ޕިކްފޯޑުގެ އެއްބަސްވުމުގެ މުއްދަތު އިތުރުކުރުމަށް އެވަޓަންއިން މަސައްކަތްކުރަނީ

އެވަޓަންގެ ގޯލްކީޕަރު ޖޯޑަން ޕިކްފޯޑްގެ އެއްބަސްވުމުގެ މުއްދަތު އިތުރުކުރުމަށް އެ ކުލަބުން މަސައްކަތް ފަށައިފިއެވެ.

ސަންޑަލެންޑުން 2011 ވަނަ އަހަރު ސީނިއަރ ކެރިއަރު ފެށި 28 އަހަރުގެ ޕިކްފޯޑަކީ، އިންގްލެންޑުގެ ގައުމީ ޓީމުގައިވެސް ހިމެނޭ ކީޕަރެކެވެ. ސަންޑަލެންޑުގައި ހުރުމަށްފަހު 2017 ވަނަ އަަހަރު އެ ކުލަބް ދޫކޮށް އެވަޓަންއަށް ބަދަލުވުމާ ހަމައަށް، ޕިކްފޯޑް ވަނީ ލޯނު އެއްބަސްވުމުގެ ދަށުން އެކި ކުލަބްތަކަށް ކުޅެފައެވެ. އެގޮތުން އޭނާ ވަނީ ހަ ކުލަބަކަށް ލޯނު އެއްބަސްވުމުގެ ދަށުން ކުޅެފައެވެ.

ޒުވާން ކީޕަރު 2017 ވަނަ އަހަރު އެވަޓަންއަށް ބަދަލުވެ މިހާތަނަށް ވަނީ އެ ޓީމަށް 199 މެޗުގައި ގޯލް ބަލަހައްޓާ ދީފައެވެ. އޭނާގެ ކުރިމަގާ ގުޅޭގޮތުން އެވަޓަންގެ ކޯޗު ފްރޭންކް ލަމްޕާޑް ބުނީ، ޕިކްފޯޑަކީ ޓީމަށް ވަރަށް މުހިންމު ކުޅުންތެރިއެއްކަމަށާއި، އެއްބަސްވުމުގެ މުއްދަތު އިތުރުކުރުމާ ގުޅޭގޮތުން ޓީމުން އަންނަނީ އޭނާއާ ވާހަކަދައްކަމުން ކަމަށެވެ. މީގެ އިތުރުން ލަމްޕާޑް ބުނީ، އެވަޓަންގައި ޕިކްފޯޑު ހުރީ ވަރަށް އުފަލުންކަށާއި، ޓީމުގެ އެންމެން އެދެނީ އޭނާ ޓީމުގައި މަޑުކުރަން ކަމަށެވެ.

ޕިކްފޯޑް ވަނީ 2017 ވަނަ އަހަރު އިންގްލެންޑުގެ ގައުމީ ޓީމުގައި ހިމަނާފައެވެ. އޭގެ ފަހުން އޭނާ ވަނީ މިހާތަނަށް އިންގްލެންޑަށް 45 މެޗުގައި ގޯލު ބަލަހައްޓާފައެވެ.