ސަރުކާރުގެ ވައުދުތައް ފުއްދުނު މިންވަރާ މެދު ވަޒީރާއި ކުރި ސުވާލުގެ ޖަވާބުދެއްވީ ޤާސިމް!

ރައީސް އިބްރާހިމް މުހައްމަދު ޞާލިހުގެ ސަރުކާރުގެ ވައުދުތައް ފުދުނު މިންވަރާއި މެދު ފިޝަރީޒް މިނިސްޓަރު ޑރ.ހުސެއިން ރަޝީދު ހަސަންއާ މެމްބަރުން ސުވާލުކުރުމުން އެ ސުވާލަށް ޖަވާބު ނުދެވި ވަނިކޮށް، ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ޤާސިމް އިބްރާހިމް އެ ސުވާލަށް ޖަވާބުދެއްވައިފިއެވެ.

ފިޝަރީޒް މިނިސްޓަރު މަޖިލީހަށް ހާޒިރުކުރުމަށް ފަހު އިތުރު ސުވާލުކުރަން ލިބުނު ފުރުސަތުގައި ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު، އަބްދުﷲ ރިޔާޒް (ސީޕީ ރިޔާޒް) ވަނީ މި ސަރުކާރުގެ ވައުދުތަކުގެ ކިހާ އިންސައްތައެއް ފުއްދިއްޖެތޯ ސުވާލުކުރައްވާފައެވެ. އެ ސުވާލުގެ ޖަވާބުގައި މިނިސްޓަރު ވިދާޅުވީ އެމަނިކުފާނަކީ ހަމައެކަނި މަސްވެރިކަމާއި އެގްރިކަލްޗަރާއި ގުޅުން ހުރި ކަންކަން ބަލަހައްޓަވާ ވަޒީރަށް ވުމުން، މުޅި ސަރުކާރަށް ވައުދު ފުއްދުނު އިންސައްތަ ވިދާޅުވާން އެނގިވަޑައިނުގަންނަވާ ކަމަށެވެ. އެކަމާއި ގުޅިގެން މެމްބަރުން ވަނީ ނިޒާމީ ނުކުތާ ނަންގަވައިގެން މިނިސްޓަރަށް ސަރުކާރުގެ ވައުދުތައް ވެސް އެނގިވަޑައިނުގަންނަވާ ކަަމަށް ވިދާޅުވެ މިނިސްޓަރަށް ފާޑު ވިދާޅުވެފައެވެ. އަދި ރިޔާޒް ވަނީ އޭނާ ސުވާލު ކުރެއްވީ މަސްވެރިކަމުގެ ދާއިރާއިން ވައުދު ފުއްދުނު މިންވަރާ ގުޅިގެން ކަމަށް ވިދާޅުވެފައެވެ. އެ ހިސާބުން ނިޒާމީ ނުކުތާއެއް ނެންގެވުމަށް ފަހު، ގާސިމް ވިދާޅުވީ ސަރުކާރުން ވީ ވައުދުގެ 99 އިންސައްތަ ފުއްދިފައިވާ ކަމަށް ޔަގީންކުރައްވާކަމަށެވެ.

Advertisement

ގާސިމް އެފަދައިން ވިދާޅުވުމުން މެމްބަރުން ވަނީ އެކަމަށް ފާޑު ވިދާޅުވެފައެވެ. އަދި މަޖިލީހުގެ ތަޅުމުގައި ބައެއް މެމްބަރުން އަޑު ގަދަ ކުރައްވަން ފެއްޓެވުމުން މަޖިލީސް ކުރިއަށް ގެންދަން އުނދަނގޫވެ، ވަޒީރަށް ފުރުސަތު ދިނުމަށް މަޖިލީހުގެ ރައީސް ނަޝީދު ވަނީ ތަކުރާރުކޮށް މެމްބަރުންނަށް ނަސޭހަތްތެރިވެވަޑައިގަންނަވާފައެވެ. ފިޝަރީޒް މިނިސްޓަރު ވިދާޅުވީ އެމަނިކުފާނު މަޖިލީހަށް ވަޑައިގަތީ ވައުދު ފުއްދުނު މިންވަރުގެ ހިސާބު ހިއްޕަވައިގެން ނޫން ކަމަށާއި، އެ މައުލޫމާތު ޔަގީން ނުކުރައްވާ މައުލޫމާތު ދެއްވައިފި ނަމަ އެ ކަމާ މެދު އެމަނިކުފާނު ކުށްވެރި ވާނެތީ އެ މައުލޫމާތު ސާފުނުކުރައްވާ ޖަވާބުދެއްވަން ބޭނުންވެވަޑައިނުގަންނަވާ ކަމަށެވެ.