ގިނަ ދުވަހު ވަޒީފާގައި ތިބި މީހުންނަށް މިހާރު މިހާރު އިމްތިހާނަކުން ހުނަރު ސާބިތުކޮށްދެވޭނެ މަގު ފަހިކޮށްދީފައިވާކަމަށާއި، އެއީ ރަނގަޅު ފުރުސަތެއްކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ޙަސަން ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ގައުމީ ސަނަދު ހާސިލް ކުރާފަރާތްތަކަށް ލައިސަންސް ދިނުމަށް މިނިސްޓްރީ އޮފް ހަޔަރ އެޑިއުކޭޝަނާ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާ ދެމެދު އެއްބަސްވުމެއްގައި ސޮއިކުރެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ނޭޝަނަލް ޓްރެއިޓް ޓެސްޓިންގ އެންޑް ސެޓްފިކޭޝަންގެ ޒަރީއާއިން (އިތުރު ކޯހެއް ހެދުމަކާނުލައި)، ގިނަ ދުވަހު ވަޒީފާގައި ތިބި މީހުންނަށް އިމްތިހާނަކުން ހުނަރު ސާބިތުކޮށްދީ ސެޓްފިކެޓް ހާސިލްކުރުމުގެ ފުރުސަތު އޮތްކަން މިނިސްޓަރ ވަނީ ފާހަގަކުރައްވާފައެވެ.
ދަތުރުފަތުރުގެ ދާއިރާއިން މީހުން ތަމްރީނުކުރުމުން ރާއްޖޭގެ ޒުވާނުންނަށް ވަޒީފާގެ އިތުރު ފުރުސަތުތައް ލިބޭނެ ކަމަށްވެސް މިނިސްޓަރ ވިދާޅުވިއެވެ. މީހުން ބިނާކުރުމަށް ކުރާ މަސައްކަތަށް ލިބުނު ކުރިއެރުމެއްކަން ފާހަގަކުރައްވާފައެވެ. އަދި ސަރުކާރުގެ ވުޒާރާތަކާއެކު މަސައްކަތްކޮށްގެން ފަންނީ ޒުވާނުން ތަމްރީނުކޮށް ވަޒީފާގެ މާހައުލަށް ނެރުމަކީ ސަރުކާރުގެ ވަރަށް ބޮޑު އަމާޒެއްކަމަށާއި، އެ މަސައްކަތްކުރަނީ ފަންނީ މާހިރުންގެ އެހީތެރިކަމާއެކުކަމަށް މިނިސްޓަރ ވިދާޅުވިއެވެ.
މިހާރު އެމްއެންއެސްޑީއޭއިން އެކުލައިލާފައިވާ ޓްރާންސްޕޯޓް ދާއިރާގެ ނޭޝަނަލް ކޮމްޕީޓެންސީ ސްޓޭންޑަރޑްތަކުގެ ތެރެއިން އިތުރު އިމްތިހާނަކާނުލައި ލައިސަންސް ލިބިގެންދާނީ ނޭޝަނަލް ސެޓްފިކެޓް 3 އިން ހެވީ ވެހިކަލް އޮޕަރޭޝަންސް، ނޭޝަނަލް ސެޓްފިކެޓް 3 އިން ބަސް އޮޕަރޭޝަންސް، އަދި ނޭޝަނަލް ސެޓްފިކެޓް 3 އިން ބޯޓް އޮޕަރޭޝަންސް ހާސިލްކޮށްފައިވާ ފަރާތްތަކަށެވެ.
