މުބާރާތުގެ ކުރިން ޤައުމީ ކެރަމް ޓީމު މެދުފުށީގައި ތަމްރީނު ކުރަނީ

އަންނަ މަހު މެލޭޝިޔާގައި އޮންނަ ކެރަމް ވޯލްޑް ޗެމްޕިއަންޝިޕްގައި ވާދަކުރާ ދިވެހި ޓީމުން މެދުފުށި ރިސޯޓުގައި ތަމްރީނުތައް ކުރިއަށް ގެންދަން ފަށައިފިއެވެ.

ކެރަމް އެސޯސިއޭޝަނުން މައުލޫމާތުދޭ ގޮތުގައި ކެރަމް ޓީމު މެދުފުއްޓަށް ގޮސްފައިވަނީ ހޯމަ ދުވަހުގެ ވަގުތެއްގައެވެ. އެއީ މުބާރާތުގެ ކުރިން ޓީމުގެ ފަރިތަކުރުންތަކެއް ކުރިއަށް ގެންދިޔުމަށެވެ. އަދި މީގެ ބޭނުމަކީ ޓީމުގެ ކުޅުންތެރިންގެ ފޯމް ހިފެހެއްޓުމާއި، ތަފާތު މާހައުލަކަށް ހޭނުން ކަމަށް އެ އެސޯސިއޭޝަނުން މައުލޫމާތުދެއެވެ.

މުބާރާތުގައި ރާއްޖޭގެ ފިރިހެން ޓީމަކާއި އަންހެން ޓީމެއް ވާދަކުރާނެއެވެ. ކޮންމެ ޓީމެއްގައި ވެސް ހިމެނެނީ ފަސް ކުޅުންތެރިންނެވެ. ފިރިހެން ޓީމުގައި ހިމެނޭ ކުޅުންތެރިންނަކީ އާދަމް އަދީލް، މުހައްމަދު މުންތަސިރު، އެންމެ ފަހުގެ ގައުމީ ޗެމްޕިއަން އިސްމާއީލް އަޒްމީން، ހުޖާން އަދި ޔަމާން އަބްދުލް ޖަލީލްއެވެ. ގައުމީ އަންހެން ޓީމުގައި ހިމެނޭ ކުޅުންތެރިންނަކީ އެންމެ ފަހުގެ ގައުމީ ޗެމްޕިއަން އާމިނަތު ވިދާދު، އާއިޝަތު ފައިނާޒް، އައިޝަތު ނަހުފާ، އާމިނަތު ވިޝާމާ އަދި ފާތިމަތު ރަޔާނާއެވެ.

މީގެ ކުރިން ވެސް ޤައުމީ ކެރަމް ޓީމުން ވަނީ ޅ.ހިންނަވަރުގައި ޓްރެއިނިން ކޭމްޕެއް ކުރިއަށް ގެންގޮސްފައެވެ. ރާއްޖެއިން މި އަހަރުގެ މުބާރާތަށް ޓާގެޓު ކުރަނީ ރިހި ނުވަތަ ރަން މެޑައްޔަށެވެ. ކެރަމް ޓީމުގެ ކޯޗު އަލީ ނިޔާޒް ބުނި ގޮތުގައި މިއަހަރުގެ މުބާރާތުގައި ދެ ޓީމު ވެސް ފައިނަލްގައި ވާދަކުރާނެ ކަމުގެ އުންމީދު ބޮޑު ކަމަށެވެ. ރާއްޖެއިން ވަނީ އެންމެ ފަހުން ބޭއްވި ވޯލްޑް ޗެމްޕިއަންޝިޕްގައި ދެ ކެޓަގަރީން ވެސް ތިން ވަނަ ހާސިލްކޮށްފައެވެ.

މި ފަރިތަކުރުންތަކަށްފަހު ކެރަމް ޓީމު އެނބުރި މާލެ އަންނާނީ މި މަހުގެ 28 ވަނަ ދުވަހުއެވެ. އެއަށްފަހު މުބާރާތުގައި ވާދަކުރުމަށް މެލޭޝިޔާއަށް ފުރުމަށް ހަމަޖެހިފައިވަނީ އޮކްޓޫބަރު މަހުގެ އެއް ވަނަ ދުވަހުއެވެ. މިއަހަރުގެ ވޯލްޑް ޗެމްޕިއަންޝިޕް ކުރިއަށް ދާނީ އަންނަ މަހުގެ 3 ވަނަ ދުވަހުން 7 ވަނަ ދުވަހުގެ ނިޔަލަށެވެ.