މާތްﷲ އަށް ވަކީލު ކުރުމުގެ އެންމެ ފުރިހަމަ ގޮތަކީ ރައްކާތެރިކަމުގެ ސަބަބުތަކުގައި ހިފުން: ޚުތުބާ
23 ސެޕްޓެމްބަރު 2022 | ހުކުރު 08:07ރައްކާތެރިކަމުގެ ފިޔަވަޅުތައް އަޅާނެ ގޮތް ދަރިންނަށް ދަސްކޮށްދޭން ޖެހޭ
މިސްކިތުގައި ބަޔަކު ހުކުރު ޚުތުބާ އަޑު އަހަނީ
މާތްﷲ އަށް ވަކީލު ކުރުމުގެ އެންމެ ފުރިހަމަ ގޮތަކީ ސަލާމަތުގެ ސަބަބުތަކުގައި ހިފުން ކަމަށް ހުކުރު ޚުތުބާގައި ބުނެފިއެވެ.
"ރައްކާތެރިކަމުގެ ފިޔަވަޅުތައް ހަރުދަނާ ކުރުން" މި މައުޟޫގެ ދަށުން ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނެފައިވަނީ އިސްލާމް ދީނުގައި އިންސާނާގެ ހަޔާތަށް ހާއްސަ ސަމާލުކަމެއް ދެއްވާފައިވާ ކަމަށެވެ. އެގޮތުން ޝަރީއަތުގެ އެންމެހައި ހުކުމްތައް ބިނާވެފައިވާނީ އިންސާނާގެ މަސްލަހަތުތައް ރައްކާތެރިކޮށް، ނަފުސު ހިމާޔަތްކޮށް، ދެ ދުނިޔޭގެ ރައްކާތެރިކަމާ ބާއްޖަވެރިކަމުގެ މައްޗަށް ކަމަށް ވަނީ ބުނެފައެވެ.
ކާއިނާތުގައި ހިނގާ ކޮންމެ ކަމެއް ހިނގަނީ މާތްﷲ ގެ ކުޅަދުންވަންތަކަމާއި އެ ކަލާންގެ އިރާދަ ކުރެއްވި ގޮތަކަށް ކަން ފާހަގަކޮށް ޚުތުބާގައި ބުނެފައިވަނީ އެ ޙަގީގަތާއެކުގައި ވެސް ސަލަމާތުގެ ސަބަބުތަކުގައި ހިފުމަށް އިސްލާމް ދީނުގައި އަމުރު ކުރައްވާފައިވާ ކަމަށެވެ. އަދި އެ ސަބަބުތަކުގައި ހިފުމަކީ ޤަޟާ ޤަދަރަށް އީމާންވުމާ ފުށުއަރާ ކަމެއް ނޫން ކަމަށާއި އެއީ ޤަޟާ ޤަދަރަށް ފުރިހަމައަށް އީމާންވުމުގެ ތެރެއިންވާ ކަމެއް ކަމަށް ވެސް ވަނީ ބުނެފައެވެ. މާތްﷲ އަށް ވަކީލު ކުރުމުގެ އެންމެ ފުރިހަމަ ގޮތަކީ ވެސް އެ ސަބަބުތަކުގައި ހިފުން ކަމަށް ވެސް ޚުތުބާގައި ބުނެފައިވެއެވެ.
ސަލާމަތުގެ ސަބަބުތަކުގައި ހިފުމުގެ މުހިންމުކަން ފާހަގަކޮށް ޚުތުބާގައި ބުނެފައިވަނީ އެ ސަބަބުތަކާ މެދު ވަރަށް ގިނަ ބަޔަކު އިހުމާލުވެފައިވާ ކަމަށެވެ. އެގޮތުން ގޯތިގެދޮރު އިމާރާތް ކުރުމުގައި ފަރުވާކުޑަކުރާކަން ފާހަގަކުރެވޭ ކަމަށާއި އޭގެ ސަބަބުން މީހުންގެ ފުރާނައާއި ތަކެއްޗަށް ގެއްލުން ލިބި ހިތާމަވެރި ހާދިސާތައް ހިނގާކަން ވަނީ ފާހަގަކޮށްފައެވެ.
ކަނޑުދަތުރު ކުރާ ފަރާތްތަކުން ވެސް ރައްކާތެރިކަމުގެ ފިޔަވަޅުތައް އަޅަން ޖެހޭ ކަމަށާއި މޫދަށް އެރި އުޅުމުގައްޔާއި މަގުމަތީގައި ދުއްވާއިރު ރައްކާތެރިވުމަށާއި ގަވާއިދާ އެއްގޮތަށް އަމަލު ކުރުމަށް ވެސް ޚުތުބާގައި ވަނީ ބުނެފައެވެ. ގަވާއިދާ ޚިލާފަށް ދުއްވުން ފަދަ ކަމެއްގައި މީހަކު މަރުވެއްޖެ ނަމަ އޭނާގެ މަރުގައި އޭނާ އަމިއްލައަށް ބައިވެރިފަދަ ކަމަށް ސައުދީގެ ކުރީގެ މުފްތީ އިބުނު ބާޒު ރަހިމަހުﷲ އާ ހަވާލާދީ ޚުތުބާގައި ވަނީ ބުނެފައެވެ.
މީގެ އިތުރުން މަގުމަތީގައި ހިނގާ މީހުންނަށާއި ދުއްވާ އެއްޗެއްސަށް ގެއްލުންވާގޮތަށް ހުންނަ ތަކެތި އެއްފަރާތްކޮށް މަގުމަތި ސާފު ކުރުމަކީ ވެސް ރައްކާތެރިކަމުގެ ގޮތުން އަޅަން ޖެހޭ ފިޔަވަޅެއް ކަން ޚުތުބާގައި ވަނީ ފާހަގަކޮށްފައެވެ.
ކުއްލި ހާދިސާތަކާއި މުސީބާތްތައް ކުރިމަތިވެދާނެކަން ދަނެ، އެފަދަ ކަންކަމުން ރައްކާތެރިވެތިބުމަށް ދަރިންނަށް ދަސްކޮށްދީ އެކުދިންގެ ނަފުސު އެކަމަށް ހާނުވަން ޖެހޭ ކަމަށް ވެސް ޚުތުބާގައި ބުނެފައިވެއެވެ. އެގޮތުން، ގެއާއި ގެއިން ބޭރުގައި އެފަދަ ކަމެއް ދިމާވެއްޖެނަމަ ރައްކާތެރިކަމުގެ ފިޔަވަޅު އަޅާނެ ގޮތް އުނގަންނައިދީ، ސްކޫލްތަކުގައި އެފަދަ ކަންކަމަށް ތަމްރީން ޕްރޮގްރާމް ބާއްވަން ޖެހޭ ކަމަަށް ޚުތުބާގައި ވަނީ ބުނެފައެވެ.
