ފޭސް 2ގެ ސެކަންޑްރީ ސްކޫލް ޖެނުއަރީގައި، ޕްރައިމަރީ ސްކޫލް ސެޕްޓެމްބަރުގައި ހުޅުވޭނެ: ސުހައިލް
ޕްރައިމަރީ ސްކޫލާއެކު އަޅާ ޕްރީސްކޫލުގެ މަސައްކަތް މި މަހު ނިންމާލެވޭނެ ކަމަށް ވިދާޅުވި
އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު
ހުޅުމާލެ ދެވަނަ ފިޔަވަހީގެ ދެ ސްކޫލެއް އެޅުމުގެ މަސައްކަތް ހަލުވިކަމާއެކު ކުރިއަށްދާ ކަމަށާއި އޭގެ ތެރެއިން ޕްރައިމަރީ ސްކޫލް އަންނަ ސެޕްޓެމްބަރު މަހު ހުޅުވޭނެ ކަމަށް ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީގައި ވާހަކަދައްކަވަމުން ސުހައިލް ވިދާޅުވީ ދެވަނަ ފިޔަވަހީގައި އަޅާ ސެކަންޑްރީ ސްކޫލުގެ މަސައްކަތް ވެސް ނިންމައި އަންނަ އަހަރުގެ ޖެނުއަރީގައި ކިޔެވުން ފެށޭނެ ކަމަށް ލަފާ ކުރެއްވޭ ކަމަށެވެ. އަދި ދެ ޕްރީސްކޫލެއް ހެދުމުގެ މަސައްކަތް އެޗްޑީސީއާ ހަވާލުކޮށްފައިވާއިރު އެތަނުން އެއް ސްކޫލް، ޕްރީސްކޫލާއި ޕްރައިމަރީ ސްކޫލް ހިމެނޭހެން އަންނަ ސެޕްޓެމްބަރު މަހަށް ނިންމާލެވޭނެ ކަމަށާއި ސެޕްޓެމްބަރު 5ގައި ކިޔެވުން ފަށަން ނިންމާފައިވާ ކަމަށް ވެސް ސުހައިލް ވިދާޅުވިއެވެ.
ސެޕްޓެމްބަރު މަހު ހުޅުވާ ޕްރައިމަރީ އަދި ޕްރީސްކޫލުގެ ސަބަބުން ދެވަނަ ފިޔަވަހީން ތުއްތު ކުދިން ގޮވައިގެން މާލެއަށް އަދި ހުޅުމާލެ ފުރަތަމަ ފިޔަވައްސަށް ދަތުރު ކުރާ ފަރާތްތަކަށް ވަރަށް ބޮޑު ލުޔެއް ލިބިގެންދާނެ ކަމަށް ސުހައިލް ވިދާޅުވިއެވެ.
ހުޅުމާލެ ދެވަނަ ފިޔަވަހީގައި ތަރައްޤީ ކުރާ ސެކަންޑްރީ ސްކޫލުގެ މަސައްކަތް ސަރުކާރުން ހަވާލުކޮށްފައިވަނީ އަމީން ކޮންސްޓްރަކްޝަނާއެވެ. އަދި ޕްރީ ސްކޫލުތަކުގެ މަސައްކަތް ހަވާލުކޮށްފައިވަނީ އެޗްޑީސީއާއެވެ.
ހުޅުމާލެ ދެވަނަ ދިޔަވަހީގައި މީހުން ދިރިއުޅެން ފެށިތާ އަހަރެއްވާން ކައިރިވެފައިވާއިރު އެ ސަރަހައްދުގައި ދިރިއުޅޭ ރައްޔިތުން ބޭނުންވާ މުހިންމު ޚިދުމަތްތައް ގާއިމްކުރުމުގެ މަސައްކަތް އެޗްޑީސީން ދަނީ ކުރަމުންނެވެ. އެގޮތުން މިހާރު އެ ސަރަހައްދުގައި ފިހާރަތަކާއި ކްލިނިކެއްގެ އިތުރުން ދެ މިސްކިތް ވެސް ވަނީ ހުޅުވާފައެވެ. އަދި އެ ސަރަހައްދުގެ މަގުތައް ވެސް ނިމިފައިވާއިރު ލިފްޓުގެ މައްސަލަ ވެސް ހައްލު ކުރެވިފައިވާ ކަމަށް ސުހައިލް ވިދާޅުވިއެވެ.
އެޗްޑީސީން އަންނަނީ އެ ސަރަހައްދުގެ ސެކިއުރިޓީ އިތުރަށް ވަރުގަދަ ކުރުމަށް ޓަވަރުތަކުގައި ސީސީޓީވީ ކެމެރާ ވެސް ހަރުކުރަމުންނެވެ.
