އިޓަލީވިލާތުގެ ވެނިސްއޭ ދެންނެވުމުން އިތުރު ތައާރަފަކަށް ބޭނުމެއް ނުވާނެއެވެ. އެއީ މިއަދުވެސް ދުނިޔޭގެ އެކި ކަންކޮޅުތަކުން އެތައް ބައެއްގެ ދުލުކުރީގައި އޮންނަ، އެންމެ ހިތްގައިމު ކަމަށް ބުނާ ފަތުރުވެރި މަންޒިލެވެ. ވެނިސްއަށް ޒިޔާރަތް ކުރާ ފަތުރުވެރިންގެ އަދަދު އިންތިހާއަށް އިތުރުވެ، "އެކްސެސް ޓުއަރިޒަމް"ގެ މައްސަލައާ ކުރިމަތިލާން ޖެހިފައިވާއިރު، އެކަމަށް ހައްލު ހޯދުމުގެ ގޮތުން، ވެނިސްގެ ލޯކަލް ގަވަމަންޓުން މިހާރު ވަނީ އެ ސިޓީއަށް ޒިޔާރަތް ކުރެވޭ އުސޫލުތައް ހަރުކަށި ކުރަން ނިންމާފައެވެ.

އެގޮތުން، ވެނިސްއަށް ޒިޔާރަތް ކުރަން ބޭނުންވާ ފަރާތްތަކުން ހާއްސަ ދަފުތަރެއްގައި ނަން ނޯޓު ކުރަން ޖެހޭއިރު، ސިޓީއަށް އެތެރެވުމަށް އެކަނިވެސް ހާއްސަ ފީއެއް ދައްކަން ޖެހެއެވެ. މިއީ ހައްލެއް ކަމަށް ލޯކަލް ގަވަމަންޓުން ބުނި ނަމަވެސް، ވެނިސްއަށް ޒިޔާރަތް ކުރާ ފަރާތްތަކާއި، ވިޔަފާރިވެރިން އެކަމާ މާ ގަބޫލެއް ނޫނެވެ. އާ ނިޒާމަކީ އިންސާފެއްނެތް ނިޒާމަކަށްވާއިރު، ލޮޖިސްޓިކްސްގެ ގޮތުންވެސް ގޮންޖެހުންތަކަކާ ކުރިމަތިލާން ޖެހޭކަމުގެ ޝަކުވާ އުފުލައެވެ.

ވެނިސްއަކީ ދުނިޔޭގެ ނިސްބަތުން ބަލާއިރު އެ ސިޓީއަކަށް އެންމެ ގިނަ އަދަދަކަށް ފަތުރުވެރިން ޒިޔާރަތް ކުރާ ސިޓީއެވެ. ރަށު ތެރެއިން ފެން ކޯރުތައް ދެމިގެންދާ އެ ހިތްގައިމު ސިޓީގެ މީރު ޕިއްޒާގެ ކޭންތަކަށް އިންސާފު ކުރުމަށް، ދުނިޔޭގެ އެކި ކަންކޮޅުތަކުން އަހަރެއްގެ މައްޗަށް 20 މިލިއަން ފަތުރުވެރިން ޒިޔާރަތް ކުރެއެވެ.

ވެނިސްގެ ކައުންސިލުން ބުނީ އެ ސިޓީއަށް އެތެރެވުމަށް ފީއެއް ދެއްކުމަށާއި، ހާއްސަ ދަފުތަރެއްގައި ނަން ނޯޓު ކުރަން ޖެހޭ ގޮތަށް ލާޒިމު ކުރީ، ޕީކް ދުވަސްވަރުގައި އެތެރެވާ ފަތުރުވެރިންގެ އަދަދު ކޮންޓްރޯލް ކުރުމަށް ކަމަށެވެ.

