ވެރިކަމުގެ ނިޒާމާ ގުޅޭގޮތުން ހުށަހަޅުއްވާފައިވާ ގަރާރުގެ ވޯޓް ކޮންގްރެސްގެ ތެރެއިން ނެގުމުން ނަތީޖާ އޮންނާނެ ގޮތް އެނގިވަޑައިގަންނަވާ ކަމަށާއި، ހާޖާނުގަނޑެއް އުފެދުމަށް އެދިވަޑައިނުގަންނަވާކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކޮންގްރެސްގެ ދެވަނަ ދުވަހު މަންދޫބުންނާއި މުޚާތަބުކުރައްވައި ވާހަކަފުޅުދައްކަވަމުން ނަޝީދު ވިދާޅުވީ، މިއަދާއި މާދަމާއަކީވެސް ޕާޓީއަށް ފަސޭހަ ދުވަސްތަކަކަށް ނުވާނެކަމަށެވެ.

ކުރީގެ ކޮންގްރެސްގައި، ވެރިކަމުގެ ނިޒާމު ބަދަލު ކުރުމަށް ފާސްކުރެވުނުނަމަވެސް، މިހާރު އެއްބަޔަކު އެގޮތަށް ނުދެކޭކަން ފާހަގަކުރައްވައި ރައީސް ނަޝީދު ވިދާޅުވީ، އެމަނިކުފާނު ހުށަހެޅުއްވި ގަރާރުގައި ވާނީ ޕާޓީ އެ ނިޒާމަށް އެއްބަސްވުމަށް ނޫންކަމަށެވެ. އެދިވަޑައިގަތީ މެމްބަރުން ގޮތެއް ނިންމުމަށްކަމަށެވެ.

ބަރުލަމާނީ ނިޒާމަށް ނޫނެކޭ ބުނާންވީ ސަބަބެއް ނެތްކަމަށާއި، މި ތިބި ގޮތަށް ތިބެއްޖެނަމަ އެމްޑީޕީއަށް 2023 ވަނަ އަހަރު ރިޔާސީ އިންތިޚާބު ކާމިޔާބު ނުކުރެވޭނެ ކަމަށްވެސް ވިދާޅުވިއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެވަނަ ދައުރަކަށް ހޮވުމަށް ވަރަށް ގިނަ ބަޔަކަށް ފެންނަ ކަމަށާއި، އެގޮތަށް ދުށްނަމަވެސް އެއީ އެމްޑީޕީގެ އެކަނި އުންމީދެއްކަމަށް ރައީސް ނަޝީދު ވިދާޅުވިއެވެ.

މި ޕާޓީ ބައިބައިވެއްޖެނަމަ ޕާޓީއަށް ވޯޓެއް ނުލިބޭނެކަމަށާއި، މިއަދު އޮތްގޮތަށް ކަންކަން އޮވެއްޖެނަމަ 112،000 ވޯޓުން ލިބޭނީ 40 އިންސައްތަ ކަމަށްވެސް ވިދާޅުވިއެވެ.

ގޮތެއް ހޯދަން ޖެހޭކަން ފާހަގަކުރައްވައި ނަޝީދު ވިދާޅުވީ، އެމްޑީޕީއަށް ރައީސް ސޯލިހުވެސް އަދި އެމަނިކުފާނުވެސް މުހިންމު ނޫންކަމަށެވެ. ވެރިކަން ހިންގަން އެންމެ ރަނގަޅު ގޮތަކީ ރައްޔިތުންގެ ވަކީލުން އެކަން ކުރުން ކަމަށްވެސް ވިދާޅުވިއެވެ.

އެމަނިކުފާނުގެ ވިސްނުމާއި ޕާޓީގެ އެންމެންގެ ވިސްނުން އެއްގޮތްކަމަށް ހީފުޅުކުރެއްވުނު ކަމަށްވެސް ނަޝީދު ވިދާޅުވިއެވެ. އެންމެންނަށް އެކީގައި ތިބެވޭނީ އެންމެންގެ ވާހަކަ އަޑުއަހައިގެން ބަސްވެސް ގަބޫލުކޮށްގެން ކަމަށް ނަޝީދު ވިދާޅުވިއެވެ.

މުޅި ޕާޓީއާއެކު ނޫން ގޮތަކަށް 2023 އިންތިޚާބަށް ނުނިކުމެވޭނެ ކަމަށާއި، ރައްޔިތުންނަށް ޚިދުމަތްކުރެވޭނެ ގޮތްތައް ވިސްނުމަކީ ކޮންގްރެސްގެ އެންމެންގެ މަސްއޫލިއްޔަތެއް ކަމަށްވެސް ނަޝީދު ވިދާޅުވިއެވެ.