ދަ ގްރާންޑޭއިން ލީގުގައި ދެވަނަ ޕޮއިންޓް ހޯދައިފި

މޮޅެއް ނުލިބި, ދިވެހި ޕްރިމިއަރ ލީގު ތާވަލްގެ ފުލުގައި އޮތް ދަ ގްރާންޑޭއިން ބާކީ އެއް މެޗު އޮއްވާ ދެވަނަ ޕޮއިންޓް ހޯދައިފިއެވެ.

ދަ ގްރާންޑޭއިން ދެވަނަ ޕޮއިންޓް ހޯދީ ފަހު ބުރުގައި ގްރީން ސްޓްރީޓްސްއާ އެއްވަރުކޮށްގެންނެވެ. މެޗު އެއްވަރުވީ 1-1 ނެވެ. މެޗު ފަށައިގެން 17 ވަނަ މިނެޓްގައި ކުރި ހޯދީވެސް ދަ ގްރާންޑޭއިންނެވެ. އެޓީމަށް ލަނޑު ޖަހައިދިނީ ހޫގޯ ނިކޮލަސްއެވެ. އޭގެ ހަތް މިނެޓްފަހުން ގްރީންއަށް ނަތީޖާ ހަމަހަމަކޮށްދިނީ ކެޕްޓަން ރިލްވާން ވަހީދެވެ. ކޮންމެ ޓީމަކަށްވެސް ލީގުގައި ބާކީ އޮތީ އެއް މެޗެވެ. ތާވަލްގެ ފުލުން ސަލާމަތްވާނެ އެއްވެސް ގޮތެއް ދަ ގްރާންޑޭއަކަށް ނެތެވެ. އެކަމަކު ގްރީން މޮޅުނުވުމުން ތާވަލްގެ ތިންވަނައަށް ޖެހިލަން ލިބުނު ފުރުޞަތު ގެއްލުނީއެވެ. ގްރީންއަށް ލިބެނީ 27 ޕޮއިންޓާއެކު ފަސްވަނައެވެ.

ލީގުގެ ފަހު މެޗުތައް ކުޅޭނީ މިމަހުގެ 31 ވަނަ ދުވަހާއި, އަންނަ އޮގަސްޓް މަހުގެ އެއްވަނަ ދުވަހުއެވެ. މިހާތަނަށް ޔަޤީންވެފައިވަނީ އެއްވަނައާއި ދެވަނައިގެ އިތުރުން ހަތްވަނައާއި އަށްވަނައެވެ. ގަދަ ހަތަރެއްގެ ދެ ޖާގަ އަދި ޔަޤީން ނުވެއެވެ.