މޫސުން ގޯސްވާނެކަމަށް ބެލެވޭތީ ދުރާލައި ތައްޔާރުވުމަށް އިލްތިމާސްކޮށްފި
ފެންބޮޑުވެދާނެކަމަށް ތައްޔާރުވުމާއި، ގެއަށް ފެން ނުވަންނާނޭހެން ފިޔަވަޅުއެޅުމަށް އެދިފައިވޭ
މީގެކުރިން އައްޑޫ ސިޓީއަށް ކުރި ވިއްސާރައިގައި ފެންބޮޑުވެފައި
ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވެ, ކަނޑުތައް ގަދަވެ ބޯކޮށް ވާރޭވެހޭނެކަމަށް، މޫސުމާބެހޭ ގައުމީ އިދާރާއިން ލަފާކޮށްފައިވާތީ، ލިބިދާނެ ގެއްލުމަކުން ސަލާމަތްވުމަށް ދުރާލައި ރައްކާތެރިކަމުގެ ފިޔަވަޅު އެޅުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން އިލްތިމާސްކޮށްފިއެވެ.
އެއިދާރާއިން ވަނީ، އާންމު ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލައި ތައްޔާރުވުމަށް އިލްތިމާސްކޮށްފައެވެ. މިގޮތުން އެޅިދާނެ ބައެއް ފިޔަވަޅުތައް ވަނީ ފާހަގަކޮށްފައެވެ.
އޭގެތެރޭގައި; ވާރޭވެހި ފެންބޮޑުވެދާނެކަމަށް ތައްޔާރުވުމާއި، ގެޔަށް ފެން ނުވަންނާނޭހެން ފިޔަވަޅުއަޅައި ގޭގެ ދޮރުމަތީގައި ވެލިބަސްތާފަދަ ތަކެތި ޖެހުމަށާއި، ގޭތެރޭގައި ފެންބޮޑުވެއްޖެ ހިނދެއްގައި ގެއްލުންވެދާނެފަދަ މުދާ، ފެން ނުޖެހޭ ހިސާބު އުސްތަނަކަށް ބަދަލުކުރުން ހިމެނެއެވެ.
މީގެއިތުރުން ގަދަ ވައިގެ ސަބަބުން ގޭގެ ފުރާޅު އެއްލާލަފާނެކަމަށް ލަފާކުރެވޭނަމަ، ކުރިއާލައި، ވައުފަދަ އެއްޗެއް ބޭނުންކޮށްގެން ފުރާޅު އެއްލާނުލާނެފަދަ ގޮތަކަށް ހައްޔަރުކުރުމާއި، ބޭނުންނުކުރާނަމަ ކަރަންޓުން ބޭނުންކުރާ ތަކެތި ނިއްވާލާފައި ބެހެއްޓުމަށްވެސް އިލްތިމާސްކޮށްފައިވެއެވެ.
މޫސުމާބެހޭ ގައުމީ އިދާރާއިން ބުނެފައިވަނީ ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް 5 ދުވަހު ވައިގަދަވުމާއެކު ކަނޑުތައް ވަރަށް ބޮޑަށް ގަދަވާނެކަމަށް ލަފާކުރެވޭކަމަށެވެ.
