ރަސްދޫގައި 50 ހައުސިންގ ޔުނިޓު އަޅާނެ ބަޔަކު ހޯދަން އަލުން އިއުލާންކޮށްފި
މި ޕްރޮޖެކްޓު ކުރިއަށްގެންދަނީ ޑިޒައިން އެންޑް ބިލްޑް އުސޫލުން
އއ. ރަސްދޫ
އއ. ރަސްދޫގައި 50 ހައުންސިންގ ޔުނިޓު އެޅުމުގެ މަސައްކަތް ކޮށްދޭނެ ބަޔަކު ހޯދަން އަނެއްކާވެސް އިއުލާންކޮށްފިއެވެ.
ފިނޭންސް މިނިސްޓްރީން ކުރި އިއުލާނުގައި ބުނީ, މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރާކްޗަރގެ އެދުމުގެ މަތިން މި މަޝްރޫއުގެ މަސައްކަތް ކުރިއަށްގެންދަން ހަމަޖެހިފައިވަނީ ޑިޒައިން އެންޑް ބިލްޑުގެ އުސޫލުން ކަމަށެވެ. އެގޮތުން، 3 އޭޕްރިލް 2022 ވަނަ ދުވަހު އެ މިނިސްޓްރީން ކުރި އިއުލާނާ ގުޅިގެން ހުށަހަޅާފައިވާ ބީލަންތައް މިހާރު ބާތިލުވެފައިވާކަމަށްވެސް ފިނޭންސް މިނިސްޓްރީން ބުންޏެވެ.
މި މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދަން ހަމަޖެހިފައިވަނީ ނޭޝަނަލް ކޮމްޕެޓިޓިވް ބިޑިންގ (އެންސީބީ) އުސޫލުގެ މަތިންނެވެ. މި މަސައްކަތް ކޮށްދޭނެ ބަޔަކު ހޯދަން ބީލަން ކުރިއަށްދާނީ ޕްލޭނިންގ މިނިސްޓްރީގެ "އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދު"އާއި މިނިސްޓްރީ އޮފް ފިނޭންސްގެ "ނޭޝަނަލް ޓެންޑަރުން ކުރިއަށްގެންދާ، އިމާރާތްކުރުމުގެ މަސައްކަތްތައް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލު" އަދި މިނިސްޓްރީ އޮފް އިކޮނޮމިކް އެންޑް ޑިވެލޮޕްމަންޓުގެ " ފޮރިން ޑައިރެކްޓް އިންވެސްޓްމަންޓް ޕޮލިސީ"އާ އެއްގޮތަށެވެ.
މި ޕްރޮޖެކްޓުގެ ބިޑް ސެކިޔުރިޓީގެ ގޮތުގައި -/255,000ރ (ދެލައްކަ ފަންސާސް ފަސްހާސް ރުފިޔާ) ނުވަތަ އެ އަދަދާ އެއްވަރު އަދަދެއްގެ އެެމެރިކާ ޑޮލަރުން ހުށަހަޅަން ޖެހޭނެއެވެ. ބިޑް ސެކިޔުރިޓީގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަހެވެ.
ބީލަން ހުޅުވުން އޮންނާނީ 6 ސެޕްޓެމްބަރު ވާ ހޯމަދުވަހުގެ 11:00ގައިފިނޭންސް މިނިސްޓްރީގެ ނޭޝަނަލް ޓެންޑަރގެ ޖަލްސާކުރާ މާލަމުގައެވެ.
ޕްލޭނިންގ މިނިސްޓްރީން މިހާތަނަށް ވަނީ ބައެއް ރަށްތަކުގައި ހައުސިންގ މަޝްރޫއުތައް ހިންގުމަށް ބީލަމަށް ހުޅުވާލައި، ބައެއް ރަށްރަށުގެ މަސައްކަތްތައް ކޮންޓްރެކްޓަރުންނާވެސް ހަވާލުކޮށްފައެވެ. މީގެ ތެރޭގައި ނ. މަނަދޫއާއި، ކުޅުދުއްފުށި ސިޓީއާއި، ޅ. ހިންނަވަރާއި، ށ. މިލަންދޫއާއި، ގއ. ވިލިނގިއްޔާއި، ލ. ގަމާއި، ގދ. ތިނަދޫއާއި، ފުވައްމުލައް ސިޓީއާއި އައްޑޫ ސިޓީ ހުޅުދޫއާއި އަދި ޅ. ކުރެންދޫ ހިމެނެއެވެ.
