ރާނީއަށް އެންމެފަހުގެ އިހުތިރާމު އަދާކުރުމަށް ދެ މިލިއަން މީހުން ދާނެ ކަމަށް ލަފާ ކޮށްފި

އަވަހާރަވެފައިވާ އިނގިރޭސިވިލާތުގެ ރާނީ އެލިޒަބަތު ދެ ވަނަ އަށް އެންމެފަހުގެ އިހުތިރާމު އަދާކުރުމަށް ދެ މިލިއަން މީހުން ދާނެ ކަމަށް ލަފާކޮށްފިއެވެ.

ރާނީއަށް އެންމެފަހުގެ އިހުތިރާމު އަދާކުރުމަށް އެތައް ލައްކަ ބަޔަކު ލަންޑަންގެ މަގުތައް މަތީގައި ބުރާސްފަތި ދުވަހުން ފެށިގެން ވަނީ ކިޔޫތައް ދަމާލާފައެވެ. ރާނީގެ ހަށިކޮޅު ބާއްވާފައިވާ ވެސްޓްމިންސްޓަރއަށް ވަނުމަށްޓަކައި 10 މޭލަށް ކިޔުތަށް ދަމާލާފައިވެއެވެ. ރާނީގެ ޖަނާޒާގެ ކަންކަން އަންނަ ހޯމަ ދުވަހު ބާއްވަންދެން ހަށިކޮޅު އޮންނާނީ ވެސްޓްމިންސްޓަރގައެވެ.

ރާނީގެހަށިކޮޅު ބާއްވާފައިވާ ވެސްޓްމިންސްޓަރގައި ސެކިއުރިޓީ ކަންތައްތައް ބެލެހެއްޓުމަށްޓަކައި އެތައް ހާސް އޮފިސަރުން ހަރަކާތްތެރިވަމުންދާއިރު، ރާނީގެ ހަށިކޮޅު ކައިރީގައިވެސް އެއްހާސް އޮފިސަރުން ތިބެއެވެ.

މީގެއިތުރުން ވެސްޓްމިންސްޓަރއަށް ޖަމާވެފައިވާ މީހުންގެ ކަންތައްތައް ބެލެހެއްޓުމަށް 1500ށްވުރެން ގިނަ ސިފައިން ހަރަކާތްތެރިވަމުންދެއެވެ.

އިނގިރޭސިވިލާތުގެ ކައުންޓަރ ޓެރަރިޒަމްގެ ކުރީގެ ކޯޓިނޭޓަރ ނިކް އެލްޑްވޯތު ބީބީސީއަށް ދެއްވި އިންޓަވިއުއެއްގައި ވިދާޅުވީ، އެ ގައުމުގައި ތުރެޓް ލެވެލް ހުރި ގޮތަށް ބަލާއިރު، ޓެރަރިސްޓް ހަމަލާއެއް ދިނުމުގެ ފުރުސަތު އެބައޮތްކަމަށެވެ. އަދި މިފަދަ ބޮޑު އެއްވުންތަކުގައި އެފަދަ މީހުން ހަރަކާތްތެރިވާނެކަން އެނގޭކަމަށާއި، އެހެންކަމުން ސެކިއުރިޓީގެ ބެލެހެއްޓުމުގެ ކަންތައްތައް އެ ގައުމުން ވަރުގަދަކޮށްފައިވާކަމަށެވެ.

ރާނީގެ ޖަނާޒާގައި ބައިވެރިވެވަޑައިގެންނެވުމަށް ލަންޑަނަށް ވަޑައިގަންނަވާ އެކި ގައުމުތަކުގެ އިއްޒަތްތެރިން ޕްރައިވެޓް ބޯޓުތަކުގައި ވަޑައިނުގަތުމަށާއި، ކޮމަރޝަލް ފްލައިޓުތަކުގައި ވަޑައިގެންނެވުމަށް ލަންޑަންގެ ކަމާބެހޭ ފަރާތްތަކުން ވަނީ އިރުޝާދުއަރުވާފައެވެ.

ސެޕްޓެމްބަރު 19 ވަނަ ދުވަހު އޮންނަ ޖަނާޒާގައި ބައިވެރިވެ ވަޑައިގެންނެވުމަށް ވަރަށް ގިނަ އަދަދެއްގެ ގައުމުތަކުގެ ރައީސުންނާއި ރަސްރަސްކަލުންނާއި ރާނީންނާއި ބޮޑުވަޒީރުން އަދި އެފެންވަރުގެ އެހެން ބޭފުޅުން ވަޑައިގަންނަވާނެކަމަށް ބެލެވޭއިރު، އެބޭފުޅުންގެ ދަތުރުފުޅުތައް ގެންގުޅުއްވާނެ ގޮތުގެ ތަފްސީލް ވަނީ ލަންޑަންގެ ރަސްމީ އިދާރާތަކުން ހާމަކޮށްފައެވެ. އޭގައިވާގޮތުން ލަންޑަން އެއާޕޯޓަށް ވަޑައިގެންނެވުމަށްފަހުވެސް، ޖަނާޒާގެ ކަންކަން ކުރިއަށްދާ ވެސްމިނިސްޓަރ އެބީއަށް ވަޑައިގަތުމަށްވެސް ގިނަ ބޭފުޅުން އެކުގައި ގެންދެވޭނެ ބަހެއް ނެންގެވުމަށް އިރުޝާދު އަރުވާފައިވެއެވެ.

