ބައިން ރާއްޖެ ސެމީ ފައިނަލަށް ދަތުރުކޮށްފިއެވެ.

ސެމީ ފައިނަލްގެ ޖާގައެއް ރާއްޖެއިން ހޯދީ ގްރޫޕް ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށްގެންނެވެ. ރާއްޖެ ހިމެނުނު ގްރޫޕްގައި އޮތީ، ސިންގަޕޫރު، އިޓަލީ އަދި ނޭޕާލްއެވެ. ޓީމު އިވެންޓުގައި ރާއްޖޭގެ ހިމެނުނު ކުޅުންތެރިންނަކީ އެންމެ ފަހުގެ ޤައުމީ ޗެމްޕިއަން އިސްމާއިލް އަޒްމީންގެ އިތުރުން އާދަމް އަދީލް، މުޙައްމަދު މުންތަސިރު އަދި އިބްރާހިމް ހުޖާންއެވެ.

ގްރޫޕް ސްޓޭޖުގެ ފުރަތަމަ މެޗުގައި ރާއްޖެއިން ނިކުތީ ސިންގަޕޫރާ ދެކޮޅަށެވެ. މި މެޗު ރާއްޖެއިން ކާމިޔާބުކުރީ 2-1 އިންނެވެ. ދެ ވަނަ މެޗު އިޓަލީއާ ދެކޮޅަށް ކުޅުނު އިރު، ގްރޫޕް ސްޓޭޖުގެ ފަހު މެޗުގައި ރާއްޖެއިން ނިކުތީ ނޭޕާލާ ދެކޮޅަށެވެ. މި ދެ މެޗު ވެސް ރާއްޖެއިން ކާމިޔާބުކުރީ 3-0 އިންނެވެ.

ރާއްޖެއިން ވަނީ އެންމެ ފަހުން އޮތް ކެރަމް ވޯލްޑް ޗެމްޕިއަންޝިޕްގައި ވާދަކޮށް ލޯ މެޑަލް ހޯދާފައެވެ.