ހދ.ނޮޅިވަރަންފަރުގެ ފެނުގެ ނިޒާމް އިފްތިތާހުކޮށްފިއެވެ.

މަޝްރޫއު ހިންގާފައިވަނީ ގްރީން ކްލައިމެޓް ފަންޑް ހިލޭ އެހީ އާއި ސަރުކާރާއި ޔޫ.އެން.ޑީ.ޕީގެ އެހީތެރިކަމާއެކު އެވެ. އަދި ޢަމަލީ މަސައްކަތް ކުރީ އެންވަޔަރަންމަންޓް މިނިސްޓްރީ އިން ކެނޭޑިއަން ކްރިސްޓަލައިން ވޯޓަރ އިންޑިއާ ލިމިޓެޑް އާ ހަވާލުކޮށްގެންނެވެ. ނޮޅިވަރަންފަރުގައި ޤާއިމުކޮށްފައިވާ މިނިޒާމުން 45 ޓަނުގެ 2 ޕްލާންޓުން ދުވާލަކު 90 ކިއުބިކް މީޓަރުގެ ފެން އުފެއްދުމުގެ ޤާބިލްކަން ލިބިފައިވެއެވެ. މި ޕްލާންޓްތަކުން އުފައްދާ ފެން ރައްކާކުރުމަށް 300 ޓަނުގެ ތާނގީއެއް ބެހެއްޓިފައިވެއެވެ. އަދި 16.7 ކިލޯމީޓަރ ދިގުމިނުގެ ފެންވިއުގައެއް މި މަޝްރޫޢުގެ ދަށުން ޤާއިމްކުރެވިފައިވެއެވެ.

މިމަޝްރޫޢު އިފްތިތާހްކޮށް ދެއްވީ އެންވަޔަރަންމަންޓް މިނިސްޓަރު އައިމިނަތު ޝައުނާއެވެ. މޫސުމަށް އަންނަ ބަދަލުގެ ސަބަބުން ރަށްރަށުގެ ފެނަށް ޖެހުމުގެ މައްސަލަ ދިމާވާ ކަމަށާއި، އަދި މި މަޝްރޫޢު އަކީ އެކަމަށް ހައްލެއް ކަމަށް މިނިސްޓަރު ވިދާޅުވިއެވެ.

ނޮޅިވަރަންފަރުގައި ފެނުގެ ނިޒާމް ޤާއިމްކުރުމަށް ޖުމްލަ 36,321,012.36 (ތިރީސް ހަ މިލިއަން ތިން ސަތޭކަ އެކާވީސް ހާސް ބާރަ ރުފިޔާ ތިރީސް ހަ ލާރި) ޚަރަދުކުރެވިފައިވެއެވެ.

ނޮޅިވަރަންފަރުގެ ފެނުގެ ނިޒާމުގެ މަސައްކަތް ފަށާފައި ވަނީ 1 ނޮވެމްބަރު 2018 ގައެވެ. މިމަޝްރޫޢު ނިމިފައި ވަނީ 07 ފެބްރުވަރީ 2022 ގައެވެ.