އޭނާއާއި ބެހޭ ގޮތުން މީޑިއާތަކުގައި ވާހަކަ ފަތުރަމުންދާ ގޮތާމެދު ހިތް ހަމަ ނުޖެހި ކްރިސްޓިއާނޯ ރޮނާލްޑޯ ނުރުހުން ފާޅުކޮށްފިއެވެ.
ސީޒަން ނިމުމާއެކު މެންޗެސްޓަރ ޔުނައިޓެޑް ދޫކޮށްލަން ބޭނުންވާކަން ހާމަކުރި ނަމަވެސް، ބަދަލުވާނެ ކުލަބެއް ހޯދުމަށް އުނދަގޫވެ ރޮނާލްޑޯ ވަނީ އެ ޓީމުގެ ފަރިތަކުރުންތަކަށް ހާޒިރުވެފައެވެ.
މީޑިއާތަކުގައި އޭނާގެ ވާހަކަ ގެންނަ ގޮތާމެދު ހިތް ހަމަ ނުޖެހި ރޮނާލްޑޯ ބުނީ، އޭނާގެ ވާހަކަ ނުދައްކާ ނަމަ މީޑިއާ ތަކަށް ފައިސާ ނުލިބޭ ކަމަށެވެ. ރޯނާލްޑޯ ބުނީ މީޑިއާ ތަކުން ކުރާ ކަމަކީ ދޮގު ވާހަކަތައް ފަތުރައިގެން ވިޔަސް، މީހުގެ ސަމާލުކަން ހޯދުން ކަމަށެވެ. މީގެ އިތުރުން އޭނާ ބުނީ ދޮގު ވަހަކަތައް ފެތުރުމުގައި މީޑިއާތަކުން ކުރިއަށްދާނަމަ، ކޮންމެވެސް ދުވަހަކުން ތެދު ޚަބަރެއް ގެނެސްދެވިދާނެ ކަމަށެވެ.
ޔުނައިޓެޑް ދޫކޮށް އެހެން ކުލަބަކަށް ބަދަލުވާން ރޮނާލްޑޯ މަސައްކަތް ކުރި ވާހަކަ މީޑިއާ ތަކުގައި ވަނީ ވަރަށް ގަދަޔަށް ދައްކާފައެވެ. އެގޮތުން ޔޫރަޕުގެ ބޮޑެތި ބައެއް ކުލަބުތަކަށް ރޮނާލްޑޯ ގެންދިޔުމުގެ އޮފަރ އޭނާގެ އެޖެންޓު، ޖޯޖް މެންޑޭސް ކުރި ނަމަވެސް ކުލަބު ތަކުން އެކަމަށް އިޖާބަ ނުދިން ވާހަކަ ރިޕޯޓުކުރިއެވެ. އޭގެ ތެރޭގައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ)، ޖަރުމަނުގެ ބަޔާން މިއުނިކް، ޕްރިމިއަރ ލީގުގެ ޗެލްސީގެ އިތުރުން ސްޕެއިންގެ އެތުލެޓިކޯ މެޑްރިޑު ހިމެނެއެވެ.
ޓީމު ދޫކޮށްލަން ބޭނުންވާކަން ރޮނާލްޑޯ ޔުނައިޓެޑުގެ އިސް ފަރާތްތަކަށް އެންގި ނަމަވެސް، އެ ޓީމުން އޭނާ ދޫކޮށްލާކަށް ބޭނުމެއް ނުވެއެވެ. ދެ އަހަރު ދުވަހުގެ އެއްބަސްވުމެއްގެ ދަށުން ރޮނާލްޑޯ ޔުނައިޓެޑްއަށް ބަދަލުވިއިރު، އެ އެއްބަސްވުމުގައި ބާކީ އެއް އަހަރު އެބަ އޮތެވެ. ޔުނައިޓެޑް ދޫކޮށްލަން ރޮނާލްޑޯ ބޭނުންވާ ސަބަބަކީ ކުރިއަށް އޮތް ސީޒަނުގެ ޔުއެފާ ޗެމްޕިއަންސް ލީގުން އެ ޓީމަށް ޖާގަ ނުލިބުމުންނެވެ. ނިމުނު ސީޒަނުގެ ޕްރިމިއަރ ލީގުގެ ގަދަ ހަތަރެއްގައި ލައްވާ ނުލުމުން. އަންނަ ސީޒަނުގައި ޔުނައިޓެޑް ވާދަކުރާނީ ޔޫރޮޕާ ލީގުގައެވެ.
