ވޯލްޑް ޗެމްޕިއަންޝިޕްގައި ވާދަކުރުމަށް ޤައުމީ ކެރަމް ޓީމު މެލޭޝިޔާ އަށް

މިއަހަރު އޮންނަ ކެރަމް ވޯލްޑް ޗެމްޕިއަންޝިޕްގައި ވާދަކުރުމަށް ޤައުމީ ކެރަމް ޓީމު މެލޭޝިޔާ އަށް ގޮސްފިއެވެ.

މި މަހުގެ 3 އިން 7 އަށް މެލޭޝިޔާގެ ލަންކާވީގައި ކުރިއަށްދާ މުބާރާތުގައި ރާއްޖޭގެ އަންހެން ޓީމާއި ފިރިހެން ޓީމު ވާދަކުރާނެއެވެ. ކޮންމެ ޓީމެއްގައި ހިމެނެނީ ފަސް ކުޅުންތެރިންނެވެ. އެއީ މުބާރާތަށް ކުޅުންތެރިން ހޮވުމަށް ކުރިއަށް ގެންދިޔަ ސެލެކްޝަނުން ހޮވުނު ކުޅުންތެރިންނެވެ. ޓީމު މެލޭޝިޔާ އަށް ގޮސްފައިވަނީ ހޮނިހިރު ދުވަހުއެވެ.

ފިރިހެން ޓީމުގައި ހިމެނޭ ކުޅުންތެރިންނަކީ އާދަމް އަދީލް، މުހައްމަދު މުންތަސިރު، އެންމެ ފަހުގެ ގައުމީ ޗެމްޕިއަން އިސްމާއީލް އަޒްމީން، ހުޖާން އަދި ޔަމާން އަބްދުލް ޖަލީލްއެވެ. ގައުމީ އަންހެން ޓީމުގައި ހިމެނޭ ކުޅުންތެރިންނަކީ އެންމެ ފަހުގެ ގައުމީ ޗެމްޕިއަން އާމިނަތު ވިދާދު، އާއިޝަތު ފައިނާޒް، އައިޝަތު ނަހުފާ، އާމިނަތު ވިޝާމާ އަދި ފާތިމަތު ރަޔާނާއެވެ. މުބާރާތުގައި ރާއްޖޭގެ ޓީމަށް އިރުޝާދު ދޭނީ އަލީ ނިޔާޒްއެވެ.

މުބާރާތުގެ ކުރިން ކެރަމް ޓީމުން ވަނީ ޅ.ހިންވަރާއި، މ.މެދުފުށީގައި ތަމްރީނުތަކެއް ވެސް ކުރިއަށް ގެންގޮސްފައެވެ. މުބާރާތަށް ރާއްޖެއިން ޓާގެޓުކޮށްފައިވަނީ ރަން މެޑައްޔަށެވެ. އެންމެ ފަހުން ބޭއްވި ކެރަމް ވޯލްޑް ޗެމްޕިއަންޝިޕްގައި ވާދަކޮށް ރާއްޖޭގެ ދެ ޓީމު ވެސް ވަނީ ލޯ މެޑަލް ހޯދާފައެވެ.

މުބާރާތަށް ޓީމު ފުރުމުގެ ކުރިން ޔޫތު މިނިސްޓަރު އަޙުމަދު މަޚްލޫފް ވަނީ ކުޅުންތެރިންނާ ބައްދަލުކުރައްވައި، ހިތްވަރުދެއްވައި، ކާމިޔާބަށް އެދިފައެވެ.

މުބާރާތުގައި ރާއްޖޭގެ އިތުރުން 18 ޤައުމަކުން ވާދަކުރާނެއެވެ. އެއީ މުބާރާތް ބާއްވާ ޤައުމު މެލޭޝިޔާ، ލަންކާ، އިންޑިއާ، ކޮރެއާ، ޖަޕާން، ޔޫއޭއީ، ބަންގްލަދޭޝް، ޤަތަރު، ޕޮލެންޑު، ނޭޕާލް، ސިންގަޕޫރު، ފްރާންސް، ސްވިޒަލެންޑް، ސާބިއާ، އިނގްލެންޑް، އެމެރިކާ، އިޓަލީ އަދި ޖަރުމަނެވެ. މުބާރާތް ކުރިއަށް ދާނީ ސިންގަލްސް، ޑަބަލަސް، ޓީމު އިވެންޓު އަދި ސްވިސް ލީގު ހިމެނޭ ގޮތަށް ހަތަރު އިވެންޓަކަށެވެ.