ޖޫން 2ގައި އައްޑޫ ސިޓީގައި ޒުވާނަކު މަރާލި މައްސަލައިގެ ތަހުގީގަށް ހުރަސް އަޅައި ނުފޫޒު ފޯރުވަން މަސައްކަތް ކުރާ ކަމުގެ ތުހުމަތުގައި މީހަކު ހައްޔަރު ކޮށްފިއެވެ.

ފުލުހުން ނެރުނު ބަޔާނެއްގައި ބުނީ ހުކުރު ދުވަހު އެ މީހާ ހައްޔަރު ކޮށްފައިވަނީ ކޯޓު އަމުރެއްގެ ދަށުން ކަމަށެވެ. މި މައްސަލައިގައި ހައްޔަރު ކޮށްފައިވަނީ 37 އަހރުގެ ދިވެހި ފިރިހެނެކެވެ.

ފުލުހުން ބުނީ އެ މީހާ ހައްޔަރު ކުރީ 21 އަހރުގެ ޒުވާނާ މަރާލި މައްސަލައިގެ ތުހުމަތުގައި ބަންދުކޮށްފައިވާ ކުޑަކުއްޖަކަށް ނުރަނގަޅު ނުފޫޒު ފޯރުވައި، ފުލުހުން ކުރަމުންދާ ތަހުގީގަށް ހުރަސް އަޅައި، ފުލުހުންގެ ދައުރު އަދާ ކުރުމަށް ހުރަސް އެޅުމާއި އެކަމަށް ދަތި ކުރަމުންދާ މައްސަލައިގައި ކަމަށެވެ. އޭނާގެ އިތުރުވެސް އެހެން ބައެއް ފަރާތްތަކުން މި މައްސަލައިގައި ތަހުގީގަށް ނުފޫޒު ފޯރުވައި ހުރަސް އެޅުމަށް މަސައްކަތް ކުރަމުންދާ ކަމަށާއި އެކަން ބަލައި އަޅަންޖެހޭ ފިޔަވަޅުތައް އަޅަމުން ގެންދާ ކަމަށް ވެސް ފުލުހުން ބުންޏެވެ.

21 އަހަރުގެ ޒުވާނާ މަރާލި މައްސަލައިގައި މިހާތަނަށް 18 އަހަރުން ދަށުގެ 2 ކުއްޖަކު ހިމެނޭހެން 7 މީހުން ވަނީ ހައްޔަރު ކޮށްފައެވެ. މީގެ ތެރޭގައި 16 އަހަރާއި 15 އަހަރުގެ ދެ ކުދިންނާއި 18 އަހަރާއި 28 އަހަރާ ދެމެދުގެ ފިރިހެނުން ހިމެނެއެވެ.

މި މައްސަލައިގައި ހައްޔަރު ކުރި ބައެއް މީހުން ޝަރީއަތް ނިމެންދެން ބަންދުގައި ބޭތިއްބުމަށް ހުކުމް ކޮށްފައިވާއިރު އަނެއްބައި މީހުންގެ ބަންދުގެ މުއްދަތު ވަނީ 3 ވަނަ ފަހަރަށް އިތުރު ކޮށްފައެވެ.

ފުލުުހުން ބުނީ މި މައްސަލައިގައި ތަހުގީގަށް މިހާތަނަށް ލިބިފައިވާ ކުރިއެރުމާއި ހޯދިފައިވާ ހެއްކާއި ބެހޭގޮތުން ޕްރޮސެކިއުޓަރ ޖެނެރަލްގެ އޮފީހާއިއެކު މަޝްވަރާ ކުރެވި ތަހުގީގު ފުރިހަމަ ކުރުމަށް ކުރަން ޖެހޭ މަސައްކަތްތައް މިހާރު ކުރަމުންދާ ކަމަށެވެ.