ތަމްރީނުތަކަށް އަންހެން ބާސްކެޓުބޯޅަ ޓީމު އިންޑިއާއަށް

ބައިނަލްއަޤުވާމީ ތަމްރީނުތަކެއްގައި ޤައުމީ އަންހެން ސީނިއަރ ބާސްކެޓު ޓީމާއި، 18 އަހަރުން ދަށުގެ ބާސްކެޓު ޓީމު އިންޑިއާއަށް ފުރައިފިއެވެ.

މިއީ މިއަހަރުގެ ސެޕްޓެމްބަރު މަހުގެ ތެރޭގައި ރާއްޖޭގައި ބޭއްވުމަށް ހަމަޖެހިފައިވާ ބައިނަލްއަޤުވާމީ ބާސްކެޓު މުބާރާތް ކަމަށްވާ ސައުތު އޭޝިއަން ބާސްކެޓްބޯލް އެސޯސިއޭޝަން (ސާބާ) ބާސްކެޓުބޯލް ޗެމްޕިއަންޝިޕާއި، އިންޑިއާގައި ބާއްވާ 18 އަހަރުން ދަށުގެ އަންހެން މުބާރާތަށް ފަރިތަކުރުމުގެ ގޮތުން ކުރިއަށް ގެންދާ ތަމްރީނުތަކެކެވެ. އިންޑިއާގައި މި ތަމްރީނުތައް ކުރިއަށް ދާނީ 10 ދުވަހުގެ މުއްދަތަކަށެވެ.

ތަމްރީނުތަކަށް ފުރި ޓީމާ ޔޫތު މިނިސްޓަރު އަޙުމަދު މަޚްލޫފް ވަނީ ހޮނިހިރު ދުވަހު ބައްދަލުކުރައްވާފައެވެ. އެ ބައްދަލުވުމުގައި މިނިސްޓަރު ވަނީ ދެ ޓީމަށް ވެސް ހިތްވަރު ދެއްވައި، ކާމިޔާބަށް އެދިފައެވެ. ތަމްރީނުތަކަށް ޓީމު ފުރައިފަވަނީ މި މަހުގެ 17 ވަނަ ދުވަހުއެވެ.

ބައިނަލްއަޤުވާމީ ގިނަ މުބާރާތްތަކެއް މިއަހަރު ރާއްޖޭގައި ބާއްވާއިރު، ބާސްކެޓު މުބާރާތަކީ އޭގެ ތެރެއިން އެއް މުބާރާތެވެ. ބައިނަލްއަޤުވާމީ ފުރަތަމަ މުބާރާތެއްގެ ގޮތުގައި މިއަހަރު ރާއްޖޭގައި ބާއްވާފައިވަނީ، ސައުތު އޭޝިއަން ޖޫނިއަރ އެންޑް ކެޑޭޓް ޓޭބަލް ޓެނިސް މުބާރާތެވެ. އޭގެ ފަހުން ދެ ވަނަ މުބާރާތެއްގެ ގޮތުގައި ބޭއްވީ ވެސްޓާން އޭޝިއަން ޖޫނިއަރ ޗެސް ޗެމްޕިއަންޝިޕްއެވެ. މިއީ އަތޮޅުތެރޭ ރަށެއްގައި ބައިނަލްއަޤުވާމީ މުބާރާތެއް ބޭއްވި ފުރަތަމަ ފަހަރެވެ. އެ މުބާރާތް ބާއްވާފައިވަނީ އއ.އުކުޅަހުގައެވެ.

ތިންވަނަ މުބާރާތެއްގެ ގޮތުގައި މިހާރު ކުރިއަށްދާ އޭޝިއަން ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް ބާއްވަނީ ކ.މާފުށީގައެވެ. މި މަހުގެ ފަހުކޮޅު ވިޒިޓް މޯލްޑިވްސް ޕްރޯ 2022 ކުރިއަށްދާނެއެވެ. މީގެ އިތުރުން މިއަހަރުގެ ތެރޭގައި ސެންޓްރަލް ޒޯން ވޮލީ ބޯޅަ މުބާރާތް ރާއްޖޭގައި ބާއްވާއިރު، ބީޗް ވޮލީ މުބާރާތެއް ވެސް ބާއްވާނެއެވެ.