ޑެންމާކު އަތުން ބަލިވެ ފްރާންސްއަށް ނުތަނަވަސްކަން
ޑެންމާކުގެ ޕާކެން ސްޓޭޑިއަމްގައި ކުޅުނު މެޗު އެ ޤައުމުން ކާމިޔާބުކުރީ 0-2 އިން
ފްރާންސް އިން ޑެންމާކާ ދެކޮޅަށް ކުޅުނު މެޗުގެ ތެރެއިން
ޔުއެފާ ނޭޝަންސް ލީގުގައި ޑެންމާކުން ފްރާންސް ބަލިކޮށްފިއެވެ.
ޑެންމާކުގެ ޕާކެން ސްޓޭޑިއަމްގައި ކުޅުނު ފުޓުބޯޅަ މެޗު އެ ޤައުމުން ކާމިޔާބުކުރީ 0-2 އިންނެވެ. ނޭޝަންސް ލީގުގެ ގްރޫޕް އޭގައި މިހާތަނަށް ކުޅުނު ހަ މެޗުން ފްރާންސް މޮޅުވެފައިވަނީ އެންމެ މެޗަކުންނެވެ. ދެ މެޗުން އެ ޤައުމު އެއްވަރުވެފައިވާއިރު، ތިން މެޗުން ވަނީ ބަލިވެފައެވެ.
ޑެންމާކާ ދެކޮޅަށް ވެސް ފްރާންސް އިން ވަނީ ވަރުގަދަ ޓީމެއް ނެރެފައެވެ. އެ ޓީމުގެ ތަރި ކީލިއަމް އެމްބާޕޭގެ އިތުރުން އެންޓޮއިން ގްރީޒްމަން، ޖިރޫޑް، ކަމަވިންގާ، ފާލެންޑް މެންޑީ ފަދަ މުހިންމު ކުޅުންތެރިން ވަނީ ކުޅެފައެވެ. މެޗުގައި ޑެންމާކުން ދެ ލަނޑު ވެސް ޖެހީ ފުރަތަަމަ ހާފުގެ ފަހު 15 މިނެޓުގެ ތެރޭގައެވެ. ޑެންމާކުގެ ފުރަތަމަ ލަނޑު ކެސްޕާ ޑޮލްބާގް ޖެހީ 34 ވަނަ މިނެޓުގައެވެ. އޭގެ ފަސް މިނެޓު ފަހުން ޑެންމާކުގެ ދެ ވަނަ ލަނޑު ޖެހީ އެންޑްރީސް އޮލްސެންއެވެ.
މި މޮޅާއެކު ޑެންމާކު އޮތީ ގްރޫޕްގެ ދެ ވަަނައިގައެވެ. ފްރާންސް އޮތީ ގްރޫޕްގެ ތިން ވަނަ މަގާމުގައެވެ.
