ސަސް އަތުން ގްރީންއަށް ރަނގަޅު މޮޅެއް، 5 ވަނައަށް!
20 ޕޮއިންޓާއެކު ތިން ޓީމް އެބައޮތް
ލަނޑު ޖެހުމަށްފަހު ގްރީންގެ ކުޅުންތެރިން އުފާފާޅުކުރަނީ
ސުޕަރ ޔުނައިޓެޑް ސްޕޯރޓްސް (ސަސް) ބަލިކޮށް, ދިވެހި ޕްރިމިއަރ ލީގުގެ ތާވަލްގެ ފަސްވަނައަށް ކްލަބް ގްރީން ސްޓްރީޓްސް ޖެހިލައިފިއެވެ.
ގްރީން ފަސްވަނައަށް ޖެހިލީ 16 މެޗުން 20 ޕޮއިންޓް ހަމަކޮށްގެންނެވެ. މިއަދަދަށް ޕޮއިންޓް ލިބިފައިވާ އެހެން ދެ ޓީމެއްވެސް އެބައޮތެވެ. އެއީ ޓީސީއާއި ޔުނައިޓެޑް ވިކްޓްރީއެވެ. ތިން ޓީމް ތަރުތީބުވެފައިވަނީ ފައިދާ ގޯލުންނެވެ.
ސަސްގެ މައްޗަށް ގްރީން ކުރި ހޯދީ 4-0ންނެވެ. މެޗުގައި ގްރީންގެ ފުރަތަމަ ލަނޑު ޖެހީ ހަސަން ނަޒީމްއެވެ. ދެވަނަ ލަނޑާއި ހަތަރުވަނަ ލަނޑު ޖެހީ ހޯސޭ އަވީލާއެވެ. ތިންވަނަ ލަނޑު ޖެހީ މުހައްމަދު ޖައިލަމްއެވެ.
މިނަތީޖާގެ ސަބަބުން ސަސްއަށް އުނދަގޫތަކެއް ވަނީ ކުރިމަތިވެފައެވެ. ލީގުގެ ތިންވަނަ ބުރު ނިމޭއިރު ފުލަށްދާ ދެޓީމް ފުރަތަމަ ޑިވިޝަންގައި ދެމިއޮތުމަށް ކޮލިފިކޭޝަންގައި ވާދަކުރަން ޖެހޭނެއެވެ. މިހާރު އޮތްގޮތުން ސަސް ކޮލިފިކޭޝަން ކުޅެން ޖެހުމުގެ ފުރުސަތު ބޮޑެވެ. އެއީ ސަސްއާ ކުރީގައި އޮތް ތިން ޓީމާ ދެމެދު ހަ ޕޮއިންޓްގެ ފަރަގެއް އޮތުމުންނެވެ. ސަސް އޮތީ ހަތްވަނާގައެވެ.
ލީގުގައި ބުދަ ދުވަހުގެރޭ ވާދަކުރާނީ އެއްވަނާގައި އޮތް މާޒިޔާއާއި ތިންވަނާގައި އޮތް ވެލެންސިޔާއެވެ.
