101.15 މިލިއަން ރުފިޔާގެ ތަރައްގީގެ މަޝްރޫއުގެ އެއްބަސްވުންތަކެއް ގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާ ސްޓްރަކްޗަރއިން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި އެކު ސޮއިކޮށްފިއެވެ.

ތަރައްގީގެ މި މަޝްރޫއުތަކަކީ މ. މުލަކު ގޮނޑުދޮށް ހިމާޔަތްކުރުމުގެ ދެވަނަ ފިޔަވައްސާއި، ރ. އުނގޫފާރުގެ ގޮނޑުދޮށް ހިމާޔަތްކުރުމުގެ މަޝްރޫއުގެ އިތުރުން މ. މަޑުއްވަރީ ބަނދަރު ހެދުމުގެ މަޝްރޫއެވެ.

މި މަޝްރޫއުގެ ތެރެއިން މ. މުލައް ގޮނޑުދޮށް ހިމާޔަތް ކުރުމުގެ މަޝްރޫއުގެ ދެވަނަ ފިޔަވަހީގެ އަމަލީ މަސައްކަތަށް 38.96 މިލިއަން ރުފިޔާ ހަރަދުވާނެކަމަށް ޕްލޭނިންގ މިނިސްޓްރީން ބުނެއެވެ. މި މަޝްރޫއުގެ ދަށުން 343.03 މީޓަރުގެ ބޮޑުހިލައިގެ ރިވެޓްމަންޓް ޖެހުމާއި، 539.9 މީތަރުގެ ބޮޑުހިލައިގެ ގްރޮއިން ގާއިމްކުރުމާއި، ގިރާ ސަރަހައްދުގެ ގޮނޑުދޮށް ވެލިން މުއްސަނދިކުރުން ހިމެނެއެވެ. މި މަޝްރޫއު ނިންމަން ދީފައިވަނީ 450 ދުވަހެވެ.

މި މަޝްރޫއުގެ އިތުރުން ރ. އުނގޫފާރު ގޮނޑުދޮށް ހިމާޔަތްކުރުމުގެ މަޝްރޫއު، ޑިޒައިން އެންޑް އަމަލީ މަސައްކަތް ކުރަން ހަވާލުކުރީ 11.11 މިލިއަން ރުފިޔާއަށެވެ. މި މަޝްރޫއުގެ ދަށުން 120 މީޓަރުގެ ބޮޑުހިލައިގެ ބްރޭކްވޯޓަރ އަދި 110 މީޓަރުގެ ބޮޑުހިލައިގެ ގްރޮއިން ގާއިމްކުރުމާއި، ގިރާ ސަރަހައްދުގެ ގޮނޑުދޮށް ވެލިން މުއްސަނދިކުރުން ހިމެނެއެވެ. މި މަޝްރޫއު ނިންމަން ދީފައިވަނީ 180 ދުވަހެވެ.

މީގެ އިތުރުން މ. މަޑުއްވަރީ ބަނދަރު ހެދުމުގެ މަޝްރޫގެ ދަށުން، އެ ބަނދަރު ފުންކުރުމާއި، ބަނދަރަށް ވަންނަ ނެރު ފުންކުރުމުގެ އިތުރުން ސޭންޑް ފިލް ބްރޭކްވޯޓަރ ރިކްލަމޭޝަން އަދި 600 މީޓަރުގެ ބޮޑުހިލައިގެ ބޭރުތޮށި ޖެހުން ހިމެނެއެވެ. މީގެ އިތުރުން 122 މީޓަރ ރިވެޓްމަންޓް ޖެހުން ހިމެނޭ އިރު، މިއީ 51.08 މިލިއަން ރުފިޔާގެ މަޝްރޫއެކެވެ. މި މަސައްކަތް ނިންމަން ދީފައިވަނީ 480 ދުވަހެވެ.

މި ތިން ކޮންޓްރެކްޓްގައި މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޒީނިޔާ އަހުމަދެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމް އެވެ.