ޕްރިޒަން އޮފިސަރުންނަށް ޓޭޒަރ އިންސްޓްރަކްޓަރ ކޯސް ހިންގައިފި
މި ކޯހުގެ ބައިވެރިންނަކީ އެމްސީއެސްގެ 4 އޮފިސަރުންނާއި މޯލްޑިވްސް ޕޮލިސް ސަރވިސްގެ 4 އޮފިސަރުން
ޓޭޒަރ އިންސްޓްރަކްޓަރ ކޯސް
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ އިންސްޓިޓިއުޓް ފޮރ ކަރެކްޝަނަލް ސްޓަޑީޒް (އައިކޯސްޓް)އިން އެކްސޮން ކޮމްޕެނީއާ ގުޅިގެން ކުރިއަށްގެންދިޔަ ފުރަތަމަ "ޓޭޒަރ އިންސްޓްރަކްޓަރ ކޯސް" ނިމިއްޖެއެވެ.
މި ކޯހުގެ މަގުސަދަކީ މުސްތަގުބަލުގައި އޮފިސަރުންނަށް ޓޭޒަރއާގުޅޭ ކްލާސްތައް ނަގައިދޭނެ މުދައްރިބުން އުފެއްދުމެވެ. މީގެ އިތުރުން ޓޭޒަރ ޒިންމާދާރުކޮށް ބޭނުންކުރާނެ ގޮތްތައް މި ކޯހުގައި ކިޔައިދޭނެއެވެ.
މިއަދު މާފުށީ ޖަލުގައި ބޭއްވި ކޯސް ނިމުމުގެ ރަސްމިއްޔާތުގައި ކޯސް ފުރިހަމަކުރި 8 ބައިވެރިންނަށް ވަނީ ސެޓްފިކެޓް ހަވާލުކޮށްފައެވެ. މި ކޯހަކީ 3 ދުވަހުގެ މުއްދަތަށް ކުރިއަށް ގެންދިޔަ ކޯހެކެވެ. މި ކޯހުގެ ބައިވެރިންނަކީ އެމްސީއެސްގެ 4 އޮފިސަރުންނާއި މޯލްޑިވްސް ޕޮލިސް ސަރވިސްގެ 4 އޮފިސަރުންނެވެ.
ޓޭޒަރއަކީ ދުނިޔޭގައި ކުރިއަރަމުން އަންނަ ލޯ އެންފޯސްމަންޓް އޭޖެންސީތަކުގައި ބޭނުންކުރެވެމުން އަންނަ އާލާތެކެވެ. އަދި ޓޭޒަރ ބޭނުންކޮށްގެން އެންމެ ގެއްލުން ކުޑަ ގޮތަކަށް މީހުން ކޮންޓްރޯލްކުރެވޭނެއެވެ.
މި ކޯހުގެ ބައިވެރިންނަށް ކިޔަވައިދީފައިވަނީ އެކްސަން ކޮމްޕެނީގެ ސީނިއަރ އިންޓަރނޭޝަނަލް ޓްރޭނިންގ މެނޭޖަރ މރ. ނިކް ޑޭވީޒްއެވެ.
މި ރަސްމިއްޔާތުގައި ވާހަކަފުޅުދައްކަވަމުން މރ. ޑޭވީޒް ވަނީ، ކޯހުގައި ކިޔަވައިދެއްވުމަށް ފުރުސަތު އެރުވީތީ ޝުކުރުއަދާކުރައްވާފައެވެ. އަދި ޓޭޒަރ ރައްކާތެރިކޮށް، ޒިންމާދާރުކޮށް ބޭނުންކުރަން ދަސްވުމުން އޮފިސަރުންނަށް ރައްކާތެރިކަމާއި އަމާންކަން ކަށަވަރުކުރެވޭނެކަމަށާއި، ޓޭޒަރ އެކުލެވިގެންވަނީ ވަރަށް ހައި ޓެކްނޮލޮޖީގެ މައްޗަށްކަމަށާއި ރަނގަޅުގޮތުގައި އޭގެ ބޭނުންކުރުމަށް ޓްރޭނިންގ ހަދައިގެން ތިބި އޮފިސަރުން ތިބުމަކީ މުހިއްމުކަމެއްކަމުގައި މރ. ޑޭވީޒް ވިދާޅުވިއެވެ.
ޓޭޒަރއާގުޅޭ މައުލޫމާތު ސެޝަނެއް އެ ސަރވިސްގެ މަސައްކަތްތައް މޮނިޓަރކުރާ މުއައްސަސާތަކަށް މިއަދު ވަނީ ކުރިއަށް ގެންގޮސްފައެވެ.
