މެރިޓައިމް ސޭފްޓީ ދުވަހާ ގުޅުވައިގެން ހުރިހާ ބަނދަރެއްގެ އުޅަނދުތައް ބަލާފާސްކުރަނީ
މައިގަނޑު ގޮތެއްގައި ފާހަގަކުރެވިފައިވަނީ ބައެއް އުޅަނދު ފަހަރުގައި ލައިފް ޖެކެޓް މަދުވުމާއި، ލައިފް ޖެކެޓްގައި ނަންބަރު ޖަހާފައި ނެތުން ފަދަ ކަންކަން
މެރިޓައިމް ދުވަސް ފާހަގަކުރުމަށްޓަކައި އުޅަނދުތައް ބަލާ ފާސްކުރަނީ
ދުނިޔޭގެ ކަނޑުތަކުގެ ރައްކާތެރިކަން ކަށަވަރުކުރުމުގެ ހަފްތާ ނުވަތަ މެރިޓައިމް ސޭފްޓީ ވީކް ފާހަގަކުރުމަށްޓަކައި ރާއްޖޭގެ ހުރިހާ ބަނދަރެއްގައި ހުރި ހުރިހާ އުޅަނދެއް ބަލައިފާސްކުރުމުގެ ޕްރޮގްރާމެއް ކުރިޔަށް ގެންދާނެކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޓްރާންސްޕޯޓް މިނިސްޓްރީގެ ކަމާބެހޭ ޓީމަކާއި އެމްއެންޑީއެފްގެ ކޯސްޓް ގާޑާއި މެރިން ޕޮލިސް ގުޅިގެން ކުރިޔަށްގެންދާ މިޕްރޮގްރާމްގައި މިހާރު ވަނީ މާލޭގެ ނޯތު ހާބަރުގައި ހުރި ހުރިހާ އުޅަނދެއް ބަލާ ފާސްކޮށްފައެވެ. މިހަރަކާތާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ޓްރާންސްޕޯޓް މިނިސްޓްރީގެ އެސިސްޓެންޓް ޑިރެކްޓަރ ހުސައިން ނަޒީރު ވިދާޅުވީ ދުނިޔޭގެ ކަނޑުތަކުގެ ރައްކާތެރިކަން ކަށަވަރުކުރުމުގެ ދުވަސް ފާހަގަކުރުމުގެ ގޮތުން ކުރިޔަށްގެންދަނީ މެރިޓައިމް ސޭފްޓީ ވީކެއްކަމަށެވެ.
މިގޮތުން ފާއިތުވި ތިން ދުވަހު ނޯތު ހާބަރުގައި ހުރި ހުރިހާ އުޅަނދުތައް ބަލާފާސްކުރިއިރު މައިގަނޑު ގޮތެއްގައި ފާހަގަކުރެވިފައިވަނީ ބައެއް އުޅަނދު ފަހަރުގައި ލައިފް ޖެކެޓް މަދުވުމާއި، ލައިފް ޖެކެޓްގައި ނަންބަރު ޖަހާފައި ނެތުމާއި، ލައިފް ރިންގި ނެތުމާއި ލައިފް ރިންގުގައި ހުންނަންޖެހޭ ވައު ގަނޑުތައް ހަރުކޮށްފައިނެތުން ކަހަލަ ކަންކަމަށެވެ. އެކަންކަން އުޅަނދުފަހަރުގެ ކެޕްޓަނުންނަށް ބުނެދީ އުޅަނދުތަކުގައި އެއްޗެހި ހަމަކުރުމުގެ ކަންކަން ކުރިޔަށްދާކަމަށް ނަޒީރު ވިދާޅުވިއެވެ.
މީގެއިތުރުން ހޯމަ ދުވަހު ކުރިޔަށްގެންދިޔައީ އެއް ނަންބަރު ޖެޓީ ސަރަހައްދުގައި ހުރި އުޅަނދުތައް ފާސްކުރުމުގެ މަސައްކަތްކަމަށް ނަޒީރު ވިދާޅުވިއެވެ. ގިނަ އުޅަނދުފަހަރުގައި ކަންކަން ހުންނަނީ ރަނގަޅަށްކަމަށާއި ނިޔަމި ކަމުގެ ކޯސްތައް ބޯޓުފަހަރުގެ ކެޕްޓަނުންނަށް އަމާޒުކޮށްގެން ހިންގަންފެށިފަހުން ގިނަ ކަންކަމަށް ކެޕްޓަނުން އަހުލުވެރިކަމަށް ނަޒީރު ވިދާޅުވިއެވެ.
މީގެއިތުރުން އުޅަނދު ފަހަރު ދުއްވާ މީހުންނަށާއި ވެރިންނަށް ޚާއްސަކޮށްގެން ސަލާމަތީ ގަވާއިދުގައި ހުރި ކަންތައްތައް ބަޔާންކޮށް މިފަހުން މިނިސްޓްރީން ނެރެފައިވާ ފޮތް ހުރިހާ ކެޕްޓަނުންނަށް ކިޔައިދެމުންދާކަމަށް ނަޒީރު ވިދާޅުވިއެވެ.
ކުރިޔަށް އޮތްތަނުގައި މިޕްރޮގްރާމް ރަށްތަކުގެ ކައުންސިލަރުންނާއި ސިޔާސަތު ހިންގަން ތިބޭ ލެވެލްއަށްވެސް ހިންގާ އެފަރާތްތައް މިކަމަށް ހޭލުންތެރިކުރުވާނެކަމަށް ޓްރާންސްޕޯޓް މިނިސްޓްރީން ބުނެއެވެ.
ދުނިޔޭގެ ކަނޑުތަކުގެ ރައްކާތެރިކަން ކަށަވަރުކުރުމުގެ ދުވަސް އާންމު ގޮތެއްގައި ފާހަގަކުރަމުން އަންނަނީ ސެޕްޓެމްބަރ މަހުގެ ފަހު ހަފުތާގައެވެ.
