ރައީސް ކަންކަން ކުރިއަށްގެންދަވަނީ މަޝްވަރާކުރައްވައިގެން: މެމްބަރު ނަޝީދު

ދާއިރާގެ ތަރައްގީގެ ކަންކަން މި ސަރުކާރުން ކުރިއަށްގެންދަނީ ފުރިހަމަ މަޝްވަރާ އާއިއެކުގައި ކަމަށް ނޮޅިވަރަމު ދާއިރާގެ މެމްބަރު މުހައްމަދު ނަޝީދު އަބްދުﷲ ވިދާޅުވެއްޖެއެވެ.

ނަޝީދު މިފަދައިން ވިދާޅުވީ ހދ.ނޮޅިވަރަންފަރުގެ ފެނުގެ ނިޒާމް ނިމުމާއި ގުޅިގެން ބޭއްވި ރަސްމިއްޔާތުގައި ވަހަކަދައްކަވަމުންނެވެ.

ނޮޅިވަރަންފަރުގެ ފެނުގެ ނިޒާމުގެ މަސައްކަތް ފަށާފައި ވަނީ 1 ނޮވެމްބަރު 2018 ގައެވެ. މެމްބަރު ނަޝީދު ވިދާޅުވީ މި މަސައްކަތުގެ ތެރެއިން ކޮވިޑް-19ގެ ހާލަތާވެސް ކުރިމަތިލައި، މި މަސައްކަތް ނިންމާލާފައިވަނީ ވަރަށް ގިނަ ގޮންޖެހުންތަކާއެކުގައި ކަމަށެވެ. އަދި މިއަދު މަސައްކަތް ނިންމާލެވިފައިވަނީ ދަތި އުނދަގުލުގެ ތެރެއިންވެސް މަސައްކަތް ހުއްޓާނުލާ ކުރިއަށްގެންގޮސްފައިވާތީ ކަމުގައި މެމްބަރު ނަޝީދު ފާހަގަކުރެއްވިއެވެ.

މެމްބަރު އިތުރަށް ވަނީ މި ހުރިހާ ކަމެއްގައިވެސް މި ސަރުކާރުން މަޝްވަރާކުރާކަން ފާހަގަކުރައްވާފައެވެ. ވަކިން ޚާއްސަކޮށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކޮންމެ ކަމެއްގައިވެސް މަޝްވަރާކުރައްވާކަމަށް ނަޝީދު ވިދާޅުވިއެވެ. އަދި ކޮންމެ ކަމެއްވެސް ވަރަށް ރަނގަޅަށް ބައްލަވަމުންގެންދަވާކަން މެމްބަރު ފާހަގަކުރެއްވިއެވެ.

މެމްބަރު އިތުރަށް ވިދާޅުވީ ދާދި ފަހުން ކުރިއަށްދިޔަ ވިއަވަތި ކޮންފަރެންސްގެ ތެރެއިންވެސް ދާއިރާއަށް ބޭނުންވާ ވަރަށް ގިނަ ކަންކަން ރައީސުލްޖުމްހޫރިއްޔާއާއި، ކެބިނެޓުގެ މިނިސްޓަރުންނާ ހިއްސާ ކުރައްވާފައި ވާނެކަމަށެވެ. މިގޮތުން އޭޓީއެމްގެ ޚިދުމަތް ނެތުމުން އެތައް ޚަރަދެއް ކޮށް ކުޅުދުއްޓަށް ދާންޖެހުމުން ދިމާވާ ދަތިތަކާއި އަދިވެސް މިނޫން އެތައް ކަމެއް ރައީސްއަށް ދަންނަވާފައިވާނެކަން މެމްބަރު ފާހަގަކުރެއްވިއެވެ.