އަދި ބޭރު ގައުމުތަކުން ވަޑައިގަންނަވާ ހުރިހާ ބޭފުޅުންވެސް ލަސްވެގެން ޖަނާޒާގެ އެއްދުވަސް ކުރިން ވަޑައިގެންނެވުމަށް ދަންނަވާފައިވެއެވެ. ހީތުރޯ އެއާޕޯޓްގައި ޕްރައިވެޓް ބޯޓުތައް ޖެއްސުމުގެ ޚިދުމަތާއި ބޯޓު ޕާކުކޮށްފައި ބެހެއްޓުމުގެ ޚިދުމަތް ނުދެވޭނެކަމަށްވެސް އަންގާފައިވެއެވެ. އެހެންކަމުން ކޮމަރޝަލް ފްލައިޓްތަކުގައި ވަޑައިގަތުމަށް ދަތިފުޅުވާ ބޭފުޅުން ހީތުރޯ ފިޔަވައި އެހެން އެއާޕޯޓްތައް ބޭނުންކުރެއްވުމަށް ވެސް ދަންނަވާފައިވެއެވެ. މިއާއެކުވެސް ހެލިކޮޕްޓަރު ބޭނުންކުރެއްވުމުގެ ހުއްދަ ލިބިވަޑައިނުގަންނަވާނެކަން ފާހަގަކޮށްފައިވެއެވެ.

އަދި ބޭރުގެ ލީޑަރުން ވަޑައިގަންނަވާއިރުއާއި ފުރާވަޑައިގަންނަވާއިރު އެއާޕޯޓްގައި އެއްވެސް ގައުމެއްގެ ދިދަ ނުއުފުލޭނެ ކަމަށްވެސް އަންގާފައިވެއެވެ.

އެހާ ގިނަ އަދަދެއްގެ އެންމެ މަތީ ފެންވަރުގެ އިއްޒަތްތެރިންގެ ދަތުރުގެ ކަންކަން ބެލެހެއްޓުމުގައި ހުންނާނެ ދަތިތައް ފާހަގަކުރަމުން ޕޮލިޓިކޯގެ އޮފިޝަލުން ވަނީ، ބޭރުގެ ވަފްދުތައް ވީހާވެސް ކުޑަކުރުމަށް ވިދާޅުވެފައެވެ.

މިގޮތުން ވެރިންގެ އަނބިކަނބަލުން ނުވަތަ ފިރިކަލުންގެ އިތުރުން އާއިލާގެ އެހެން އެއްވެސް ބޭފުޅަކު ނުވަތަ ސްޓާފުން ނުހިމެނުއްވުމަށް ވެސް ގައުމުތަކަށް އިރުޝާދު ދީފައިވާކަމަށްވެއެވެ. މިގޮތަށް ވަފުދުތައް ކުޑަކޮށްލަން ޖެހެނީ ޖަނާޒާ ބާއްވާތަނާ އަދި އެއަށްފަހު ބާއްވާ އިހްތިފާލުތައް ބާއްވާ ތަންތަނުގެ ޖާގައިގެ ދަތިކަން ހުންނާނެތީ ކަމަށް ރަސްމީ ލިއުމުގައި ބުނެފައިވެއެވެ. ވަޑައިގަންނަވާ ހުރިހާ ބޭފުޅުން ޕްރައިވެޓް ކާރުތަކުގައި ގެންގުޅުއްވުމަކީ ލަންޑަންގެ މަގުތަކާ ޓްރެފިކްވެސް ތަންދޭނެ ކަމެއް ނޫންކަން ފާހަގަކުރަމުން އެފަރާތުން ބުނެފައިވަނީ އިއްޒަތްތެރިން އެކިތަންތަނަށް ގެންދެވޭނީ ހުރިހާ ބޭފުޅުން ސެންޓްރަލް އެސެމްބްލީ ޕޮއިންޓްތަކަކަށް އެއްކުރެވި އެތަންތަނުން ޚާއްސަ ބަސްތަކެއްގައި ކަމަށެވެ. 

އެންމެމަތީ ފެންވަރުގައި ބޭއްވޭ ޖަނާޒާގެ ކަންކަމަށްފަހު ވަޑައިގެންނެވި އިއްޒަތްތެރިންގެ ޝަރަފުގައި ފޮރިން ސެކްރެޓަރީ ޖޭމްސް ކްލެވަރލީ އަރުވާ ޚާއްސަ ރިސެޕްޝަނެއް ބާއްވާނެއެވެ.