ވިލާ ކޮލެޖްގެ ސްޓޫޑެންޓް އެސޯސިއޭޝަން (ވީ.ސީ.އެސް.އޭ)ގެ ފަރާތުން އިންތިޒާމުކޮށްގެން ބާއްވާ ޓްރިޕަލް ތްރެޓް ބާސްކެޓްބޯލް ޓޯނަމެންޓް 2022 (ޓީ.ޓީ.ބީ.ޓީ)ގައި ހުކުރު ދުވަހުގެ ރޭ ކުޅުނު މެޗުން ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފިރިހެން ޓީމް އާއި އަންހެން ޓީމު ވެސް މޮޅުވެއްޖެއެވެ.

އައުޓްޑޯ ބާސްކެޓް ކޯޓުގައި ހުކުރު ދުވަހުގެ ރޭ ފުރަތަަމަ ކުޅުނީ އަންހެން ޑިވިޝަންގެ މެޗެވެ. އެއީ ވިލާ ކޮލެޖްއާއި އަހުމަދިއްޔާ އިންޓަރނޭޝަނަލް ހައި ސްކޫލް ވާދަކުރި މެޗެވެ. އެ މެޗު 16-6 ން ކާމިޔާބުކުރީ އަހުމަދިއްޔާ އިންނެވެ. އަަންހެން ޑިވިޝަންގެ ދެ ވަނަ މެޗުގައި ވާދަކުރީ ވިލާ ކޮލެޖް އާއި ސެންޓަރ ފޯރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ)އެވެ. އެ މެޗު 25-7 ން ކާމިޔާބުކުރީ ސީ.އެޗް.އެސް.އީއެވެ. ރޭ ކުޅުނު އަންހެން ޑިވިޝަންގެ ފަހު މެޗުގައި ބައްދަލުކުރީ އެމް.އެން.ޔޫ.އެސް.ޔޫއާއި އަހުމަދިއްޔާއެވެ. އެ މެޗު 14-9 ން ކާމިޔާބުކުރީ އެމް.އެން.ޔޫ.އެސް.ޔޫއެވެ.

ހުކުރު ދުވަހުގެ ރޭ ކުޅުނު ފިރިހެން ޑިވިޝަންގެ ފުރަތަަމަ މެޗުގައި ބައްދަލުކުރީ މެޕްސް ކޮލެޖް އާއި ސީ.އެޗް.އެސް.އީއެވެ. އެ މެޗު 27-13 ގެ ނަތީޖާއަކުން ކާމިޔާބުކުރީ ސީ.އެޗް.އެސް.އީއެވެ. ފިރިހެން ޑިވިޝަންގެ ދެ ވަނަ މެޗުގައި ވާދަކުރީ ވިލާ ކޮލެޖް އާއި އެމް.އެން.ޔޫ.އެސް.ޔޫއެވެ. މި މެޗު 33-17 ގެ ބޮޑު ނަތީޖާއަކުން ކާމިޔާބުކުރީ އެމް.އެން.ޔޫ.އެސް.ޔޫއެވެ.

ވިލާ ކޮލެޖުން އިންތިޒާމުކޮށްގެން ބާއްވާ މި މުބާރާތުގައި ހަ ޓީމް އަކުން ވާދަކުރެއެވެ. އޭގެ ތެރޭގައި އެމް.އެން.ޔޫ.އެސް.ޔޫ، ވިލާ ކޮލެޖު، އަހުމަދިއްތާ އަދި ސީ.އެޗް.އެސް.އީ ހިމެނެއެވެ. މިއީ ހަޔަރ އެޑިއުކޭޝަން ކޮމިއުނިޓީގެ މެދުގައި ޓްރިޕަލް ތްރެޓް ބާސްކެޓްބޯލް މުބާރާތެއް ބާއްވާ ފުރަތަމަ ފަހަރެވެ. ވިލާ ކޮލެޖުގެ ދަރިވަރުންގެ އެސޯސިއޭޝަނުން ވަނީ ކޮންމެ އަހަރުވެސް މި މުބާރާތް ބޭއްވުމަށް ނިންމާފައެވެ. މުބާރާތުގެ ފައިވް އޮން ފައިވް އާއި ތްރީ އޮން ތްރީގައި ވެސް އަންހެން އަދި ފިރިހެން ޓީމުތައް ވަނީ ބައިވެރިވެފައެވެ. މުބާރާތް ކުރިއަށްދާނީ ޖުލައި ހަ ވަނަ ދުވަހާ ހަމައަށް، އައުްޓްޑޯ ބާސްކެޓު ކޯޓުގައެވެ.

މުބާރާތާ ގުޅޭ ގޮތުން ވިލާ ކޮލެޖުގެ ދަރިވަރުން އެސޯސިއޭޝަންގެ ރައީސް މޫސާ މީކާއީލް އަހުމަދު ވިދާޅުވީ މުބާރާތް ކުރިއަށް ގެންދިޔުމުގައި ހުރިހާ ޓީމުތަކެއްގެ ވެސް އެއްބާރުލުން ލިބޭ ކަމަށެވެ. މީކާއީލް ވިދާޅުވީ ހުރިހާ ޓީމުތަކެއްގެ ފަރާތުން ވެސް ފެންނަނީ އެކުވެރިކަމާއި އެއްބައިވަންތަކަމާއިއެކު، ކުޅިވަރުގެ ރޫޙާއި އެއްގޮތަށް މުބާރާތް ކުރިއަށް ގެންދިޔުމަށް އެހީތެރިވާ މަންޒަރުކަމަށެވެ.

ވިލާ ކޮލެޖުގެ ދަރިވަރުންގެ އެސޯސިއޭޝަނުން އިންތިޒާމުކުރާ މި މުބާރާތް އިންތިޒާމްކުރުމުގެ ބައިވެރިއަކީ މޯލްޑިވްސް ބާސްކެޓްބޯލް އެސޯސިއޭޝަންއެވެ.