ހއ އަތޮޅުން ފެށިގެން އދ އަތޮޅަށް ނެރުނު ޔެލޯ އެލަރޓްގެ ވަގުތު އިތުރުކޮށްފި
3 އޯގަސްޓު 2022 | ބުދަ 18:45ޔެލޯ އެލަރޓްގެ މުއްދަތު ބުދަ ދުވަހުގެ ރޭ 11ން ފެށިގެން ފަތިހު 5ށް ވަނީ އިތުރުކޮށްފައި
ކަނޑުގަދަ ދުވަހެއްގައި ދަތުރުކުރަނީ
ހއ އަތޮޅުން ފެށިގެން އދ އަތޮޅަށް ނެރުނު ޔެލޯ އެލަރޓްގެ މުއްދަތު އިތުރުކޮށްފިއެވެ.
މޫސުމާބެހޭ ގައުމީ އިދާރާއިން ބުނީ، އެސަރަހައްދަށް ނެރުނު ޔެލޯ އެލަރޓްގެ މުއްދަތު ބުދަ ދުވަހުގެ ރޭ 11ން ފެށިގެން ފަތިހު 5ށް އިތުރުކޮށްފައިވާކަމަށެވެ. ކުރިން ޔެލޯ އެލަރޓްގެ މުއްދަތު ހަމަވާން އޮތީ 11 ޖަހާއިރުއެވެ.
މެޓް އޮފީހުން ބުނީ މިވަގުތުތަކުގައި އެސަރަހައްދަށް ގަޑިއަކު 28 މޭލާ 35 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 55 މޭލަށް ވައިގަދަވެ ކަނޑުތައް ވަރަށް ގަދަވާނެކަމަށް ލަފާކުރެވޭކަމަށެވެ.
މީގެއިތުރުން، ބުރާސްފަތި ދުވަހުގެ ހެނދުނު 10 ޖެހުމާ ހަމައަށް ރާއްޖޭގެ އެކިހިސާބަށް ވިއްސާރަ ކުރާނެކަމަށާއި، ބައެއް ރަށްތަކަށް ބޯކޮށް ވާރެވެހި ގުގުރުން އެކަަށީގެންވާކަމަށެވެ. އާންމު ގޮތެއްގައި ކަނޑުތައް ގަދަވާނެކަމަށާއި ދިޔަވަރު ބޮޑު ވަގުތުތަކުގައި އުދައިގެ އަސަރުކުރުން އެކަށީގެންވާކަމަށެވެ. އެހެންކަމުން ހުރިހާ ފަރާތްތަކުން (ވަކިން ޚާއްސަކޮށް ކަނޑުދަތުރު ކުރާ ފަރާތްތަކުން) މޫސުމަށް ސަމާލުވުމަށް ވަނީ އިލްތިމާސްކޮށްފައެވެ.
