އެތުލެޓިކޯ މެޗަށް ނެގި ޔުނައިޓެޑްގެ ސްކޮޑުގައި ރޮނާލްޑޯ ނުހިމަނާ
29 ޖުލައި 2022 | ހުކުރު 18:05ސްކޮޑުގައި ރޮނާލްޑޯ ނުހިމެނި ނަމަވެސް ޓީމާއި އަލަށް ގުޅުނު ކުޅުންތެރިން ސްކޮޑުގައި ހިމަނާފައިވޭ
ރޮނާލްޑޯ
އެތުލެޓިކޯ މެޑްރިޑާއި ދެކޮޅަށް މެންޗެސްޓަރ ޔުނައިޓެޑުން ކުޅޭ މެޗަށް ނެގި ސްކޮޑުގައި ކްރިސްޓިއާނޯ ރޮނާލްޑޯ ނުހިމަނައެވެ.
ޕްރީ ސީޒަންގައި ޔުނައިޓެޑާއި އެތުލެޓިކޯ ބައްދަލުކުރާ އެކުވެރިކަމުގެ މެޗު އޮންނާނީ ހޮނިހިރު ދުވަހުއެވެ. ނަމަވެސް މި މެޗަށް ނަގާފައިވާ ޔުނައިޓެޑްގެ ސްކޮޑުގައި ރޮނާލްޑޯ ނުހިމެނެއެވެ. އަދި އާދީއްތަ ދުވަހު ރަޔޯ ވައެކާނޯއާއި ދެކޮޅަށް ޔުނައިޓެޑް ނުކުންނަ މެޗުގައިވެސް ރޮނާލްޑޯ ނުފެނިދާނެކަމަށް ރިޕޯޓުތައް ބުނެއެވެ.
ޔުނައިޓެޑު ދޫކޮށްލަން ބޭނުންވާކަން ހާމަކުރި ފަހުން، ޔުނައިޓެޑުގެ ފަތިތަކުރުންތަކުގައި ރޮނާލްޑޯ ބައިވެރިނުވެ ގިނަ ދުވަސްތަކެއް މަޑުކުރިއެވެ. އެކަމާ ގުޅިގެން ޔުނައިޓެޑުން އޭރު ބުނީ، ފަރިތަކުރުންތަކުގައި ރޮނާލްޑޯ ބައިވެރިނުވަނީ އަމިއްލަ އާއިލީ ސަބަބަކާ ހެދި ކަމަށެވެ. ޓީމު ދޫކޮށްލަން ރޮނާލްޑޯ ބޭނުންވީ މިއަންނަ ސީޒަންގެ ޗެމްޕިއަންސް ލީގަށް ޔުނައިޓެޑް ކޮލިފައި ނުވުމުންނެވެ.
އެތުލެޓިކޯ މެޗަށް ނެގި ޔުނައިޓެޑްގެ ސްކޮޑުގައި ރޮނާލްޑޯ ނުހިމެނި ނަމަވެސް ޓީމާއި އަލަށް ގުޅުނު ކުޅުންތެރިން ސްކޮޑުގައި ހިމަނާފައިވެއެވެ. މީގެ ތެރޭގައި ކްރިސްޓެން އެރިކްސަން އަދި ޓައިރެލް މަލާސިއާގެ އިތުރުން ލިސަންޑްރޯ މާޓިނޭޒް ހިމެނެއެވެ.
