މާލީގެ ރިސޯޓަކަށް ދިން ހަމަލާއެއްގައި ދެ މީހުން މަރާލައިފި

މާލީގެ މަޝްހޫރު ލަގްޒަރީ ރިސޯޓެއްކަމަށްވާ ކެމްޕްމެންޓް ކަގަބާ އަށް ދިން ހަމަލާއެއްގައި ދެ މީހުން މަރާލައިފި އެވެ.

އޭއެފްޕީއަށް ދިން އިންޓަވިއުއެއްގައި މާލީގެ ސެކިއުރިޓީ މިނިސްޓަރ ސާލިފް ޓޯރޭ ވިދާޅުވީ، ކެމްޕްމެންޓް ކަގަބާ ރިސޯޓަށް ދިން ހަމަލާއަކީ ޓެރެރިސްޓް ހަމަލާއެއް ކަމަށާއި، ހަމަލާގައި ދެ މީހުން މަރުވެފައިވާ ކަމަށެވެ.

ސާލިފް ވިދާޅުވީ، މި ހަމަލާ ދީފައިވަނީ އެންމެ މީހެއް ކަމަށާއި، އޭނާ ބައެއް ގޮވާތަކެތީގެ އިތުރުން މެޝިން ގަންއެއް ބޭނުންކޮށްފައިވާ ކަމަށެވެ. އެގޮތުން މި ހަމަލާގެ ޝިކާރައަކަށްވި ޓޫރިސްޓަކު ޒަހަމްތަކާއެކު ސަލާމަތްވެފައިވާކަމަށްވެސް އޭނާ ވަނީ ފާހަގަކުރައްވާފައެވެ.

މީގެއިތުރުން މި ހަމަލާގައި އިތުރު ދެމީހަކު ޒަހަމްވިކަމަމަށާއި، އެކަކަކީ ބިދޭސީއެއްކަމަށްވެސް ސާލިފް ވަނީ ވިދާޅުފައެވެ.

ރޮއިޓަރސް އަށް ދިން އިންޓަވިއުއެއްގައި މާލީގެ ސެކިއުރިޓީ މިނިސްޓްރީގެ ސްޕޯކްސް ޕާރސަން ވިދާޅުވީ ރިސޯޓުގައި ތިބި ޖުމްލަ 32 ފަތުރުވެރިންވެސް މިހާރު ސަލާމަތްކުރެވިފައިވާ ކަމަށެވެ.

މަންޒަރު ދުށް ފަރާތްތަކުން ބުނީ މީހުންތައް ސަލާމަތްކުރީ އެތައް އިރެއްގެ ހަމަލާތައް ބަދަލުކުރުމަށްފަހު ކަމަށާއި، މާލީގައި ތިބި ފްރާންސް ސިފައިންގެ އިތުރުން މާލީގެ ފުލުހުންވެސް އެ ސަރަހައްދުގައި ހަރަކާތްތެރިވެފައިވާ ކަމަށެވެ.

މާލީގައި 2015 ވަނަ އަހަރު ހޮޓަލެއްގައި ދިން ހަމަލާއެއްގައި 20 މީހުން ވަނީ މަރާލާފައެވެ. އެފަހަރުވެސް ބަޑިން ބިރު ދައްކާ އެންމެ މީހަކު ވަނީ އެ ހޮޓަލުގައި ތިބި އެތައް މީހުންނެއް ރަހީނުކޮށްފައެވެ.