އަބޫ ދާބީގެ ވިޒް އެއަރގެ ދަތުރުތައް ރާއްޖެއަށް ފަށަނީ
ވިޒް އެއަރއިން ރާއްޖެއަށް ދަތުރު ފަށަން ތާވަލުކޮށްފައިވަނީ އޮކްޓޯބަރު މަހު
ވިޒް އެއަރގެ ބޯޓެއް
ޔުނައިޓެޑް އަރަބް އެމިރޭޓްސްގެ ބަޖެޓް އެއަރލައިނެއް ކަމަށްވާ ވިޒް އެއަރއިން ރާއްޖެއަށް ދަތުރުތައް ފަށަން ތައްޔާރުވެއްޖެއެވެ.
އެ އެއަރލައިނުން ރާއްޖެއަށް ދަތުރުތައް ފަށަން ތާވަލުކޮށްފައިވަނީ އަންނަ އޮކްޓޯބަރު މަހުން ފެށިގެންނެވެ. އަބޫ ދާބީއާ ރާއްޖެއާ ދެމެދު ކުރާ މި ދަތުރުތަކަށް މިހާރު ވަނީ ޓިކެޓްވެސް ވިއްކަން ފަށާފައެވެ.
ވިޒް އެއަރއިން ރާއްޖެއަށް ހަފުތާއަކު 4 ދުވަހު ދަތުރުތައް ބާއްވާނެއެވެ. އެއީ ހޮނިހިރު، އާދީއްތަ، އަންގާރަ އަދި ބުރާސްފަތި ދުވަހުއެވެ. މި ދަތުރުތަކުގައި ބޭނުންކުރާނީ އެ އެއަރލައިންގެ އެއަރބަސް އޭ321 ނިއޯ މަރުކާގެ ބޯޓުތައް ކަމަށްވެސް ވަނީ ބުނެފައެވެ.
ވިޒް އެއަރއަކީ 2021 ވަނަ އަހަރުގެ ޖެނުއަރީ މަހު ފެށި އެއަރލައިނެކެވެ. އެ އެއަރލައިނުން މިހާރުވެސް އަންނަނީ 32 މަންޒިލަކަށް ދަތުރުކުރަމުންނެވެ. ރާއްޖޭގެ އިތުރުން ކުވައިތަށްވެސް ދަތުރުތައް ފެށުމަށް އެ އެއަރލައިނުން ވަނީ ނިންމާފައެވެ.
އޮކްޓޯބަރު މަހު ވިޒް އެއަރގެ ދަތުރުތައް ރާއްޖެއަށް ފަށާއިރު، އަހަރުގެ ފަހުކޮޅަކީ ރާއްޖެއަށް ގިނަ އަދަދެއްގެ ފަތުރުވެރިން އަންނަ ދުވަސްވަރެކެވެ. މިއަހަރުގެ މިހާތަނަށްވެސް 9 ލައްކައަށްވުރެ ގިނަ ފަތުރުވެރިން ވަނީ ރާއްޖެއައިސްފައެވެ.
