30 އަހަރަށްވުރެ ދިގު މުއްދަތަކަށް ފަތުރުވެރިކަމުގެ ދާއިރާއަށް ޚިދުމަތް ކޮށްފައިވާ މީހުންގެ ދަފްތަރެއް އެކުލަވާލަނީ
30 އޯގަސްޓު 2022 | އަންގާރަ 12:54މިއީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމަށް ކުރިއަށްގެންދާ މަސައްކަތެއް
ރިސޯޓު މުވައްޒަފުންތަކެއް
ރާއްޖޭގެ ފަތުރުވެރިކަމުގެ ދާއިރާއަށް 30 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މީހުންގެ ދަފްތަރެއް އެކުލަވައިލުމުގެ މަސައްކަތް ޓޫރިޒަމް މިނިސްޓްރީން ފަށައިފިއެވެ.
އެ މިނިސްޓްރީން މި ދަފްތަރު އެކުލަވާލަނީ ދިވެހި ރާއްޖޭގެ ފަތުރުވެރިކަމުގެ ރަން އަހަރު ފާހަގަ ކުރުމަށް ކުރިއަށް ގެންދާ ހަރަކާތްތަކުގެ ތެރެއިންނެވެ. އެގޮތުން ފާއިތުވި 50 އަހަރު ދުވަހުގެ ތެރޭގައި 30 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މީހުންގެ މައުލޫމާތު މިނިސްޓްރީއާއި ހިއްސާ ކުރުމަށް ވަނީ އެދިފައެވެ.
ޓޫރިޒަމް މިނިސްޓަރ ޑރ. އަބްދުﷲ މައުސޫމް "ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ވިދާޅުވީ މި މައުލޫމާތު ހޯދުމަށް ރާއްޖޭގެ ގެސްޓްހައުސްތަކާއި ހޮޓާތަކާއި ރިސޯޓުތަކަށް ފޮނުވާފައިވާ ކަމަށެވެ. އެ މައުލޫމާތު މިހާރު ވެސް ކޮންމެވެސް ވަރަކަށް ލިބެމުންދާ ކަންވެސް މިނިސްޓަރ ފާހަގަ ކުރެއްވިއެވެ.
މިނިސްޓަރ މައުސޫމް ވިދާޅުވީ މި މަސައްކަތް ކުރިއަށްގެންދަން ނިންމީ ސިވިލް ސާވިސް މުވައްޒަފުންގެ މައުލޫމާތު ހިމެނޭ ފަދަ ސިސްޓަމެއް ހުރި ނަމަވެސް އެފަދަ ސިސްޓަމެއް ފަތުރުވެރިކަމުގެ ދާއިރާގައި ނެތުމުން ކަމަށެވެ. ނަމަވެސް މުސްތަގުބަލުގައި ދިވެހި ފަތުރުވެރިކަމަށް ޚިދުމަތް ކޮށްފައިވާ ފަރާތްތަކާއި ކުރަމުން އަންނަ ފަރާތްތަކާއި އަދި ދިވެހި ފަތުރުވެރިކަން ކުރިއަރުވަން ފާހަގަކޮށްލެވޭ މަސައްކަތްތައް ކޮށްފައިވާ ފަރާތްތަކުގެ މައުލޫމާތު އެނގޭގޮތަށް ރެކޯޑުތައް ބެލެހެއްޓޭނެ ކަމަށް މައުސޫމް ވިދާޅުވިއެވެ.
ޓޫރިޒަމް މިނިސްޓްރީން އާއްމުންނަށް މި ފުރުސަތު ހުޅުވާލާފައިވަނީ އަންނަ ސެޕްޓެމްބަރު މަހުގެ ހަތަރުވަނަ ދުވަހާ ހަމައަށެވެ.
ރާއްޖޭގެ ފަތުރުވެރިކަމުގެ ރަން އަހަރު ފާހަގަ ކުރުމަށް ސަރުކާރުންނާއި ފަތުރުވެރިކަމުގެ ދާއިރާގެ ޖަމިއްޔާތަކުން ދަނީ ގިނަ ހަރަކާތްތައް ރާވާމުންނެވެ. އެގޮތުން، ފަތުރުވެރިކަމުގެ ދާއިރާއިން ފާހަގަ ކޮށްލެވޭ ފަރާތްތަކުގެ އަގުވަޒަން ކުރުމަށް އެވޯޑު ދިނުން ވެސް މިއަހަރު ކުރިއަށްދާނެއެވެ.
މިއަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށްވުމާ ގުޅިގެން މިއަހަރުގެ ޤައުމީ ހާއްސަ އިނާމުގައި ވެސް ފަތުރުވެރިމަމުގެ ދާއިރާއިން ފާހަގަކޮށްލެވޭ މަސައްކަތްތައް ކޮށްފައިވާ ފަރާތްތަކަށް އިނާމު ދިނުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ވަނީ ނިންމަވާފައެވެ.
