ކަނޑުގެ ސަރަހައްދު ރައްކާތެރިކުރުމުގައި ރައްޔިތުން ސިފައިންނަށް ކުރާ އިތުބާރު ވަނީ އިތުރުވެފައި: ޝަމާލް
ކޯސްޓްގާޑް 10 ވަނަ ބޭސިކް ޑައިވިންގ ކޯހުގެ "ފަސްޓް އިން މެރިޓް އެވޯޑް" ހާސިލްކޮށްފައިވަނީ ލާންސް ކޯޕްރަލް އަބްދުﷲ މަޖީދު
އެމްއެންޑީއެފް ކޯސްޓްގާޑްގެ 10 ވަނަ ބޭސިކް ޑައވިންގ ކޯސް ނިންމުމުގެ ރަސްމިއްޔާތު
ކަނޑުގެ ސަރަހައްދު ރައްކާތެރިކުރުމުގައި ރައްޔިތުން، ސިފައިންނަށް ކުރާ އިތުބާރު ވަނީ އިތުރުވެފައިކަމަށް, ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
އެމްއެންޑީއެފް ކޯސްޓްގާޑު 10 ވަނަ ބޭސިކް ޑައިވިންގ ކޯސް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ޗީފް އޮފް ޑިފެންސް ފޯސް ވިދާޅުވީ، ދިވެހިރާއްޖެއަކީ 99.7 އިންސައްތަ ކަނޑުގެ ސަރަހައްދު އޮތް ގައުމަކަށް ވުމާއެކު، ކަނޑުގެ ބޮޑު ސަރަހައްދު ބަލަހައްޓައި ރައްކާތެރިކުރުމަށްޓަކައި ކޯސްޓްގާޑުގެ ސިފައިން ވަރަށް ގިނަ މަސައްކަތްތަކެއް ކުރަންޖެހިފައިވާކަމަށެވެ. އަދި ދިވެހިރާއްޖޭގައި މަސްވެރިކަމުގެ ސިނާއަތާއި ފަތުރުވެރިކަމުގެ ސިނާއަތް ފުޅާވަމުންދާއިރު، އިތުރުވަމުންދާ ވޯޓަރ ސްޕޯޓްސްގެ ހަރަކާތްތަކާއެކު، މޫދަށް މީހުން ގެއްލުމާއި، ކަނޑު އުޅަނދުފަހަރަށް ދިމާވާ އެކިއެކި އިންސިޑެންޓްތައް ފަދަ ހާދިސާތައްވެސް އިތުރުވަމުންދާކަން އޭނާ ވަނީ ފާހަގަކުރައްވާފައެވެ. އެހެންކަމުން އެފަދަ ހާދިސާތަކުގައި، ސިފައިން މުހިންމު އޮޕަރޭޝަންތައް ހިންގަމުންދާއިރު، ސިފައިންގެ ކޮނޑުގައި އެޅިފައި އޮތް ޒިންމާވެސް ބޮޑުވެފައިވާކަމަށް ޝަމާލް ވިދާޅުވިއެވެ.
ޝަމާލް އިތުރަށް ވިދާޅުވީ، ވޭތުވެދިޔަ އަހަރުތަކުގައި، އެމްއެންޑީއެފްގެ ތަމްރީނާއި ތައުލީމުގެ ނިޒާމަށް ގެންނަންފެށި ބަދަލުތަކާއެކު ގިނަ ކުރިއެރުންތަކެއް ލިބިފައިވާކަމަށެވެ. އަދި، އެ ކުރިއެރުންތަކާއެކު، މިއަދު އެމްއެންޑީއެފުން ސިފައިން ތަމްރީނުކޮށް ތަރައްގީކުރުމަށްޓަކައި، ފުޅާ ދާއިރާއެއްގައި ޕްރޮގްރާމްތަކާއި ކޯސްތައް ހިންގަމުން ގެންދާކަމަށާއި، އެ ހުރިހާ ތަމްރީނުތަކެއްގެ ތެރެއިންވެސް ކޯސްޓްގާޑް ބޭސިކް ޑައިވިންގ ކޯސް ތަފާތު ވަނީ، ބޭރުގެ އަސްކަރިއްޔާތަކުން ބައިވެރިވާ ހަމައެކަނި ޕްރޮގްރާމަށް އެ ކޯސް ވެގެންދާތީކަމަށް ޗީފް އޮފް ޑިފެންސް ފޯސް ފާހަގަކުރެއްވިއެވެ.
