މިއަދު މުޅި ދުނިޔެއަށް ކުރިމަތިލާން ޖެހިފައިވާ މޫސުމީ ނޭދެވޭ ބަދަލުތަކުގެ ސަބަބުން ތަހައްމަލު ކުރަން ޖެހޭ އެކި ކަހަލަ ވޭންދެނިވި ތަކުލީފުތަކުގެ ބުރަކަން އިހުސާސް ކުރަން ޖެހިފައިވާ އެއް ބަޔަކީ، މިޞްރުގައި ކޯރުދެމޭ ސިޓީއެއް ކަމަށްވާ އިސްމާއިލިއްޔާގެ ދަނޑުވެރިންނެވެ. މިހެން މި ދަންނަވަން ޖެހުނީ ސަބަބެއް ނެތިއެއް ނޫނެވެ. އިސްމާއިލިއްޔާގެ ދަނޑުވެރިންނަކީ، މޫސުމީ ގޮތުން ކުރިމަތިލާން ޖެހޭ ފަންގަހަކާ ދެކޮޅަށް ވަރުގަދަ ހަނގުރާމައެއް ކުރަން ޖެހިފައި ތިބި ބައެކެވެ.
އާދަޔާ ޚިލާފަށް ހޫނު ގަދަ ވެގެން ދިއުމުގެ ސަބަބުން، މިދިޔަ އަހަރުވެސް ދަނޑުބިންތަކުގެ އުފެއްދުންތެރިކަމުން 70 ޕަސެންޓް ބޭކާރުވެފައިވާއިރު، ދަނޑުވެރިކަމުގެ ދާއިރާއަށް ހާއްސަ އިންޖިނިއަރު، ސާމިހު ހުސައިން ބުނީ މޫސުމީ ނޭދެވޭ ބަދަލުތަކަށް، ދަނޑުވެރިންގެ އާދާކާދަ ބަދަލުކޮށް، އެ ކަމަށް އަހުލުވެރިވާން ޖެހިފައި ވާ ކަމަށެވެ.
މީ އެހެން އަހަރުތަކާ ތަފާތު އަހަރެއް. މި އަހަރު އަހަރަމެން މި ދަނީ، މޫސުމީ ނޭދެވޭ ބަދަލުތަކުން ހީނަރުކަމާ ކުރިމަތިލާން ޖެހުނު ދުވަސްތަކަކުން އަރައިގަންނަމުން. އިސްމާއިލިއްޔާއިން އުތުރުން ދެކުނަށް ބެލިއަސް، ގިނަ ދަނޑުތަކުގައި އުފެއްދުންތެރިކަން އެބައޮތް. އުފެއްދުންތެރިކަން ރަނގަޅު. އެކަމަކު، ސުއްކަރާއި އަނބު ހެއްދުން މާ ކާމިޔާބެއް ނޫން މި އަހަރު. މިހެން ބުންޏަސް، މިދިޔަ އަހަރުތަކާ އަޅާ ބަލާއިރު އުފެއްދުންތެރިކަން ރަނގަޅު.ސާމިހް ހުސައިން؛ އެގްރިކަލްޗަރަލް އިންޖިނިއަރ
ވައި ދައުރު ކުރުމުގެ ނިޒާމަށް ހެޔޮ ބަދަލުތަކެއް ގެނައުމާއި، ގްރީންހައުސްތައް ތަރައްޤީކޮށް އެކަށީގެންވާ ގަހުކާނާ ލިބޭނެ އިންތިޒާމްތައް ހަމަޖެއްސުމުގެ ސަބަބުން، ނޭދެވޭ ބަދަލުތަކުގެ ކުރިން ދަނޑުބިންތަކުގެ އުފެއްދުންތެރިކަން އޮތް މިންވަރާ ގާތަށް މިހާރު ހިސާބަކަށް ދެވެއެވެ.
މީގެ އަހަރުތަކެއް ކުރިއަށް ބަލާއިރު، މޫސުން އޮތީ އަނބު ހައްދަން އެންމެ އެކަށީގެންވާ ގޮތަށް. މިހާރު މޫސުން ބަދަލުވެއްޖެ. ވަރަށް އާދަޔާ ޚިލާފު. މިސާލަށް ސީދާ ފިނި މޫސުމުން ހޫނު މޫސުމަށް ބަދަލުވެދާނެ. އަދި އަނެއް ކޮޅަށްވެސް. އެކަމުގެ އަސަރު، ވަރަށް ބޮޑަށް އަނބުތަކަށް ކުރޭ. އެހެންވެ، ވެންޓިލޭޝަން ރަނގަޅުކޮށް، ގަހުކާނާއާއި ޕެސްޓިސައިޑްޒް، އެންމެ އެކަށީގެންވާ ގޮތަށް ބޭނުން ކުރަން ފެށީ. އެނޫން ގޮތަކަށް، އަހަރަމެންނަކަށް ކޮންޓްރޯލެއް ނެތް.ސާމިހް ހުސައިން؛ އެގްރިކަލްޗަރަލް އިންޖިނިއަރ
މޫސުމީ ނޭދެވޭ ބަދަލުތަކަށް އަހުލުވެރި ވެފައިވާ އުސޫލުން ދަނޑުވެރިކަން ކުރެވޭނެ އިންތިޒާމްތައް ތަނަވަސްވަމުން ދާ ވަރަކަށް ދަނޑުވެރިންވެސް ދަނީ ތަފާތު އެކި ކަންކަން ތަޖުރިބާތައް ކުރަމުންނެވެ. އެގޮތުން، އެންމެ ފޯރީގައި ކުރިއަށް ދާ އެއް މަސައްކަތަކީ، ބިދޭސީ މުޑުވަށްތަކުގެ ދޮން އަނބު ހެއްދުމުގެ މަސައްކަތެވެ.
