މިހާރު ހައިކޯޓުން ނިންމާ މައްސަލަތަކުގެ ފެންވަރު ރަނގަޅުވެފައިވާ ކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ވާހަކަދައްކަވަމުން ޝަމީމް ވިދާޅުވީ އެމަނިކުފާނު ޕްރޮސެކިއުޓަރ ޖެނެރަލް (ޕީޖީ)ގެ މަޤާމާއި ހަވާލު ވުމަށް ފަހު ބައެއް ޕޮލިސީތަކަށް ބަަދަލުގެންނަވާފައިވާ ކަމަށެވެ. އޭގެ ތެރެެއިން އެއް ކަމަކީ ހައިކޯޓުގައި މައްސަލަތައް އިސްތިއުނާފްކުރަމުން އައި އުސޫލު ކަމަށް އޭނާ ވިދާޅުވިއެވެ. އެގޮތުން ކުރިން އަމަލުކުރަމުން އައި ގޮތަކީ ކިތަންމެ ކުޑަ މައްސަލައެއް ވިޔަސް ދަށުކޯޓު މަރުހަލާގައި ސާބިތު ނުވެއްޖެ ނަމަ އެ މައްސަލަ އެއް ހައިކޯޓުގައި އިސްތިއުނާފް ކުރުން ކަމަށް ޝަމީމް ވިދާޅުވިއެވެ.
ނަމަވެސް މިހާރު މައްސަލަތައް އިސްތިއުނާފްކުރަނީ އެ މައްސަލައެއްގައި ފާހަގަކުރެވޭ ޤާނޫނީ ނުކުތާތަކެއް ހުރި ނަމަ އެކަމަކަށް ބެލުމަށް ފަހުގައި ކަމަށް ވެސް ޝަމީމް ވިދާޅުވިއެވެ. އަދި ކުރިން އިސްތިއުނާފްކުރަން ފޮނުވާފައި ހުރި މައްސަލަތައް އަނބުރާ ގެނެސްފައި ވެސް ހުންނާނެ ކަމަށް ޝަމީމް ވިދާޅުވިއެވެ.
މިހާރު ހައިކޯޓަށް ފޮނުވާ މައްސަލަތަކަކީ އޭގައި ޤާނޫނީ ނުކުތާތަކެއް ހުރުމުން ފޮނުވާ މައްސަލަތަކެއް ކަަމަށާއި، ކޮންމެ ކޮންމެ މައްސަލަ އެއް އިސްތިއުނާފްކުރަން ނުފޮނުވާނެކަން ހައިކޯޓަށް ވެސް މިހާރު އެނގޭ ކަމަށް ޝަމީމް ވިދާޅުވިއެވެ. ކުދި މައްސަލަތަކުގައި ހައިކޯޓާާއި ޕީޖީގެ ވަގުތު ހޭދަކުރުމުގެ ބަދަލުގައި ސީރިއަސް މައްސަލަތަކަށް ވަގުތު ހުސްކުރާ ކަމަށް ވެސް އޭނާ ވަނީ ފާހަގަކުރައްވާފައެވެ. އަދި މި ބަދަލުގެ ނަތީޖާ ވަރަށް ރަނގަޅު ކަމަށްވެސް ޝަމީމް ވަނީ ވިދާލުވެފައެވެ.
