އެ ޒަމާނަކީ މިހާރުހެން ތަޅާފޮޅައި، ވަޅިޖަހާ ޒަމާނެއް ނޫން
ކ އަތޮޅު ކާށިދޫ
ގޭދޮށުން ފެންނަ އުމުރުން ދުވަސްވީ ދެމަފިރިއެކެވެ. ފެންނަ ފެނުމަށް ހިކުމަތްތެރި، އޯގާތެރި ދެމަފިރިންނެވެ. އަބަދުވެސް ފެންނަނީ ހިނިތުންވެލާފައި ތިއްބައެވެ. ފެނުމުން ގޮވާނުލައި ނުދާނެއެވެ. އެގޮތުގެމަތިން އެކުވެރިކަން އުފެދި، އާއިލާއެއްގެ މެދުގައި އޮންނަކަހަލަ ގާތް ގުޅުމެއް އުފެދިގެން ދިޔައެވެ.
އެ ދެމަފިރިންނާ ދެކެވުނު ވާހަކައިން އެނގުނީ އެ ބޭބެއަކީ ސިފައިންގެއަށް ގިނަ ދުވަސްތަކެއް ވަންދެން ޚިދުމަތްކޮށް، ރިޓަޔަރކޮށްފައިވާ ފަރާތެއްކަމެވެ. 3 ނޮވެމްބަރުގެ ބިރުވެރި ހަނދާންތައްވެސް ގާތުން ދެކެފައިވާ އެ ބޭބެއާ ދެކެވުނު ވާހަކައިން، ބޭބެ ހިއްސާކުރި ވާހަކައަކަށް އަހަރެންގެ ސަމާލުކަން ވަރަށް ބޮޑަށް ހުއްޓިގެންދިޔައެވެ.
ބޭބެ ކިޔައިދިނީ މީގެ ޒަމާންތަކެއް ކުރިން، ކުރީގެ ރައީސް އިބްރާހީމް ނާސިރުގެ ދައުރުގައި ރާއްޖޭގެ ރަށެއްގައި ހިނގައިދިޔަ ކަމެއްގެ ވާހަކައެކެވެ. ކ އަތޮޅު ކާށިދޫގައި ހިނގި މަރުގެ ހާދިސާއެއްގެ ވާހަކަ ބޭބެ ކިޔައިދިނީ ދެންމެ ވީ ކަމެއްހެންނެވެ.
އެ ޒަމާނަކީ މިހާރުހެން ތަޅާފޮޅައި، ވަޅިޖަހާ ޒަމާނެއް ނޫންކަމުން، މުޅި ކާށިދޫވެސް ހިމޭންވިއެވެ. އިރުއޮއްސޭއިރަށް ދޮރުތައް ލައްޕައިގެން މީހުން ތިބެނީ ގޭގައެވެ.
އިބްރާހީމްފުޅު މަރާލީ އޭނާ ނިދާފައި އޮއްވައެވެ. އޭނާއަކީ އެރަށު ގާޒީއެވެ. ރަށުތެރޭގައި ކިޔައިއުޅޭ ގޮތުގައި އިބްރާހީމްފުޅު މާރާލީ އޭނާ ބަލަމުން ދިޔަ މައްސަލައަކާ ގުޅިގެންނާއި، ޒާތީގޮތުން އޮތް ހިތްހަމަނުޖެހުމެއްގެ ސަބަބުންނެވެ.
އެ ވާހަކައަށް އަހަރެންގެ ސަމާލުކަން އެހާ ބޮޑަށް ހުއްޓިގެން ދިޔަ މައިގަނޑު ސަބަބަކީ، އެ މަރާ ގުޅިގެން އޭރު ރާއްޖޭގެ ރައްޔިތުންނަށް ކުރުވި އަސަރެވެ. އެ ބިރުވެރިކަން ކުރިމަތިވީ ހަމައެކަނި ކާށިދޫ ރައްޔިތުންނަކަށް ނޫނެވެ. ބޭބެ ބުނިގޮތުގައި، ކާށިދޫގައި އިބްރާހިމްފުޅު މަރާލި ޚަބަރާއެކު، މުޅި ރާއްޖެއަށް އޭގެ ސިހުން ލިބިގެން ދިޔައެވެ. އޭރު ބޭބެ އުޅެމުންދިޔައީ މާލޭގައެވެ.
ކާށިދޫގައި މީހަކު މަރާލިކަމުގެ ޚަބަރާއެކު، އޭރު މާލޭ ރައްޔިތުންވެސް 2 ދުވަސް ވަންދެން އެކަމުގެ އިންތިހާ ބިރުވެރިކަމުގައި ތިއްބެވެ. މިއީ ކާށިދޫގައި ހިނގައިދިޔަ ކަމެއް ނަމަވެސް، މާލޭގެ ރައްޔިތުންވެސް އޭރު އިރުއޮއްސޭއިރަށް ބޮޑުތަޅު އަޅުވައިގެން ގެއަށް ވަންނަކަމަށްވެއެވެ.
ކާށިދޫއިން ވާހަކަދެއްކި މީހަކު ކިޔައިދިން ގޮތުގައި، އޭރު ކާށިދޫ މީހެކޭ ބުނުމުންވެސް އެހެން ރަށްރަށުގެ މީހުން ބިރުގަންނަކަމަށްވެއެވެ. ދެތިން އަހަރެއް ވަންދެން އެކަމުގެ ބިރުވެރިކަމުގައި ރައްޔިތުން އުޅުނެވެ. އާންމު ދިރިއުޅުމުގެ ހާލަތާ މުޅިން ތަފާތުކޮށެވެ.
އެއީ އޭރުގެ ހާލަތެވެ. ނަމަވެސް މިހާރު އެހެންތޯއެވެ؟ މިއަދު މީހުން މަރަމުންދަނީ ރޯމާ ދުވާލު، މީހުންގެ ކުރިމަތީގައެވެ. ވަޅި ޖަހަމުންދަނީ އެތައް ބަޔަކު އެއްވެ ތިއްބައެވެ. މަގުމައްޗާއި ކެފޭތަކުގަައެވެ. މިއަދު އަނިޔާވެރިކަމާއެކު މީހުންގެ ފުރާނަ ދުއްވާލަމުންދަނީ ބަންދު ކޮޓަރިތަކުގައެއް ނޫނެވެ. ހާމައަށް އެންމެންނަށް ފެންނަ ގޮތަށެވެ.
މިއަދު އަނިޔާވެރިކަމާއެކު މީހަކަށް ހަމަލާދިނަސް ކުރިންހެން ބިރުން މޭކަރާ ތަނެއް ނުފެނެއެވެ. މިހާރު ބަލަނީ އަވަހަށް ފޮޓޯއެއް ނަގައި، ސޯޝަލް މީޑިއާގައި ތިމާގެ މަގުބޫލުކަން އިތުރުކޮށްލެވޭތޯއެވެ. މީހުންގެ ބޮލާއި، އަތާއި ފައި ބުރިކޮށްލާ ވާހަކައަކީވެސް މިއަދު މީހުންނަށް މާބޮޑު ހައިރާންކަމެއް ލިއްބައިދޭ ވާހަކައެއް ނޫނެވެ. އެފަދަ ފޮޓޯތައް ޝެެއަރކޮށްލަނީވެސް އެއްވެސް ޖެހިލުންވުމެއް ނެތިއެވެ. ދިވެހިންގެ ހިތުގައި އޮތް އޯގާތެރިކަމާއި ރަހުމާއި ކުލުނަށް ވަމުން މިދަނީ ކިހިނެއްތޯއެވެ؟