އާ ނިޒާމްގެ ތެރެއިން ފީ ނަގަނީ ހަމަ އެކަނި ދުވާލުގެ ވަގުތަކުގައި ވެނިސްއަށް ޒިޔާރަތް ކުރާ ފަތުރުވެރިންގެ އަތުންނެވެ. ރޭ ކުރާ ފަތުރުވެރިންގެ އަތުން ވަކި ފީއެއް ނުނަގަނީ، އެކޮމޮޑޭޝަންގެ ތެރެއިން ސިޓީ ޓެކްސް ކަނޑާތީއެވެ.

ކަން މިހެން އޮތް ނަމަވެސް، މި ނިންމުމާ މެދު ވެނިސްގެ ރަށްވެހިންނާއި ވިޔަފާރިވެރިން މާ ރުހޭ ކަމަކަށް ނުފެނެއެވެ.

ވެނިސް ގޮންޑޮލިއަރ އެސޯސިއޭޝަންގެ ރައީސް، އޭންޑްރިއާ ބަލްބީ ބުނީ މިއީ ރަނގަޅު ނިންމުމެއް ކަމެއް ނުވަތަ ނޫން ކަމެއްވެސް ބުނަން އަދި ނޭނގޭ ކަމަށެވެ. އެހެނީ މި ނިޒާމު މަސައްކަތް ކުރާނެ ކަން ނުވަތަ ނޫން ކަންވެސް ނޭނގޭތީ ކަމަށް އޭނާ ފާހަގަ ކުރިއެވެ.

ފަތުރުވެރިންގެ މެދުގައިވެސް ވާހަކަ ހުރީ އެ ފަދަ ގޮތަކަށެވެ.

މިހާ ހިސާބުން އުފެދޭ ބޮޑު ސުވާލަކީ އާ ގަވާއިދު އެންމެ ފުރިހަމަ ގޮތުގައި ރެގިއުލޭޓް ކުރާނެ ގޮތަކާ މެދު ކުރެވޭ ސުވާލެވެ. ވެނިސްގައި ވަޒީފާ އަދާ ކުރުމަށް، ކިއެވުމަށް ނުވަތަ އާއިލާ މެންބަރުންގެ ގާތަށް ޒިޔާރަތް ކުރާ މީހުންގެ އިތުރުން ސަގާފީ ނުވަތަ ކުޅިވަރު އިވެންޓެއްގައި ބައިވެރިވުމަށް ވެނިސްއަށް ޒިޔާރަތް ކުރާ މީހުންގެ އަތުން އެ ފީ ނަގާ ގޮތަށް ހަމަޖެހިފައެއް ނެތެވެ. އިސްތިސްނާ ލިބޭ ގިންތީގައި ހިމެނޭ މީހަކު ނަމަ، އެކަން ބަޔާން ކުރާ އިގުރާރެއްގައި ސޮއި ކުރަން ޖެހެއެވެ. އެމީހަކު ދޮގު ހެދިކަން ފަޅާ އަރައިފިނަމަ، ޖިނާއީ ކުށެއްގެ ގޮތުގައި މައްސަލަ ބަލައެވެ.

ފަތުރުވެރިން ތޮއްޖެހުމުގެ މައްސަލައަށް ހައްލު ހޯދުމަށް ވެނިސްއިން ތަންފީޒު ކުރާ އާ ނިޒާމުގައި ހުރި ފެންވަރު ވަޒަން ކުރުން، މި ހޫނު މޫސުމުގައި ކުރިއަށްގެންދާ ގޮތަށް ވަނީ ހަމަޖެހިފައެވެ. އަދި ރަސްމީކޮށް ނިޒާމް ތަންފީޒު ކުރާނީ ޖެނުއަރީ 2023 ގައި ކަމަށް މައުލޫމާތު ލިބެއެވެ.

މިއާއެކު ވެނިސް ވެގެން ދާނީ، ފަތުރުވެރިން ޒިޔާރަތް ކުރުމަށް ފީއެއް ނަގާ، ދުނިޔޭގެ ފުރަތަމަ ސިޓީއަށެވެ.