މެންޗެސްޓަރ ޔުނައިޓެޑު ދޫކޮށްލަން ބޭނުންވާކަން ހާމަކޮށްފައިވާ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އެ ޓީމުގެ ފަތިތަކުރުންތަކުގައި ބައިވެރިވުމަށް ތައްޔާރުވެއްޖެއެވެ.
ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި ޔުނައިޓެޑުގެ ޕްރީ ސީޒަން ފަރިތަކުރުންތަކުގައި މިއަދު ރޮނާލްޑޯ ބައިވެރިވާނެއެވެ. އެއީ ޓީމު ބަދަލުކުރަން ރޮނާލްޑޯ ބޭނުންވި ނަމަވެސް، އެއްވެސް ކުލަބަކުން އޭނާ ގެންދަން ބޭނުންނުވެ، ދިގުދެމިގެންދާތީ ކަމަށް ރިޕޯޓުތައް ބުނެއެވެ. ޔުނައިޓެޑު ދޫކޮށްލަން ބޭނުންވާކަން ހާމަކުރި ފަހުން، ޔުނައިޓެޑުގެ ފަތިތަކުރުންތަކުގައި ރޮނާލްޑޯ ބައިވެރިވެފައެއް ނުވެއެވެ. އެކަމާ ގުޅިގެން ޔުނައިޓެޑުން އޭރު ބުނީ، ފަރިތަކުރުންތަކުގައި ރޮނާލްޑޯ ބައިވެރިނުވަނީ އަމިއްލަ އާއިލީ ސަބަބަކާ ހެދި ކަމަށެވެ.
މީގެ އިތުރުން ރިޕޯޓުތައް ބުނާ ގޮތުގައި ޓެން ހާގް ބޭނުންވަނީ ރޮނާލްޑޯއާ ބައްދަލުކޮށް، ޓީމު ބަދަލުކުރުމުގެ ވިސްނުން ދޫކޮށްލަން އެދެންކަމަށެވެ. މީގެ ކުރިން ޓެން ހާގް ވަނީ ރޮނާލްޑޯއަކީ އޭނާގެ ޕްލޭންގައި މުހިންމު ކުޅުންތެރިއެއް ކަމަށް ވެސް ބުނެފައެވެ.
ޓީމު ދޫކޮށްލަން ރޮނާލްޑޯ ބޭނުންވާ ސަބަބަކީ ކުރިއަށް އޮތް ސީޒަނުގެ ޔުއެފާ ޗެމްޕިއަންސް ލީގުގެ ޖާގަ ޔުނައިޓެޑަށް ގެއްލުމުންނެވެ. އަންނަ ސީޒަނުގައި ޔުނައިޓެޑު ވާދަކުރާނީ ޔޫރޮޕާ ލީގުގައެވެ. ޗެމްޕިއަންސް ލީގުގައި ވާދަކުރާ ބޮޑު ކުލަބަކުން ރޮނާލްޑޯއަށް ޖާގަ ހޯދުމަށް އޭނާގެ އެޖެންޓު ޖޯޖް މެންޑޭސް މަސައްކަތް ކުރި ނަމަވެސް، އެ މަސައްކަތް ކާމިޔާބުވާ ގޮތް ނުވާކަމަށް ރިޕޯޓުތައް ބުނެއެވެ.
އެގޮތުން ޕެރިސް ސެއިންޓް ޖާމަން (ޕީއެސްޖީ)ން އެ ޓީމުގައި ރޮނާލްޑޯ ހިމަނަން ބޭނުންނުވާއިރު، ބަޔާން މިއުނިކްގެ ކޯޗު ހޫލިއަން ނާގަލްސްމަންއާއި ސްޕޯޓިން ޑިރެކްޓަރު ހަސަން ސަލިހަމްދްޒިޗް ބުނީ މިވަގުތު ރޮނާލްޑޯގެ ސޮއި ހޯދުމަކީ ޖަރުމަނު ލީގައި ބަޔާނަށް ވެސް އެންމެ ރަނގަޅު ގޮތް ނޫން ކަމަށެވެ. މީގެ އިތުރުން އިނގިރޭސި ޕްރިމިއަރ ލީގުގެ ޗެލްސީގެ ކޯޗު ތޯމަސް ޓުޗެލް ވެސް ވަނީ ރޮނާލްޑޯ ބޭނުންނުވާކަން ހާމަކޮށްފައެވ. އޭނާ ބުނީ ޗެލްސީގެ އަމާޒަކީ ޓީމުގެ ޑިފެންސް ވަރުގަދަ ކުރުން ކަމަށެވެ.
ދެން ރޮނާލްޑޯ ބަދަލުވުމުގެ ވާހަކަތައް ދެކެވެނީ އެތުލެޓިކޯ މެޑްރިޑަށެވެ. ރިޕޯޓުތައް ބުނާ ގޮތުގައި އެ ޓީމުގެ ރައީސް އެންރީކޭ ސެރޭޒޯ ވަނީ އެކަމާ ގުޅޭ ގޮތުން ޓީމުގެ ކޯޗު ޑިއޭގޯ ސިމިއޯނީއާ މަޝްވަރާކޮށް، ރޮނާލްޑޯއަށް ބިޑު ކުރުމާ ގުޅޭ ގޮތުން މަޝްވަރާކޮށްފައެވެ. އެވާހަކަތައް ދެކެވެމުން ދިޔަ ދަނޑިވަޅެއްގައި އެތުލެޓިކޯގެ ބައެއް ސަޕޯޓަރުން ވަނީ ރޮނާލްޑޯ އެ ޓީމަށް ގެނައުމާ ދެކޮޅު ކެމްޕެއިނެއް ފަށާފައެވެ. ނަމަވެސް، އެ ޓީމުގެ ބައެއް ސަޕޯޓަރުން މި ކެމްޕެއިނާ ދެކޮޅެވެ.
