އިނގިރޭސިވިލާތުގެ އައު ބޮޑުވަޒީރު އިއުލާންކުރުން ސެޕްޓެމްބަރު 5 ގައި

އިނގިރޭސި ވިލާތުގެ ބޮޑުވަޒީރުގެ މަގާމަށް ބޮރިސް ޖޯންސަންގެ ބަދަލުގައި އަންނާނެ ބޭފުޅަކު އަންނަ ސެޕްޓެމްބަރު މަހުގެ 5 ގައި އިއުލާންކުރަން ނިންމައިފިއެވެ.

އެ ޤައުމުގެ ބޮޑުވަޒީރަކު ހޮވަން ވެރިކަން ކުރާ ޕާޓީ ކޮންސަވޭޓިވް ޕާޓީން ވަނީ މިހާރު ވެސް މަސައްކަތް ފަށައިފައެވެ. އެގޮތުން، މިހާތަނަށް 11 މެމްބަރަކު އެ މަގާމަށް ޝައުގުވެރިކަން ފާޅުކޮށްފައިވާއިރު ޖުމްލަ 20 މެމްބަރުން ކުރިމަތިލާނެ ކަމަށް ކޮންޒަވޭޓިވް ޕާޓީގެ 1922 ކޮމިޓީގެ ޗެއާމަން ގްރަހަމް ބްރެޑީ ވަނީ ވިދާޅުވެފައެވެ.

ބޮޑުވަޒީރު ހޮވާނީ އެ ޤައުމުގެ ގާނޫނު ހަދާ މަޖިލީހުގައި ތިއްބަވާ ކޮންޒަވޭޓިވް ޕާޓީގެ 358 މެމްބަރުންގެ ތެރެއިންނެވެ. އެ މަގާމަށް ކުރިމަތިލާ މެމްބަރުންގެ މެދުގައި ނަގާ ވޯޓުގެ ފުރަތަމަ ބުރު ބުދަ ދުވަހު އޮންނައިރު އެ އިންތިޚާބުގައި 30 ވޯޓަށްވުރެ މަދުން ލިބޭ ކެނޑިޑޭޓުން އެލިމިނޭޓްވާނެއެވެ. އެއަށްފަހު ބުރާސްފަތި ދުވަހު އިތުރު ވޯޓެއް ނަގާނެއެވެ.

ކުރިމަތިލާ މެމްބަރުންގެ ތެރެއިން ފަހު އިންތިޚާބުގައި ވާދަ ކުރާނީ 2 މެމްބަރުންނެވެ. އެ 2 ކެނޑިޑޭޓުންނަށް ކޮންޒަވޭޓިވް ޕާޓީގެ ހުރިހާ މެމްބަރުންނަށް ވޯޓު ދެވޭއިރު މި އިންތިޚާބު އޮންނާނީ އޮގަސްޓު ފަހުކޮޅުގައެވެ.

ބޮރިސް ޖޯންސަން އިނގިރޭސިވިލާތުގެ ބޮޑުވަޒީރުކަމުގެ މަގާމުން އިސްތިއުފާ ދެއްވީ އާއްމުން ހިތްހަމަނުޖެހޭފަދަ ގިނަ ވާހަކަތަކެއް ފެތުރިގެން ދިއުމާއި، ޕާޓީގެ ގިނަ އަދަދެއްގެ މެމްބަރުންގެ ސަޕޯޓް ގެއްލިގެން ދިއުމާއެކު އިސްތިއުފާ ދެއްވަން މަޖުބޫރުވެވަޑައިގެންނެވެ. އެމަނިކުފާނުގެ ސަރުކާރުން، ކެބިނެޓް މިނިސްޓަރުންނާއި މަޖިލިސް މެމްބަރުން ހިމެނޭހެން 50އަށްވުރެ ގިނަ އިސް މެމްބަރުން، މަގާމުން އިސްތިއުފާދެއްވާފައިވާއިރު، މަޖިލީހުގެ ގިނަ މެމްބަރުން ވަނީ ބޮރިސް ޖޯންސަން މަގާމުން އިސްތިއުފާދެއްވަން ޖެހޭކަމަށް ވިދާޅުވެފައެވެ. މިއާއެކު ބޮރިސް ޖޯންސަން ވަނީ ބުރާސްފަތި ދުވަހު މަގާމުން އިސްތިއުފާދެއްވާނެކަމަށް ވިދާޅުވެފައެވެ.

މަގާމުން އިސްތިއުފާދެއްވަމުން ބޮރިސް ޖޯންސަން ވަނީ، ގައުމުގެ އައު ބޮޑުވަޒީރު އައްޔަންކުރުމުގެ މަސައްކަތް މިހާރު ފަށަންޖެހޭކަމަށް ވިދާޅުވެފައެވެ. އަދި އައު ބޮޑުވަޒީރަކު އައްޔަނުކުރެއްވެންދެން މަގާމުގައި މަޑުކުރައްވާނެ ކަމަށް ވެސް ވިދާޅުވިއެވެ.