އިނގިރޭސި ރާނީ އެލިޒަބަތު ދެވަނަ އަވަހާރަވުމާގުޅިގެން ރާނީގެ ދޮށީ ދަރިކަލުން ޗާލްސްގެ މައްޗަށް ވަނީ ރަސްކަން އޮޓޮމެޓިކުން ބަދަލުވެފައެވެ. މިހާރުގެ ޗާލްސް ރަސްގެފާނަކީ އެގައުމުގެ ތިންވަނަ ޗާލްސް ރަސްގެފާނެވެ.

ރާނީ އަވަހާރަވުމާގުޅިގެން އިނގިރޭސި ވެރިކަމުގެ ނިޒާމަށް އައި، ނުވަތަ ގެނެވުނު ހަމައެކަނި ބަދަލަކީ މިއީއެއްނޫނެވެ. ވަގުތުން ގެންނަން ފެށުނު މުހިންމު ބަދަލުތަކުގެތެރޭގައި ގައުމީ ސަލާމް ބަދަލުކުރުން، ފައިސާގެ ގޮތުގައި ބޭނުންކުރާ ނޫޓާއި ލާރިފޮތި ބަދަލުކުރުން، ޕާސްޕޯޓް ބަދަލުކުރުން، އަދި ސްޓޭމްޕް ބަދަލުކުރުން ހިމެނެއެވެ.

އިނގިރޭސި ވިލާތުގައި ދައުރުވާ 29 ބިލިއަން ކޮއިން ނުވަތަ ފައިސާފޮތިވެސް ހެދިފައި ވަނީ ރާނީގެ ތަސްވީރުފުޅު ހިމަނައިގެންނެވެ. އެންމެ ފަހުން ފައިސާ ޖަހާފައިވަނީ 2015 ވަނަ އަހަރުއެވެ. އޭރު ރާނީގެ އުމުރުފުޅުން 88 އަހަރުފުޅެވެ. އެއީ އެލިޒަބަތުގެ ރަނިކަމުގައި ފައިސާފޮތި ޖެހުނު ފަސްވަނަ ފަހަރެވެ.

އައު ރަސްގެފާނު ޗާލްސްގެ ތަސްވީރުފުޅުޖެހި ފައިސާފޮތި އުފައްދާނެކަން އެއީ ޔަގީންކަމެކެވެ. ނަމަވެސް އައު ފައިސާ ބޭނުންކުރަން ފަށާނީ ކޮންއިރަކުންކަމެއް، ކަމާބެހޭ އިދާރާތަކުން އަދި ހާމައެއްނުކުރެއެވެ. ގަބޫލުކުރެވޭގޮތުގައި ރާނީގެ ސޫރަފުޅުޖެހި ފައިސާފޮތި އަދިވެސް ގިނަ އަހަރުތަކެއްވަންދެން ބޭނުންކުރެވޭނެއެވެ. ބަދަލު ގެނެވޭނީ މަޑުމަޑުންކަމަށް ރިޕޯޓްތައް ބުނެއެވެ.

އައު ފައިސާ ފޮތީގެ ޑިޒައިން އަދި ނޭނގުނުނަމަވެސް އެނގޭ އެކައްޗެއް އެބައޮތެވެ. ރަސްގެފާނުގެ ފޮޓޯފުޅު ޖަހާނީ ރާނީ އިންނަވާ ފަރާތް ނޫން އަނެއް ފަރާތަށެވެ. އެހެނީ އިނގިރޭސިވިލާތުގެ އުސޫލުތައް ބުނާގޮތުން ރަސްކަމުގެ ކޮންމެ ދައުރެއްގައިވެސް މި ބަދަލު ގެންނަންޖެހެއެވެ.

1967 ވަނަ އަހަރުން ފެށިގެން އިނގިރޭސިވިލާތުގެ ރޯޔަލް މެއިލުން ނެރުނު ކޮންމެ ސްޓޭމްޕަކީވެސް ރާނީގެ ފޮޓޯފުޅު ހިމަނައިގެން ހެދި ސްޓޭމްޕްތަކެވެ. ނަމަވެސް ދެން ރާނީގެ ފޮޓޯފުޅު ޖަހައިގެން ސްޓޭމްޕެއް ނުހަދާނެއެވެ. ދެން ހަދާނީ ރަސްގެފާނު ޗާލްސްގެ ފޮޓޯފުޅު ޖެހި ސްޓޭމްޕެވެ.

ބަދަލުކުރަންޖެހެނީ ހަމައެކަނި ފައިސާއާއި ސްޓޭމްޕް އަދި ރަސްމީ ތައްގަނޑެއްނޫނެވެ. އިނގިރޭސި ޕާސްޕޯޓްވެސް ބަދަލުކުރަންޖެހެއެވެ. ކުރިން ޕާސްޕޯޓް ހަދަމުން އައީ ރާނީއަށް ނިސްބަތްކޮށް، އަދި ރާނީއަށް އެރުވޭ ޝަރަފެއްގެގޮތުގައެވެ. "އިން ދަ ނޭމް އޮފް ދަ ކުއީން" މިހެން ކިޔާފައެވެ. މިހާރު ހުރި ޕާސްޕޯޓްތައް އަދި އޮތީ ބޭނުންކުރެވޭގޮތަށް ނަމަވެސް އަލަށް ހެދޭ ޕާސްޕޯޓްތައް ދެން ހަދާނީ "ހިޒް މެޖެސްޓީ" ނުވަތަ ރަސްގެފާނުގެ ނަންފުޅުންނެވެ.

ގައުމީ ސަލާމުގައި ހިމެނޭ ތަންކޮޅެއް ކަމަށްވާ "ގޯޑް ސޭވް ދަ ކުއީން" ބަދަލުކޮށް "ގޯޑް ސޭވް ދަ ކިންގް" ހިމަނައިގެން ގައުމީސަލާމަށްވެސް ބަދަލުގެނެވޭނެއެވެ.

ރާނީ އެލިޒަބަތު އަވަހާރަވެފައިވަނީ ބަލްމޯރަލްގައި ހުންނަ ޝާހީ ގަނޑުވަރުގައި މިދިޔަ ބުރާސްފަތި ދުވަހުއެވެ. އެދުވަހުން ފެށިގެން ތިން ދުވަހު ހަށިކޮޅު ބަލްމޯރަލްގައި ބޭއްވުމަށްފަހު މިއަދު ވަނީ ދިގު ކާރު ދަތުރަކަށްފަހު އެޑިންގބަރގްއަށް ގެންގޮސްފައެވެ. ހައެއްކަ ކާރުގެ ކޮންވޯއީއެއްގައި ސަންދޯއްޕުޅު ގެންދެވުނު މަގުގެ ދެފަރާތަށް އެތައްހާސް ބަޔަކު ނުކުމެ ތިބެ ރާނީއަށް އެންމެ ފަހުގެ އިހުތިރާމް އަދާކޮށްފައިވެއެވެ.

ރާނީގެ ޖަނާޒާ އޮންނާނީ މިމަހުގެ 19 ވަނަ ދުވަހު ކަމަށް ބަކިންގހަމް ޕެލަސްއިން ވަނީ އިއުލާންކޮށްފައެވެ،