ގޮތަބަޔާ ރާއްޖޭން ފުރާވަޑައިގަތުމުގައި އިންޑިއާގެ އަތެއް ނޯންނާނެ: ހައިކޮމިޝަން
ގޮތަބަޔާ ފުރާވަޑައިގަތުމުގައި އިންޑިއާގެ އަތެއް ވާކަމަށް ބައެއް ފަރާތްތަކުން ދަނީ ޚަބަރު ފަތުރަމުން
އިންޑިއާ ހައިކޮމިޝަން
ސްރީލަންކާގެ ރައީސް ގޮތަބަޔާ ރާޖަޕަކްސަ ރާއްޖޭން ފުރާވަޑައިގަތުމުގައި އިންޑިއާގެ އެއްވެސް އަތެއް ނޯންނާނެކަމަށް، ރާއްޖޭގައި ހުންނަ އިންޑިއާ ހައިކޮމިޝަނުން ބުނެފިއެވެ.
އެ ކޮމިޝަނުގެ ރަސްމީ ޓްވިޓަރ އެކައުންޓުން ބުރާސްފަތި ދުވަހު ކުރި ޓްވީޓެއްގައި ބުނެފައިވަނީ، ގޮތަބަޔާ ރާއްޖޭން ފުރާވަޑައިގަތުމުގައި އިންޑިއާ ސަރުކާރުގެ އަތެއް ވާކަމަށް ދެކެވޭ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއްކަމަށެވެ. އަދި އެ ކަމުގައި އިންޑިއާ ސަރުކާރުގެ އެއްވެސް ބައިވެރިވުމެއް ނޯންނާނެ ކަމަށްވެސް ވަނީ ބުނެފައެވެ.
އިންޑިއާ ހައިކޮމިޝަނުން މިހެން ބުނީ ގޮތަބަޔާ ރާއްޖެއަށް ވަޑައިގަތުމުގައްޔާއި ރާއްޖެއިން ފުރާވަޑައިގަތުމުގައި އިންޑިއާ ސަރުކާރުގެ އަތެއް ވާކަމަށް ބުނެ ބައެއް ފަރާތްތަކުން ޚަބަރު ފެތުރުމާ ގުޅިގެންނެވެ. އިންޑިއާއިން ވަނީ ގޮތަބަޔާ އެ ގައުމަށް ވަޑައިގަތުމުގެ ހުއްދަ ނުދޭންވެސް ނިންމާފައެވެ.
ރާއްޖޭގައި 1 ދުވަސް ހޭދަކުރެއްވުމަށްފަހު ގޮތަބަޔާ ވަނީ ބުރާސްފަތި ދުވަހު ސިންގަޕޫރަށް ވަޑައިގެންފައެވެ. އެމަނިކުފާނު ލަންކާ ދޫކުރައްވައި ފިއްލަވައިގެން ރާއްޖެވަޑައިގަތީ އަންގާރަ ދުވަހުގެ ރޭ ދަންވަރުގެ ވަގުތެއްގައެވެ. އެމަނިކުފާނަށް ރާއްޖެ ވަޑައިގަތުމަށް ދައުވަތުދެއްވީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުކަމަށް ބޭރުގެ މީޑިއާތަކުން ރިޕޯޓްކުރެއެވެ. ނަމަވެސް އެކަމާގުޅޭގޮތުން މިހާތަނަށް ރައީސް ނަޝީދު އެއްޗެއް ވިދާޅުވެފައިނުވާއިރު، މަޖިލީހުން ބުނަނީ އެފަދަ ޚަބަރެއް ލިބިފައިނުވާކަމަށެވެ.
ލަންކާ ދޫކުރައްވައި ފިއްލަވައިގެން ގޮތަބަޔާ ރާއްޖެ ވަޑައިގަތުމުން ލަންކާގެ ގިނަ ބަޔަކު ވަނީ ނުރުހުން ފާޅުކޮށްފައެވެ. އެގޮތުން، ރާއްޖޭގައި ތިބި ލަންކާގެ ރައްޔިތުންވެސް ބުދަ ދުވަހު ވަނީ، ގޮތަބަޔާއަށް އެހީތެރިކަން ފޯރުކޮށްނުދިނުމަށާއި އެމަނިކުފާނު އަނބުރާ ލަންކާއަށް ފޮނުވައިދިނުމަށް އެދި މުޒާހަރާކޮށްފައެވެ.
ގޮތަބަޔާ ރާއްޖެއިން ސިންގަޕޫރަށް މިހާރު ވަޑައިގެންފައިވާއިރު، ބޭރުގެ ރިޕޯޓުތައް ބުނާގޮތުގައި އެމަނިކުފާނު ދެން ވަޑައިގަންނަވާނީ ސައޫދީ އަރަބިއްޔާއަށެވެ. އެ ގައުމުން އެ މަނިކުފާނަށް ހިމާޔަތްދީފައިވާ ކަމަށްވެސް ބޭރުގެ މީޑިއާތަކުން ރިޕޯޓްކުރެއެވެ.
