އަންނަ ޖެނުއަރީ ޓްރާންސްފާގައި ކުލަބު ދޫކޮށްލުމުގެ ފުރުސަތު ކްރިސްޓިއާނޯ ރޮނާލްޑޯ އަށް ދޭން މެންޗެސްޓަރ ޔުނައިޓެޑުން ބޭނުންވާ ކަމަށް މީޑިއާ ރިޕޯޓުތައް ބުނެފިއެވެ.

ދެ ވަނަ ފަހަރަށް ރޮނާލްޑޯ ޔުނައިޓެޑަށް ގުޅުނީ 2021 ވަނަ އަހަރުއެވެ. ނަމަވެސް އެ ކުލަބުގައި ރޮނާލްޑޯ އަށް އޭނާގެ އެންމެ މޮޅު ކުޅުން ދެއްކޭ ގޮތެއް ނުވިއެވެ. އެހެންކަމުން މިދިޔަ ސީޒަންގެ ނިމުމާއެކު ރޮނާލްޑޯ ޔުނައިޓެޑު ދޫކޮށްލަން ނިންމިއެވެ. ނަމަވެސް ޔުނައިޓެޑުން ބޭނުންވީ ރޮނާލްޑޯ ބަހައްޓާށެވެ. ބަދަލުވާނެ ކުލަބެއް ހޯދުމުގައި ދަތިތަކާ ދިމާވެ ރޮނާލްޑޯ އެންމެ ފަހުން ޔުނައިޓެޑުގެ ފަތިތަކުރުން ތަކަށް ވެސް ގުޅުނެވެ.

މި ސީޒަންގައި ރޮނާލްޑޯ ކުޅެފައިވަނީ ވެސް މަދު މެޗެކެވެ. ސީޒަންގެ މިހާތަނަށް ރޮނާލްޑޯ ކުޅެފައިވަނީ އަށް މެޗެވެ. އަށް މެޗުން ރޮނާލްޑޯ އަށް ޖެހުނީ އެންމެ ގޯލެކެވެ. އެންމެ ފަހުން ޔުނައިޓެޑުން މެންޗެސްޓަރ ސިޓީއާ ދެކޮޅަށް ކުޅުނު މެޗުގައި ވެސް ރޮނާލްޑޯ ބޭންދީ ބެންޗުގައެވެ. އެ ޓީމުގެ ކޯޗު އެރިކް ޓެން ހާގް ބުނީ ރޮނާލްޑޯ ބެންޗުގައި ބޭންދީ އޭނާގެ ކެރިއަރަށް ކުރާ އިޙުތިރާމެއްގެ ސަބަބުން ކަމަށެވެ. ނަމަވެސް ބައެއް މީހުން ވަނީ އެކަމާ ގުޅިގެން ޓެން ހާގަށް ފާޑު ވެސް ކިޔައިފައެވެ.

ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން ޔުނައިޓެޑުގެ އިސްވެރިންނާއި، ޓެން ހާގް ބޭނުންވަނީ ރޮނާލްޑޯ ޓީމު ދޫކޮށްލަން ބޭނުންވާނަމަ. ޖެނުއަރީގައި ރޮނާލްޑޯ އަށް އެ ފުރުސަތު ދިނުމަށެވެ. ޔުނައިޓެޑާއެކު ރޮނާލްޑޯ ހަދާފައިވާ އެއްބަސްވުން ހަމަވާނީ މި ސީޒަނަށްފަހުއެވެ. ހިލޭ ޓްރާންސްފާއެއްގައި ރޮނާލްޑޯ ދޫކޮށްލުމުގެ ބަދަލު، ޖެނުއަރީގައި ކުލަބު ދޫކޮށްލުމުގެ ފުރުސަތު ޔުނައޓެޑުން ދޭން އުޅޭ ކަމަށް ރިޕޯޓުގައިވެއެވެ.

ރޮނާލްޑޯ ވަނީ މީގެ ކުރިން 2003 އިން 2009 އަށް ޔުނައިޓެޑަށް ކުޅެދީފައެވެ. އެފަހަރު ރޮނާލްޑޯ ވަނީ ޔުނައިޓެޑަށް ކުޅެދިން 292 މެޗުގައި 118 ލަނޑު ޖަހާފައެވެ.