މޫސުމީ ނޭދެވޭ ބަދަލުތަކަށް އަހުލުވެރިވާން ބަލާއިރު، ބިދޭސީ މުޑުވައްތަކަކީ މާ އުހަށް ހެދޭ ބާވަތްތަކެއް ނޫންވީމަ، ގްރީންހައުސް ބޭނުން ކުރެވޭ، ގަދަ ހޫނުން ގަސްތައް ސަލާމަތް ކުރަން. ގަދަ ފިނިންވެސް ސަލާމަތް ކުރެވޭ. އަދި ކޮބާ، ސޫފާސޫފިން ސަލާމަތްވާން ބޭނުން ކުރާ ބޭހުގެ ބާވަތްތައް ބޭނުން ކުރަން ޖެހޭ މިންވަރުވެސް މަދު ކުރެވޭ. ދޭސީ ގަސްތަކަކީ ވަރަށް އުހަށް ހެދޭ ގަސްތަކެއް. އެކަމަށްވެސް އަހަރަމެން މިދަނީ މަގުކޮށާ ހަދަމުން.މަޙްމޫދު ތުހާމީ؛ އަނބު ދަނޑެއްގެ ވެރިއެއް
އިސްމާއިލިއްޔާއަކީ އެތައް ހާސް އޭކަރަކަށް ދެމިގެންދާ ދޮން އަނބު ދަނޑުތަކަށް މަޝްހޫރު ސިޓީއެކެވެ. ދޮން އަނބަކީ މިޞްރުގެ ހޫނު މޫސުމާވެސް ދޯޅު މޭވައެކެވެ. ހޫނު މޫސުމުގެ ދުވަސްވަރު، މިޞްރުގެ އެކި ހިސާބުތަކުން ދޮން އަނބު ހުސް ނުވެއެވެ. މަގުތަކުގެ އެކި ހިސާބުތަކުގައި ޖަހާފައިވާ ކަޑަތަކުންވެސް ތާޒާ ދޮން އަނބުގެ ފޮނި މީރުކަން ތަޖުރިބާ ކުރަން ލިބެއެވެ.
ކްރިމްސަން، ނެއޯމީ އަދި ޔަސްމީނާ ކަހަލަ ބިދޭސީ މުޑުވަށްތައް ހައްދަން ފެށީ މޫސުމީ ބަދަލުތަކަށް އަހުލުވެރިވާންވެގެން. މި ބާބަތްތަކަކީ މިހާރުގެ މޫސުމަށް އެކަށީގެންވާ ބާވަތްތަކަކަށް ވީމަ. ގަދަ ހޫނާއި ފިނީގައިވެސް ހެދޭ ބާވަތްތަކެއް. ސުއްކަރާއި ޒިބްދާ ކަހަލަ، އުހަށް ހެދޭ ދޭސީ ބާވަތްތައްވެސް އަހަރަމެން ހައްދަން. އެއީ އެހެން ގަސްތަކަށް، ވަޔާއި ހިރަފުހުން، ހިޔަލާއި ސަލާމަތްތެރިކަން ހޯދާދޭންވެގެން.ރަމަދާން އަހުމަދު މަޙްމޫދު؛ އަނބު ދަނޑެއްގެ ވެރިއެއް، އަދި އަނބުގެ ވިޔަފާރި ކުރާ މީހެއް
ތިމާވެއްޓާ ރައްޓެހި، ތަފާތު، އާ މަޝްރޫއުތަކެއް މިޞްރުން ފެންނަމުންދާ މި ދަނޑިވަޅަކީ މޫސުމީ ނޭދެވޭ ބަދަލުތަކާ ގުޅޭ ގޮތުން ބައިނަލްއަގުވާމީ ފެންވަރުގައި ސިލްސިލާ ގޮތެއްގައި ކުރިއަށް ގެންދާ އެންމެ ވަރުގަދަ އެއް ބައްދަލުވުން ކަމަށް ވާ ކޮންފަރަންސް އޮފް ޕާޓީޒް ގެ 27 ވަނަ ސަމިޓް ނުވަތަ ކޮޕް-27 އަށް މިޞްރުން ތައްޔާރު ވަމުންދާ ދަނޑިވަޅެކެވެ.
ނޮވެމްބަރު 7 އިން 18 އަށް ޝަރަމް އަލް-ޝައިޚްގައި އޮންނަ ކޮޕް-27 ސަމިޓްގެ ރިޔާސަތު ބަލަހައްޓާނީ މިޞްރުންނެވެ.
