އަމީނީ މަގުން ގަސް ކެނޑުން ހުއްޓުވައިދޭން އެދި ރައީސް ނަޝީދު ކޯޓަށް
ރައީސް ނަޝީދުގެ ފަރާތުން މި މައްސަލަ ކޯޓަށް ހުށަހަޅަނީ ޝުނާނާ އެންޑް ކޯ އެލްއެލްޕީ އިން
އަމީނީ މަގުގައި ހުރި ގަސްތަކެއް ނަގަނީ
އަމީނީ މަގުގައި ހުރި ގަސްތައް ކަނޑާތީ އެކަން ހުއްޓުވުމުގެ އަމުރަކަށް އެދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ކޯޓަށް ހުށަހަޅުއްވަން ނިންމަވައިފިއެވެ.
އެމަނިކުފާނު އެފަދަ އަމުރަކަށް އެދިވަޑައިގަންނަވަން ކޯޓަށް މައްސަލަ ހުށަހަޅުއްވަން ނިންމަވާފައިވާކަން ހާމަކޮށްފައިވަނީ ލޯ ފާމެއް ކަމަށްވާ ޝުނާނާ އެންޑް ކޯ އެލްއެލްޕީންނެވެ. އެ ލޯ ފާމުން ކުރި ޓްވީޓެއްގައި ބުނެފައިވަނީ ރައީސް ނަޝީދުގެ އެދިވަޑައިގަތުމަކަަށް ބުރާސްފަތި ދުވަހު ކޯޓަށް މައްސަލަ ހުށަހަޅާނެ ކަމަށެވެ.
މި މައްސަލަ ހުށަހަޅަން ނިންމާފައިވަނީ އަމީނީ މަގުގައި ހުރި ގަސްތައް ކެނޑުމުގެ ސަބަބުން ތިމާވެއްޓަށް ބޮޑު ގެއްލުމެއް ލިބޭނެތީ ކަމަށާއި އެގޮތުން ގަސްތައް ކެނޑުން ހުއްޓުވުމުގެ އަމުރަކަށް އެދޭނެ ކަމަށް އެ ލޯ ފާމުން ވަނީ ބުނެފައެވެ.
އަމީނީ މަގުގެ ގަސްތައް ކަނޑާތީ ރައީސް ނަޝީދު ވަނީ މަޖިލީހުގައި ވެސް ކަންބޮޑުވުން ފާޅު ކުރައްވާފައެވެ. އެމަނިކުފާނު ވިދާޅުވި ގޮތުގައި އަމީނީ މަގުގައި އިންދާފައި ހުރި ބޮޑެތި ގަސްތައް ނުނަގައި އެ މަގު ހެދޭނެ ގޮތްތައް ހޯދަންޖެހެއެވެ. އަދި ގަހެއް ހެދުމަށް 15-20 އަހަރު ނަގާއިރު މަގުތައް ހަދާއިރު ގަސްތައް ބަހައްޓައިގެން އެކަން ކުރެވޭނެ ގޮތެއް ހޯދަން ޖެހޭ ކަމަށް ވެސް އެމަނިކުފާނު ވަނީ ވިދާޅުވެފައެވެ.
އަމީނީ މަގު ހެދުމުގެ މަޝްރޫއު ކުރިއަށްދާއިރު މިހާރު މަސައްކަތް ކުރަމުން އަންނަ ސަރަހައްދުގައި ހުރި ގަސްތައް ކަނޑާތީ އެ މައްސަލަ މަޖިލީހަށް ވެސް ވަނީ ހުށަހަޅާފައެވެ. މި މައްސަލަ މަޖިލިހަށް ހުށަހެޅުއްވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފުއެވެ.
އެ މައްސަލައިގައި ބުނެފައިވަނީ މަގުތައް ހަދާއިރު މާލެއަކީ "ހިތްފަސޭހަ" ތަނަކަށް ހެދުމުގެ މަހްފޫމާއި ވިސްނުން ނުގެއްލޭ ގޮތަށް އެ މަގުތައް ހަދަން ޖެހޭ ކަމަށެވެ. އަދި ހިޔާ ދޭ ބޮޑެތި ގިނަ ގަސްތައް ކަނޑަމުންދިއުމަކީ އިންތިހާއަށް ކަންބޮޑުވުން ހުރި ކަމެއްކަމަށާއި އެކަމުން އެތައް ސުވާލެއް އުފެދޭ ކަމަށް ވަނީ ބުނެފައެވެ.
އަމީނީމަގު ހަދަން ނުފަށައި ބާކީ އޮތް ބޮޑު ބައި ހަދަން ފެށުމާއެކު އެ ހިސާބުގައި ހުރި އެ ފަދަ ބިޔަ ގަސްތައް ކަނޑާލާނެތޯ ސުވާލު އުފެދޭ ކަމަށް ވެސް އެ މައްސަލައިގައި ވަނީ ބުނެފައެވެ. އަމީނީ މަގުގެ އިތުރުން ވެސް މާލޭގެ އެހެން މަގުތައް ހެދުމުގެ މަސައްކަތް ކުރަން ނިންމާފައިވާއިރު މުޅި މާލެއިން ކިތަށް ގަސް ކަނޑާލަން ޖެހޭނެތޯ އާއި އެ ގަސްތައް ނުކަނޑައި މަގު ނުހެދެނީތޯ ސުވާލު އުފެދޭ ކަމަށް ވެސް ވަނީ ބުނެފައެވެ.
މި މައްސަލައާ ގުޅޭ ގޮތުން އަމީނީ މަގުގެ މަސައްކަތް ކުރަމުން އަންނަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން މީގެ ކުރިން ބުނެފައިވަނީ އެ ކުންފުނިން އަމީނީ މަގުގައި ހުރި ގަސްތައް ނެގުމަށްފަހު ކުޑަގިރި ޕިކްނިކް އައިލެންޑަށް ބަދަލު ކުރުމަށް ނިންމާފައިވާ ކަމަށެވެ. އަދި މަގު ހަދައި ނިމުމުން އެ މަގުގައި ގަސް އިންދެން ހުންނަ ތަންތަނުގައި ގަސްތައް އިންދާނެ ކަމަށް ވެސް ވަނީ ބުނެފައެވެ.
