މިއަހަރުގެ ފުރަތަމަ ހަ މަސް ދުވަހު ކްލެމެންސީ ބޯޑުން 161 މައްސަލަ ނިންމައިފި
ބޯޑަށް ޖުމުލަ 257 މައްސަލައެއް ހުށައެޅިފައިވޭ
ކްލެމެންސީ ބޯޑަކީ މަޢާފުދިނުމާއި އަދަބު ލުއިކޮށްދިނުމަށް އެދި ހުށައަޅާ ހުށައެޅުންތައް ދިރާސާކުރާ ބޯޑެއް
މިއަހަރުގެ ފުރަތަމަ ހަ މަސް ދުވަހު ކްލެމެންސީ ބޮޑުން 161 މައްސަލަ ނިންމައިފިއެވެ.
މިއަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް ކްލެމެންސީ ބޯޑުން ކޮށްފައިވާ މަސައްކަތްތަކަށް ބަލާއިރު، ބޯޑަށް ޖުމުލަ 257 މައްސަލައެއް ހުށައެޅިފައިވެއެވެ. އޭގެ ތެރެއިން 161 މައްސަލައެއް ބޯޑުން ވަނީ ނިންމާފައެވެ.
ބޯޑަށް ހުށައެޅުނު މައްސަލަތަކުގެ ތެރެއިން 23 މައްސަލައެއް ވަނީ އެކި ސަބަބުތަކާހުރެ ކެންސަލް ކޮށްފައެވެ. އަދި މިހާރު ނުނިމި ހުރި މައްސަލަތަކުގެ އަދަދަކީ 73 އެވެ.
ކްލެމެންސީ ބޯޑަކީ މަޢާފުދިނުމާއި އަދަބު ލުއިކޮށްދިނުމަށް އެދި ރައީސުލްޖުމްހޫރިއްޔާއަށް އިލްތިމާސް ހުށަހެޅުމުން، އެ އިލްތިމާސް ދިރާސާކޮށް ޢަމަލު ކުރުމަށް ފެންނަ ގޮތުގެ ލަފާދިނުމަށް އެކުލަވާލާފައިވާ ބޯޑެކެވެ.
ކްލެމެންސީ ބޯޑު ޙަރަކާތްތެރިވާނީ އެޓަރނީ ޖެނެރަލްގެ ބެއްލެވުމުގެ ދަށުންނެވެ. ބޯޑުގެ ރައީސަކީ އެޓަރނީ ޖެނަރަލް އަލްއުސްތާޒު އިބްރާހިމް ރިފްފަތެވެ.
މަޢާފުދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން އުފައްދާފައިވާ ބޯޑުގައި 11 މެމްބަރުން ހިމެނެއެވެ.
ބޯޑުގައި ހިމެނެނީ ޤާނޫނީ ދާއިރާއިން މީހަކާއި ތަޢުލީމީ ދާއިރާގެ މީހަކާއި އިޖުތިމާއީ ދާއިރާގެ މީހަކާއި ޞިއްޙީ ދާއިރާގެ މީހަކާއި ދީނީ ޢިލްމުގެ މީހަކާއި މަދަނީ ޖަމްޢިއްޔާއެއްގެ މީހެއްގެ އިތުރުން ޕެރޯލް ބޯޑުގެ މެންބަރަކާއި ފުލުހުންގެ ދާއިރާގެ މީހަކާއި ޝަރުޢީ ދާއިރާގެ މީހެއްގެ އިތުރުން ރައްޔިތުންގެ މަޖިލީހުން އައްޔަންކުރައްވާ މެންބަރެކެވެ.
ކްލެމެންސީ ބޯޑުން މިދިޔަ އަހަރު ރެކޯޑު އަދަދަކަށް ވަނީ މައްސަލަތައް ނިންމާފައެވެ. އެގޮތުން މިދިޔަ އަހަރު 609 މައްސަލަ ނިންމާފައިވާ ކަމަށް އެޓާރނީ ޖެނެރަލްގެ އޮފީހުން މައުލޫމާތު ދެއެވެ.
މިއީ ފާއިތުވި 11 އަހަރުގެ ތެރޭގައި މިހާ ގިނަ އަދަދަކަށް މައްސަލަތައް ނިންމި ފުރަތަމަ ފަހަރެވެ. ވޭތުވެދިޔަ 11 އަހަރު އެވްރެޖުކޮށް ނިންމި މައްސަލަތަކާ ބަލާއިރު މިއީ 356 ޕަސެންޓް އިތުރުވުމެއް ކަމަށް އޭޖީ އޮފީހުން ބުނެއެވެ.
