އިސްރައްވެހިންނަށް ދުޅަހެޔޮ ސިއްހަތާއި ބެހޭގޮތުން މައުލޫމާތު ފޯރުކޮށްދިނުމުގެ ގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ފަރާތުން "ދޮށީ އުމުރާއި ސިއްޙަތު" ގެ ނަމުގައި މަންސައެއް ބޭއްވުމަށް ހަމަޖައްސައިފިއެވެ.
މި ހަރަކާތަކީ އެޗްޑީސީ އާއި ހުޅުމާލެ ހޮސްޕިޓަލް އާއި ކޮމިއުނިޓީ ނާރސް ވޮލުންޓިއާރސް އަދި ޝާލޫ ދި ޓްރެއިނަރ ގުޅިގެން ކުރިއަށް ގެންދަން ހަމަޖެހިފައިވާ ހަރަކާތެކެވެ. މި ހަރަކާތް ބޭއްވުމަށް ހަމަޖެހިފައިވަނީ 13 އޮގަސްޓް 2022 ވާ ހޮނިހިރު ދުވަހުގެ ހަވީރު 16:00 އިން 18:00 އަށް ހުޅުމާލެ ހިޔާ ޕާކް ސަރަހައްދުގައެވެ.
އިސްރަށްވެހިންނަށް އަމާޒުކޮށް ކުރިއަށް ގެންދާ މި ހަރަކާތުގައި ހަކުރުބައްޔާއި ލޭމައްޗައް ދިޔުމާއި ކޮލެސްޓްރޯލް އަދި ދޮށީ އުމުރުގެ މީހުންނަށް ކެއުންބުއިމުގެ އާދަކާދައާއި ކަސްރަތުގެ މުހިއްމުކަމާއި ބެހޭގޮތުން މައުލޫމާތު ފޯރުކޮށްދެވޭނެ ކަމަށް އެޗްޑީސީން ބުނެއެވެ.
އަދި މި ހަރަކާތް ކުރިއަށް ގެންދާ ސަރަހައްދުގައި ހުންނަ ސްޓޯލްތަކުން ލޭގެ ޕްރެޝަރ ޗެކް ކުރުމާއި ހަކުރު ޗެކް ކުރުން އަދި ސިއްހީ ގިނަ މައުލޫމާތުތަކެއް ބައިވެރިންނާއި ހިއްސާކުރެވިގެންދާނެއެވެ.
މަންސަ އަކީ އެޗްޑީސީގެ ކޮމިއުނިޓީ ޑިވެލޮޕްމަންޓް ޕްރޮޖެކްޓެއް ކަމުގައިވާ ހޭޑި ފޭޑި ޕްރޮޖެކްޓްގެ ދަށުން 2019 ވަނަ އަހަރުގެ އޯގަސްޓް މަހުގައި ތައާރަފްކޮށްފައިވާ ޓޯކް ޝޯ ސީރީސްއެކެވެ. މި ހަރަކާތަކީ ރައްޔިތުންގެ ހޭލުންތެރިކަން އިތުރުކުރުމަށާއި ރައްޔިތުންގެ ހުރި އެކި ކަންބޮޑުވުންތަކާއި ހިޔާލު ހޯދުމަށްޓަކައި އެޗްޑީސީގެ ފަރާތުން ކުރިއަށް ގެންދާ ހަރަކާތެކެވެ.
