އިންސްޕެކްޓަރ ކޯސް ނިންމުމުގެ ރަސްމިއްޔާތު ބާއްވައިފި
26 އޯގަސްޓު 2022 | ހުކުރު 11:06އިންސްޕެކްޓަރ ކޯސް ފުރިހަމަކޮށް 48 އޮފިސަރުން ވަނީ ދަސްވެނިވެފައި
އިންސްޕެކްޓަރ ކޯސް ނިންމުމުގެ ރަސްމިއްޔާތު
ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގައި ހިންގި ފުރަތަމަ އިންހައުސް ޓްރެއިނިންގ “އިންސްޕެކްޓަރ ކޯސް” ނިންމުމުގެ ރަސްމިއްޔާތު ބާއްވައިފިއެވެ.
ކޯސް ނިންމުމަށް ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ އޮޑިޓޯރިއަމްގައި ބުރާސްފަތި ދުވަހުގެރޭ ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ޕޮލިސް މުހައްމަދު ހަމީދުއެވެ. އައްޑޫ ސިޓީގައި ކުރިއަށް ގެންދިޔަ އިންސްޕެކްޓަރ ކޯސް ފުރިހަމަކޮށް، ރަސްމިއްޔާތުގައި 48 އޮފިސަރުން ވަނީ ދަސްވެނިވެފައިވެއެވެ.
ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދު، ހެޑް އޮފް ޕީޕަލްސް ޑައިރެކްޓްރޭޓް އެސިސްޓެންޓް ކޮމިޝަނަރ އޮފް ޕޮލިސް އިސްމާއީލް ނަވީން، ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ އެގްޒެކެޓިވް ޑައިރެކްޓަރ ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން، ސައުތު ޕޮލިސް ރީޖަން ކޮމާންޑަރ ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝަމީމް އަދި ފުލުހުންގެ އިސް އޮފިސަރުންނާއި ދައުވަތު އެރުވިގެން ވަޑައިގެންނެވި އެހެނިހެން ބޭފުޅުންގެ އިތުރުން އެންސިޕޯލްގެ މުވައްޒަފުންނާއި ކޯހުގެ ބައިވެރިން ބައިވެރިވެވަޑައިގެންނެވިއެވެ.
ރަސްމިއްޔާތު ޝަރަފުވެރިކޮށްދެއްވައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި، އިންސްޕެކްޓަރ ކޯހުގެ ބައިވެރިންނަކީ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް އައްޑޫ ސިޓީގައި ގާއިމުކުރިފަހުން ކޮލެޖުން ދަސްވެނިވާ ފުރަތަމަ ބައިވެރިންކަން ފާހަގަކުރައްވައި އެ އޮފިސަރުންނަށް މަރުހަބާ ވިދާޅުވިއެވެ. އަދި މި ކޯހަކީ ކޮމިޝަންޑު އޮފިސަރުންގެ ރޭންކަށް ބަދަލުކުރެވޭ އޮފިސަރުންނަށް ހިންގިފައިވާ މިފަދަ އެހެން ކޯސްތަކާ އަޅާބަލާއިރު ކޯހުގެ ބައިވެރިން އެންމެ ގިނަ އަދަދަކަށް ހިމެނިގެންދިޔަ ކޯސްކަން ފާހަގަކުރެއްވިއެވެ. އަދި މީގެ ކުރިން ޖޫނިއަރ އޮފިސާސް ކޮމާންޑު ކޯހުގެ ނަމުގައި ދެ ބެޗެއް ދ. ވާނީ ޕޮލިސް ޓްރެއިނިންގ ސްކޫލްގައި ހިންގާފައިވާކަން ފާހަގަކުރެއްވިއެވެ. އެހެންކަމުން މި ކޯހުގެ ސިލަބަހާއި ކޯހުގެ ނަން އިންސްޕެކްޓަރ ކޯހުގެ ނަމަށް ބަދަލުކޮށް ހިންގޭ ފުރަތަމަ ފަހަރުކަމަށް ވިދާޅުވިއެވެ.