ކޯސްޓްގާޑު 10 ވަނަ ބޭސިކް ޑައިވިންގ ކޯސް ނިންމުމުގެ ރަސްމިއްޔާތުގައި ކޯހުން ވަނަތައް ހާސިލްކުރި ދަރިވަރުންނަށް އިނާމު ހަވާލުކޮށްދެއްވައި، ކޯހުން ފާސްވި ދަރިވަރުންނަށް ޑައިވަރސް ބެޖް ހަވާލުކޮށްދެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލެވެ. އަދި ކޯހުގެ އިންސްޓްރަކްޓަރުންނަށް އެކަމުގެ ލިޔުން ހަވާލުކޮށްދެއްވީ އެމްއެންޑީއެފް ކޯސްޓްގާޑުގެ ކޮމަޑާންޓް، ކާނަލް އިބްރާހީމް ހިލްމީއެވެ.
ކޯސްޓްގާޑު 10 ވަނަ ބޭސިކް ޑައިވިންގ ކޯހުގެ "ފަސްޓް އިން މެރިޓް އެވޯޑް" ހާސިލްކޮށްފައިވަނީ ލާންސް ކޯޕްރަލް އަބްދުﷲ މަޖީދެވެ. "ބެސްޓް ޑައިވަރ" އަދި "ބެސްޓް ފޮރިން ޑައިވަރ" އެވޯޑު ހާސިލުކުރީ ރޯޔަލް މެލޭޝިއަން ނޭވީގެ ލީޑިންގ ރޭޓް ޑައިވަރ މުހައްމަދު ޚައިރުލް ރެޒާ ބިން ހަކެމީއެވެ. އަދި ކޯހުގެ "ފިޓެސްޓް ޑައިވަރ" އެވޯޑް ހާސިލުކުރީ ލާންސް ކޯޕްރަލް އިބްރާހީމް މުނާޒެވެ.
މެއި 25 ވަނަ ދުވަހުން ފެށިގެން ހިންގި މި ކޯހުގައި 15 ދަރިވަރުން ބައިވެރިވެ، 12 ދަރިވަރަކު ވަނީ ކޯހުން ސެޓްފިކެޓް ހާސިލްކޮށްފައެވެ. އޭގެ ތެރޭގައި ރާއްޖެއިން ބޭރުގެ ހަތަރު އަސްކަރިއްޔާއަކަށް ނިސްބަތްވާ ދަރިވަރުންވެސް ހިމެނޭއިރު، އޭގެތެރޭގައި ހިމެނެނީ; އިންޑިއާ، ނޭޕާލް، ބަނގްލަދޭޝް އަދި މެލޭޝިއާގެ އަސްކަރިއްޔާގެ ސިފައިންނެވެ.
އެ ކޯހުގައި ދަރިވަރުންނަށް ޑައިވިންގ ހިސްޓްރީ އެންޑް ރެގިއުލޭޝަން، ފިޒިކަލް އެޑިޔުކޭޝަން، ފިޒިކްސް އެންޑް ފިޒިއޮލޮޖީ އޮފް ޑައިވިންގ، ޑައިވިންގ އިކުއިޕްމެންޓްސް އެންޑް އެކްސަސަރީޒް، ޑައިވިންގ ޓޭބަލް އެންޑް ކޮމްޕިއުޓަރޒް، ޑައިވިންގ ފަސްޓްއެއިޑް، ޑައިވިންގ ސްކިލް، ޑައިވިންގ އޮޕަރޭޝަން، ވެސަލް ރެސްކިޔު އެންޑް ސެލްވޭޖް، ޑައިވިންގ ކޮމިއުނިކޭޝަން، ޑައިވިންގ ސަރޗް ޕެޓަރންސް އަދި ދަރިވަރުންގެ އެޓިޓިއުޑާ ގުޅޭގޮތުން އުނގަންނައިދީފައިވެއެވެ.
