ލަންކާގެ އާންމު ރައްޔިތުންނަށް ކައްކާ ގޭސް ފޯރުކޮށްދިނުމުގެ މަސައްކަތް އެގައުމުގެ ލިޓްރޯ ގޭސް ކުންފުނިން ފަށައިފިއެވެ.

ރިޕޯޓުތައް ބުނާގޮތުން ހޯމަ ދުވަހު ލިޓްރޯ ކުންފުނިން ވަނީ ކޮލޮމްބޯގެ އެކި ހިސާބުތަކުގައި ކައްކާ ގޭސް ވިއްކަން އަލަށް ފަށައި އެކަން އިއުލާނުކޮށްފައެވެ. އަދި ގައުމުގެ ބާކީ ހުރި ސަރަހައްދުތަކުގައި ބުދަ ދުވަހުން ފެށިގެން ކައްކާ ގޭސް ވިއްކަން ފަށާނެ ކަމަށް އެކުންފުނިން ވަނީ ބުނެފައެވެ.

ލިޓްރޯ ކުންފުނިން ވަނީ 12.5 ކިލޯގްރާމްގެ ގޭސް ފުޅިއެއް އެންމެ އަގުބޮޑުކޮށް ވިއްކަން ކަނޑައަޅާފައިވާ އަގަކީ 4،910 ރުޕީސް ކަމަށާއި އެއަށް ވުރެ އަގުބޮޑުކޮށް ވިއްކާ ނަމަ ގޭސް ނުގަތުމަށް އިލްތިމާސްކުރާ ކަމަށް ބުނެފައެވެ.

މީގެ އިތުރުން ގޭސް ގަތުމުގެ ކުރިން އެގެއެއްގެ މެއި މަހުގެ ކަރަންޓު ބިލް ދެއްކުމަށްވެސް އެކުންފުނިން ވަނީ އެދިފައެވެ. މިއީ އެއް ބަޔަކު މާ ގިނައިން ގޭސް ގަނެ ފޮރުވާފައި ބަހައްޓަފާނެތީ އެކުންފުނިން ކުރަން ނިންމި ކަމެކެވެ.

އާދިއްތަ ދުވަހު ލަންކާއަށް ވަނީ އެގައުމުން އޯޑަރުކޮށްފައިވާ ކައްކާ ގޭހުގެ ފުރަތަމަ ޝިޕްމެންޓް ލިބިފައެވެ. އެގޮތުން ފުރަތަމަ ޝިޕްމެންޓްގައި ވަނީ 3،700 މެޓްރިކް ޓަނުގެ ކައްކާ ގޭސް ލިބިފައެވެ. އަދި އިތުރު 3،740 މެޓްރިކް ޓަނުގެ ގޭހުގެ ޝިޕްމެންޓެއް ހޯމަ ދުވަހުގެ ހަވީރު ލިބޭނެ ކަމަށް އެޤައުމުގެ ރައީސް އޮފީހާ ހަވާލާދީ ވަނީ ރިޕޯޓުކޮށްފައެވެ.

ރައީސް އޮފީހުން ނެރުނު ބަޔާނެއްގައި ވަނީ ކައްކާ ގޭސް ޝިޕްމެންޓުތައް ލިބުނުހާ އަވަހަކަށް ގޭސް ބެހުމުގެ ކަންތައްތައް ކުރިއަށް ގެންދިއުމަށް ރައީސް ގޮތަބަޔާ ރާޖަޕަކްސަ އަންގަވާފައިވާކަމަށް ބުނެފައެވެ.

އިތުރު 3،200 މެޓްރިކް ޓަނުގެ ގޭސް ޝިޕްމެންޓެއް މިމަހުގެ 15 ވަނަ ދުވަހު ލިބޭނެ ކަމަށްވެސް މީޑިއާ ރިޕޯޓުތައް ބުނެއެވެ.

އަދި ލަންކާއިން މިމަހު 33،000 މެޓްރިކް ޓަނުގެ ކައްކާ ގޭސް އޯޑަރުކޮށްފައިވާކަމަށް ރިޕޯޓުތައް ބުނެއެވެ.

ލިޓްރޯ ގޭސް ކުންފުނީގެ ޗެއަރމަން މުޑިތާ ޕެއިރިސްއާ ހަވާލާދީ ރައީސް އޮފީހުގެ ބަޔާނުގައި ވަނީ ޖުލައި 12 ވަނަ ދުވަހުން ފެށިގެން އެކުންފުނިން އާންމުކޮށް ގޭސް ބަހަން ފަށާނެ ކަމަށާއި މިމަސް ނިމެންވާ އިރަށް އާންމުންނަށް ބޭނުންވާ ގޭސް ލިބުމުގައި ދިމާވާ މައްސަލަތަކަށް ހައްލެއް ލިބޭނެ ކަމަށެވެ.

ލަންކާއަށް ދިމާވެފައިވާ އިގުތިސާދީ ކާރިސާގައި އެގައުމަށް ބޭނުންވާ ތެލާ ގޭހުގެ އިމްޕޯޓަށް ޚަރަދުކުރާނެ ފައިސާ ނެތުމުން އެގައުމަށް ވަނީ ތެޔޮ އަދި ގޭހުގެ ސަޕްލައި ހޯދުމުގައި ދަތިތަކާ ކުރިމަތިލާންޖެހިފައެވެ.