އޭގެ އިތުރުން، އައްޑޫ ސިޓީގައި ގާއިމުކޮށްފައިވާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓަށް މިއަދަކީ ތާރީހީ ދުވަހެއްކަމަށް ވިދާޅުވިއެވެ. އަދި ފުލުހުންގެ ކެރިއަރގައި މުހިންމު ހަރުފަތެއް ގިރާކުރުމަށް ފަރުމާކުރެވިފައިވާ އިންސްޕެކްޓަރ ކޯހަކީ ވަރަށް މުހިންމު މަގުސަދުތަކެއްގެ މައްޗަށް ހިންގަމުންދާ ކޯހެއްކަން ފާހަގަކުރެއްވިއެވެ. އަދި އެއީ ފުލުހުންގެ ފަންކްޝަން ތައް މެނޭޖްކުރުމާއި ހަވާލުވުމަށް ކޮމިޝަންޑު ރޭންކަށް ޕްރޮމޯޓްވުމަށް ބޭނުންވާ ތަޖުރިބާ ހާސިލުކުރުމަށް ފަރުމާކުރެވިފައިވާ ވަރަށް މުހިންމު ކޯހެއްކަމަށް ވިދާޅުވިއެވެ.
އަދި އިންސްޕެކްޓަރ ކޯސް ހިންގުމުގައި އެކި ދައުރު އަދާކޮށްފައިވާ ހުރިހާ މުވައްޒަފުންނާއި ފުލުހުންގެ ޚިދުމަތުގެ ބަހާތަކާ އަދި އެހެނިހެން ފަރާތްތަކަށް ޝުކުރުއަދާކުރެއްވިއެވެ. އަދި އިންސްޕެކްޓަރ ކޯހުގެ މުހިންމުކަމުން މި ކޯސް އިތުރަށް ތަރައްގީކުރުމަކީ ވަރަށް އިސްކަމެއްދީގެން ކުރިއަށް ގެންދާނެކަމެއް ކަމުގައި ފާހަގަކުރެއްވިއެވެ.
ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގައި ހިންގި ފުރަތަމަ އިންސްޕެކްޓަރ ކޯހުން އެއް ވަނަ އަށް ގޮސްފައިވަނީ ސަބް އިންސްޕެކްޓަރ އޮފް ޕޮލިސް މުފްލިހް އިބްރާހީމްއެވެ. ދެ ވަނަ އަށް ސަބް އިންސްޕެކްޓަރ އޮފް ޕޮލިސް އަހުމަދު ފާރިޝް ހޮވިފައިވާއިރު ކޯހުގެ ތިން ވަނައަށް ހޮވިފައިވަނީ ސަބް އިންސްޕެކްޓަރ އޮފް ޕޮލިސް މުަހައްމަދު އަފީފްއެވެ.
ހަތް ހަފްތާގެ މުއްދަތަށް ކުރިއަށް ގެންދިޔަ އެ ކޯހުގައި ޖިނާއީ އަދުލުގެ ނިޒާމުގައި ހުރި މުހިންމު ގާނޫނުތަކާއި ފުލުހުންގެ ގާނޫނު އަދި ލީޑަރޝިޕް އެންޑް މެނޭޖްމަންޓް، ޕޮލިސިންގ އެންޑް އިންވެސްޓިގޭޝަން، ސެކިއުރިޓި އެންޑް އޮޕަރޭޝަންސް ފަދަ މުހިންމު މޮޑިއުލްތައް ކިޔަވައިދީފައިވެއެވެ. އެ ކޯހަށް ބައިވެރިން ހޮވާފައިވަނީ ކޯހުގައި ބައިވެރިވުމަށް ހަދަންޖެހޭ އިމްތިހާނެއް ހެދުމަށް ފަހުއެވެ.
