ޖަލުތަކާއި ޕެރޯލް ޤާނޫނުގެ ފައިނަލް ޑްރާފްޓް އަންނަ މަހު ނިމިގެންދާނެ: އިމްރާން
23 ސެޕްޓެމްބަރު 2022 | ހުކުރު 06:29ޖަލުތަކާއި ޕެރޯލް ޤާނޫނުގެ ފައިނަލް ޑްރާފްޓް އަންނަ މަހު ނިމިއްޖެނަމަ ޖަލުތަކާއި ޕެރޯލްގެ އައު ޤާނޫނު އަންނަ އަހަރުގެ ފުރަތަމަ ދައުރުގައި މަޖިލީހާއި ހިއްސާ ކުރެވޭނެ
ހޯމް މިނިސްޓަރު އިމްރާން އަބްދުﷲ
ޖަލުތަކާއި ޕެރޯލް ޤާނޫނުގެ ފައިނަލް ޑްރާފްޓް އަންނަ މަހު ނިމިގެންދާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ގައި ވާހަކަފުޅު ދައްކަވަމުން މިނިސްޓަރު އިމްރާން ވިދާޅުވީ މި ސަރުކާރު އައުމަށްފަހު ޖަލުތަކުގެ ހާލަތު ރަނގަޅުކުރުން ވަރަށް ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން ޖަލުތަކުގެ އޮޑިޓެއް ހަދާފައިވާއިރު ވަރަށް ބޮޑަށް ޑޮކިއުމަންޓެއް ތައްޔާރުކޮށްފައިވާ ކަމަށެވެ.
އޭގެތެރެއިން 270 ރިކޮމަންޑޭޝަންތައް ލިބިފައިވާއިރު މިހާރު އަމަލު ނުކުރެވި ހުރި ރިކޮމަންޑޭޝަންތަކަކީ ޤާނޫނަށް ބަދަލު ގެންނަންޖެހޭ ނުވަތަ ބަޖެޓުން ބޮޑު ހޭދައެއް ކުރަން ޖެހޭ ކަމެއް ކަމަށް ވެސް ވިދާޅުވިއެވެ.
ޤާނޫނަށް ގެންނަންޖެހޭ ބަދަލުތަކުގެ ތެރެއިން ޖަލުތަކާއި ޕެރޯލް ޤާނޫނު އެކުލަވާލުމަށް މިދިޔަ އަހަރުން ފެށިގެން މަސައްކަތް ކުރަމުންދާކަން ފާހަގަކުރައްވާ އިމްރާން ވިދާޅުވީ ޤާނޫނުގެ ދެވަނަ ޑްރާފްޓް ނިންމާ ފައިނަލް ޑްރާފްޓްގެ ތައްޔާރުކުރުމަށް ކޮންމެ ހަފްތާއަކު ފަސްގަޑިއިރާއި ހަ ގަޑީއިރުގެ މުއްދަތެއް ލީގަލް ޓީމާއެކު ހޭދަކުރައްވާ ކަމަށެވެ.
އިމްރާން ވިދާޅުވީ ޖަލުތަކާއި ޕެރޯލް ޤާނޫނުގެ ފައިނަލް ޑްރާފްޓް އަންނަ މަހު ނިމިއްޖެނަމަ ޖަލުތަކާއި ޕެރޯލްގެ އައު ޤާނޫނު އަންނަ އަހަރުގެ ފުރަތަމަ ދައުރުގައި މަޖިލީހާ ހިއްސާ ކުރައްވާނެ ކަމަށެވެ.
ޖަލުތައް އޮޑިޓް ކުރުމަށް އެކުލަވައިލި ކޮމިޝަނުން ތައްޔާރުކުރި ދިވެހިރާއްޖޭގެ ޖަލުތަކުގެ އޮޑިޓް ރިޕޯރޓް އާންމުކޮށްފައިވަނީ 2019 ވަނަ އަހަރުގައެވެ.
ޖަލުތަކުގައި ހުރި މައްސަލަތަކާއި، ހޯދުނު ހޯދުންތައް ތަފްޞީލްކޮށް ރިޕޯޓްގައި ވަނީ ބަޔާންކޮށްފައެވެ. އެގޮތުން ޖަލުތަކުގައި މީހުން ބޭތިއްބުމަށް ކަނޑައަޅާފައިވާ އަދަދަށް ވުރެ އިތުރަށް މީހުން ބަންދުގައި ބޭތިއްބުމާއި، އިންސާނީ އަދި އެހެނިހެން ވަޞީލަތްތައް އެކަށީގެންވާ ވަރަށް ނެތުމާއި، މަސްތުވާތަކެތީގެ މައްސަލަތަކުގައި ބަންދުކޮށްފައި ތިބި ޒުވާނުންގެ އަދަދު ގިނަކަމާއި، މަސްތުވާތަކެތީގެ ޤާނޫނަށް ބަދަލުގެނެވިފައި ވީނަމަވެސް ކުރީގެ ހަރުކަށި ޤާނޫނޫ ދަށުން 25 އަހަރަށް އަދިވެސް މީހުން ޖަލަށް ލާފައި ބައިތިއްބުމާއި، މުއްދަތެއް ނެތް ގޮތަށް ތަފާތު މައްސަލަތަކުގައި ދިވެހިންނާއި، ބިދޭސީން ރިމާންޑް ޖަލުގައި ބައިތިއްބާފައިވާކަން ފާހަގަކޮށްފައި ވެއެވެ.
ރިޕޯޓްގައި ފާހަގަ ކޮށްފައިވާ ގޮތުން ޖަލުގެ ކެޕޭސިޓީއަށް ވުރެ އިތުރަށް މީހުން ބައިތިއްބާފައިވަނީ މާލެ އާއި މާފުށި ޖަލުގައެވެ.
ރިޕޯޓުގައި ހުށައެޅުންތަކުގެ ތެރެއިން އެންމެ ގިނަ ހުށައެޅުންތައް ރައްދުވަނީ މޯލްޑިވްސް ކަރެކްޝަނަލް ސަރވިސްއަށެވެ. އެއީ ހުށައެޅުންތަކުގެ %64 އެވެ. މޯލްޑިވްސް ޕޮލިސް ސަރވިސްއާ ގުޅުންހުރި %26 އިންސައްތަ ހުށައެޅުން އަދި މިނިސްޓްރީ އޮފް ހޯމް އެފެއާޒާ ގުޅުން ހުރި %5 ހުށައެޅުމާއި، އިންސްޕެކްޓަރ އޮފް ކަރެކްޝަނަލް ސަރވިސްއާ ގުޅުންހުރި %3 ހުށައެޅުން ރިޕޯޓުގައި ހިމަނާފައިވެއެވެ.
ޤާނޫނާއި ޤަވާއިދުތަކާ ހިލާފް މައްސަލަތަކާއި، ޢާއްމު މައްސަލަތަކާއި، ކޮރަޕްޝަންގެ ތުހުމަތު ކުރެވޭ މައްސަލަތަކާއި، އަނިޔާގެ އަމަލުތައް ހިންގުމުގެ މައްސަލަތައް ވެސް ރިޕޯޓުގައި ހިމަނާފައިވެއެވެ.
