މިއަހަރު ރާއްޖެއަށް އަންނާނެ ކަމަށް ލަފާ ކުރި ފަތުރުވެރިންގެ 50 އިންސައްތަ ފުރަތަމަ 6 މަސް ދުވަހުގެ ތެރޭގައި އަތުވެއްޖެއެވެ.

ޓޫރިޒަމް މިނިސްޓްރީ އިން ލަފާ ކޮށްފައިވާ ގޮތުގައި ކޮވިޑް-19އާއި ގުޅިގެން ފަތުރުވެރިކަމަށް އައި ހީނަރުކަމުން އަރައިގަނެ މިއަހަރު 1.6 މިލިއަން ފަތުރުވެރިން ރާއްޖެއަށް އަންނާނެއެވެ. އެ މިނިސްޓްރީގެ ތަފާސްހިސާބުތައް ދައްކާ ގޮތުގައި، ކުރެވުނު އަންދާޒާ އާއި އެއްގޮތަށް، މިއަހަރުގެ ފުރަތަމަ 6 މަސްދުވަހު 809،603 އަށްވުރެ ގިނަ ފަތުރުވެރިން މިހާރު ވަނީ ރާއްޖެއަށް ޒިޔާރަތް ކޮށްފައެވެ.

ތަފާސްހިސާބުތައް ދައްކާ ގޮތުގައި މިއަހަރުގެ މިހާތަނަށް އެންމެ ގިނައިން ފަތުރުވެރިން އައިސްފައިވަނީ އިންޑިއާ އިންނެވެ. އެއީ 111،967 ފަތުރުވެރިންނެވެ. އެ ޤައުމުން ރާއްޖެއަށް އަންނަ ފަތުރުވެރިން ގެ ނިސްބަތް 14.8 އިންސައްތަ އަށް އަރާއިރު ދެވަނައަށް އެންމެ ގިނައިން ފަތުރުވެރިން އައީ އިނގިރޭސިވިލާތުންނެވެ. އެގައުމުން އައި ފަތުރުވެރިންގެ ނިސްބަތަކީ މާކެޓުގެ 11.9 އިންސައްތައެވެ. އެއީ 96،176 ފަތުރުވެރިންނެވެ.

ރާއްޖެއަށް ތިންވަނައަށް އެންމެ ގިނައިން ފަތުރުވެރިން އައީ ރަޝިއާ އިންނެވެ. ޔޫކްރެއިން-ރަޝިއާ ހަނގުރާމަ އާއި އެކުވެސް މިއަހަރު މިހާތަނަށް އެ ޤައުމުން 81،266 ފަތުރުވެރިން ރާއްޖެ ޒިޔާރަތް ކުރިއެވެ. ރާއްޖެށް ގިނައިން ފަތުރުވެރިން އަންނަ އިތުރު ޤައުމުތަކުގެ ތެރޭގައި ޖަރުމަން، އިޓަލީ، އެމެރިކާ، ފްރާންސް، ސްވިޓްޒަލެންޑް، ސައުދިއަރަބިއްޔާ އަދި ސްޕެއިން ހިމެނެއެވެ.

ފާއިތުވި 6 މަސްދުވެހުގެ ތެރޭގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކޮށްފައިވަނީ މާޗު މަހުގައެވެ. އެ މަހު 150،748 ފަތުރުވެރިން ޒިޔާރަތްކުރިއެވެ. މިއަހަރުގެ ކޮންމެ މަހަކު ވެސް އެއް ލައްކައަށް ވުރެ ގިނަ ފަތުރުވެރިން ރާއްޖެއަށް ޒިޔާރަތް ކުރާ ކަން ތަފާސްހިސާބުތަކުން ދައްކައެވެ.

ރާއްޖެއަށް އަންނަ ފަތުރުވެރިންގެ އަދަދު މިދިޔަ 2 އަހަރު ދުވަހާ އަޅާ ބަލާއިރު މިއަހަރު އިތުރުވި ނަމަވެސް ދުވާލެއްގެ މައްޗަށް އަންނަ ފަތުރުވެރިންނާއި ފަތުރުވެރިން ރާއްޖޭގައި ހޭދަ ކުރާ ދުވަހުގެ އަދަދު ވަނީ ދަށްވެފައެވެ. އެގޮތުން، މިދިޔަ ޖޫން މަހު ރާއްޖެއަށް ދުވާލެއްގެ މައްޗަށް އެވްރެޖްކޮށް އައީ 3،699 ފަތުރުވެރިންނެވެ. އަދި ފަތުރުވެރިން ރާއްޖޭގައި ހޭދަ ކުރާ އަދަދު ވަނީ އެވްރެޖްކޮށް 7.8 ދުވަހަށް މަދުވެފައެވެ.

ކޮވިޑް-19އާއި ގުޅިގެން 2020 އަދި 2021 ވަނަ އަހަރު ރާއްޖޭގެ ފަތުރުވެރިކަމަށް ވަރަށް ބޮޑު އަސަރެއް ކުރިއެވެ. މިއަހަރު ވެސް ރަޝިއާ އާއި ޔޫކްރެއިން ގެ ހަމަނުޖެހުންތަކާ ގުޅިގެން އަހަރުގެ ކުރީ ކޮޅު ފަތުރުވެރިކަމަށް އަސަރު ކުރިނަމަވެސް އެ ޤައުމުން އަލުން ދަތުރުތައް ފެށުމާއެކު އަދަދުތައް އަންނަނީ ރަގަޅު ވަމުންނެވެ. މި އަހަރު ނިމޭއިރު 2019ވަނަ އަހަރު ރާއްޖޭގެ ފަތުރުވެރިކަން އޮތްވަރަށް މާކެޓް ރަގަޅު ކުރެވޭނެ ކަމަށް ޓޫރިޒަމް މިނިސްޓްރީން ލަފާ ކުރެއެވެ.